વલસાડ જિલ્લામાં કોણે કર્યુ રાષ્ટ્રગીતનું અપમાન?... રાજકીય ગરમાવો

વલસાડ જિલ્લાની પારડી નગરપાલિકામાં રાષ્ટ્રગીતના અપમાનનો મુદ્દો ગરમાયો છે. પારડી પાલિકાની સામાન્ય સભામાં શાસક પક્ષ તરફથી યોગ્ય જવાબ નહી મળતાં વિરોધપક્ષના નેતા બિપીન પટેલે ચાલુ રાષ્ટ્રગીત દરમિયાન હોબાળો કરી તોફાન મચાવ્યુ હતુ. બિપીન પટેલે કરેલા હોબાળાને રાષ્ટ્રગીતનું અપમાનનો મુદ્દો બનાવી ભાજપે રાષ્ટ્રદ્રોહનો ગુનો નોંધાવવાની વાત કરતાં વલસાડ જિલ્લાનું રાજકારણ ગરમાયુ છે. 

પારડી નગરપાલિકાની સામાન્ય સભા તોફાની બની હતી. વિરોધપક્ષના બિપીન પટેલ રાષ્ટ્રગીત ચાલુ હતુ તે દરમિયાવ ટેબલ પર ચઢી નાસ્તાની ડીસ ફેંકી સત્તાધીશો સામે હંગામો મચાવ્યો હતો. કોંગ્રેસના સભ્યોએ સામાન્ય સભામાં પોતાના વિસ્તાર તેમજ શહેરની સમસ્યાઓ બાબતે સવાલ કર્યા હતા. આ સવાલોના સત્તાધીશોએ જવાબ નહી આપીને રાષ્ટ્રગીત શરૂ કરી દીધુ હતુ. તે સમયે બિપીન પટેલે હોબાળો કરી સમસ્યાઓ બાબતે જવાબ માગ્યા હતા. વિરોધપક્ષના સભ્યોએ કરેલા સવાલોનો જવાબ આપવાના બદલે સત્તાધીશોએ રાષ્ટ્રગીત શરૂ કરી દેતા પારદર્શક કામગીરી બાબતે સવાલ ઉઠ્યા હતા.

પારડી નગરપાલિકામાં ભાજપની બહુમતી છે. કોંગ્રેસનાં માત્ર 4 સભ્યો ચૂંટાયા છે. ચૂંટણી બાદ પારડી નગરપાલિકાની પ્રથમ સામાન્ય સભા મળી હતી. એજન્ડાના કામોની સાથે પ્રમુખ સ્થાનેથી રજૂ થતાં અન્ય કામો અંગે ચર્ચા થનાર હતી. પરંતુ અગાઉની સભાઓમાં રજૂ થયેલા કામો અંગે વિરોધ પક્ષના નેતા બીપીન પટેલે સત્તાધીશોને સવાલ કરતાં માહોલ ગરમાયો હતો. હંગામો વધતાં ભાજપના સભ્યોએ સભા પૂર્ણ કરી રાષ્ટ્રગીત શરૂ કરી દીધું હતું. જેને લઈ બિપીન પટેલે ઉગ્ર રોષ વ્યક્ત કર્યો હતો. આ મુદ્દાને શાસકપક્ષના નેતાઓએ રાષ્ટ્રગીતના અપમાનનો મુદ્દો બનાવી દીધો હતો. વિરોધપક્ષના નેતાએ રાષ્ટ્રગીતની આમન્યા જાળવી નહી હોવાનો આરોપ લગાવતા રાજકારણ ગરમાયુ છે.

વલસાડ-ડાંગના સાંસદ ધવલ પટેલે કોંગ્રેસ ઉપર આકરા પ્રહાર કર્યા હતા. શહેર કોંગ્રેસ પ્રમુખ બિપીન પટેલ વિરૂદ્ધ રાષ્ટ્રદ્રોહનો ગુનો નોંધાવવાનું કહી રાષ્ટ્રગીતનું અપમાન કોંગ્રેસની દેશવિરોધી માનસિકતા ગણાવી હતી. તેમણે વધુમાં જણાવ્યુ કે, કોંગ્રેસના મનમાં રાષ્ટ્રગીત પ્રત્યે નફરત છે. બિપીન પટેલે રાષ્ટ્રગીત ચાલુ હોવા છતાં ટેબલ પર ચડી તોફાન કર્યુ હતુ. વિરોધપક્ષના નેતાએ રાષ્ટ્રગીતની આમન્યા જાળવી નહોતી. જ્યારે કોંગ્રેસના કોર્પોરેટર અને વિરોધપક્ષના નેતા બિપીન પટેલે જણાવ્યુ કે, શાસકપક્ષે શહેરની સમસ્યાઓના જવાબ આપવા ન પડે તે માટે સામાન્ય સભા ચાલુ હોવા છતાં રાષ્ટ્રગીતનું ગાન શરૂ કરી દીધુ હતુ. અમે જવાબ માગતા તેને રાષ્ટ્રગીતના અપમાનનો મુદ્દો બનાવી દીધો છે.