MPના દતિયા પેટાચૂંટણીમાં ટિકિટ મુદ્દે હિંસક વિરોધ!

Tension in Datia after BJP ticket announcement: મધ્યપ્રદેશની દતિયા વિધાનસભા પેટાચૂંટણી માટે ભાજપે આશુતોષ તિવારીને ઉમેદવાર જાહેર કર્યા બાદ રાજકીય તણાવ સર્જાયો છે. પૂર્વ ગૃહમંત્રી નરોત્તમ મિશ્રાના સમર્થકોએ હિંસક વિરોધ શરૂ કરતાં ભારે અફરાતફરીનો માહોલ સર્જાયો છે. ટિકિટ ન મળવાથી ગુસ્સે ભરાયેલા ભૂતપૂર્વ ગૃહમંત્રી અને ભાજપના અગ્રણી નેતા નરોત્તમ મિશ્રાના હજારો સમર્થકોએ રાષ્ટ્રીય ધોરીમાર્ગ-44 (એનએચ-44) ને સંપૂર્ણપણે અવરોધિત કરી દીધો હતો.

રાષ્ટ્રીય ધોરીમાર્ગ પર 15 કિમી લાંબો ટ્રાફિક જામ
વિરોધ પ્રદર્શન દરમિયાન હજારો સમર્થકો રાષ્ટ્રીય ધોરીમાર્ગ-44 પર ઉતરી આવ્યા અને રસ્તા રોકો આંદોલન શરૂ કર્યું. પરિણામે લગભગ 15 કિલોમીટર લાંબો ટ્રાફિક જામ સર્જાયો. જેના કારણે દતિયા સહિત આસપાસના જિલ્લાઓમાં વાહન વ્યવહાર ગંભીર રીતે પ્રભાવિત થયો.

પોલીસ પર પથ્થરમારો, અધિકારીઓ ઘાયલ
પોલીસના જણાવ્યા મુજબ, પ્રદર્શનકારીઓને રસ્તો ખાલી કરવા વારંવાર અપીલ કરવામાં આવી હતી. વહેલી સવારે સ્થિતિ વધુ ઉગ્ર બની અને પોલીસ પર પથ્થરમારો થયો. આ ઘટનામાં જિલ્લા પોલીસ અધિક્ષક મયુર ખંડેલવાલ, એડિશનલ એસપી સહિત છથી વધુ પોલીસ અધિકારીઓ ઈજાગ્રસ્ત થયા. પરિસ્થિતિ કાબૂમાં લેવા પોલીસે ટીયર ગેસના શેલ છોડ્યા અને ભીડને વિખેરવા માટે કાર્યવાહી કરી.

પોલીસનો દાવો અને કાર્યવાહી
દતિયા પોલીસના જણાવ્યા મુજબ હજારો લોકો શહેરમાં ભેગા થયા હતા અને બજારો બંધ કરાવવાનો પ્રયાસ કર્યો હતો. હિંસક બનાવ બાદ કેટલાક લોકોને અટકાયત કરવામાં આવી છે, જ્યારે અન્યની ઓળખ કરી આગળની કાયદેસરની કાર્યવાહી હાથ ધરવામાં આવી રહી છે.

ભાજપ નેતાઓએ પોલીસ પર લગાવ્યા આરોપ

ભાજપના જિલ્લા મંત્રી ભાનુ સિંહે કહ્યું, "અમે ભારતીય જનતા પાર્ટીના ટોચના નેતૃત્વ પાસેથી શાંતિપૂર્ણ રીતે માંગ કરી રહ્યા હતાં. દતિયાની ટિકિટ પાછી ખેંચી લેવામાં આવે અને નરોત્તમ મિશ્રાને ટિકિટ આપવામાં આવે. અમે બંધારણીય રીતે અમારી માંગણીઓ કરી રહ્યા હતા. અમે આખી રાત રામધૂન ગાઈને માંગ કરી હતી કે, ભાજપ નરોત્તમ મિશ્રાને ટિકિટ આપે. પરંતુ પોલીસ પ્રશાસન, પોલીસ અધિક્ષક અને દતિયા કલેક્ટરની ક્રૂરતા જુઓ. જેમણે ભાજપના કાર્યકરોને તેમની ઓફિસમાં કેદ કર્યા. જ્યાં સુધી ડૉ. નરોત્તમ મિશ્રાને ટિકિટ ન મળે ત્યાં સુધી અમે રસ્તાઓ રોકતા રહીશું."

સમર્થકો કેમ થયા નારાજ?
દતિયા બેઠક માટે નરોત્તમ મિશ્રાનું નામ ચર્ચામાં હતું અને તેમના સમર્થકોને ટિકિટ મળવાની અપેક્ષા હતી. જો કે, ભાજપે આશુતોષ તિવારીને ઉમેદવાર જાહેર કરતાં સમર્થકોમાં ભારે અસંતોષ ફેલાયો. કેટલાક સમર્થકોએ રસ્તા પર સૂઈને વિરોધ નોંધાવ્યો અને પક્ષ છોડવાની પણ ચેતવણી આપી.

દતિયામાં પેટાચૂંટણીનું કારણ
વર્ષ 2023ની મધ્યપ્રદેશ વિધાનસભાની ચૂંટણીમાં કોંગ્રેસના નેતા રાજેન્દ્ર ભારતીએ તત્કાલિન ગૃહમંત્રી નરોત્તમ મિશ્રાને 7500 થી વધુ મતોથી હરાવ્યા હતા. જો કે, એપ્રિલ-2026 માં, દિલ્હીની કોર્ટે રાજેન્દ્ર ભારતીને છેતરપિંડીના કેસમાં ત્રણ વર્ષની જેલની સજા ફટકારી હતી. રાજેન્દ્ર ભારતી દોષિત ઠેરવવામાં આવતાં રાજેન્દ્ર ભારતીની વિધાનસભા બેઠક ગેરલાયક ઠરાવવામાં આવી હતી. જેના કારણે દતિયા બેઠક ખાલી થઈ હતી અને ત્યાં પેટાચૂંટણી યોજાઈ રહી છે. 30 જુલાઈએ મતદાન અને 3 ઓગસ્ટે મત ગણતરી કરવામાં આવશે.

ભાજપ માટે સાપે છછૂંદર ગળ્યા જેવી સ્થિતિ
વર્ષ 2023ની વિધાનસભા ચૂંટણીમાં કોંગ્રેસના રાજેન્દ્ર ભારતીએ નરોત્તમ મિશ્રાને હરાવી ભાજપના અભેદ્ય કિલ્લાને કોંગ્રેસે તોડી પાડ્યો હતો. હાર અને આંતરિક સરવેના કારણે પાર્ટી હાઈકમાન્ડે પાર્ટી નેતાને બદલવાનું કડક પગલું ભર્યું છે. ભૂતપૂર્વ ગૃહમંત્રી નરોત્તમ મિશ્રાના દાવાઓને અવગણી પાર્ટીએ ભૂતપૂર્વ વિભાગીય સંગઠન મંત્રી અને મધ્યપ્રદેશ હાઉસિંગ બોર્ડના પૂર્વ અધ્યક્ષ આશુતોષ તિવારીને ઉમેદવાર જાહેર કર્યા છે. તિવારી મૂળ દતિયાના છે અને લાંબા સમયથી ભાજપ કાર્યકર માનવામાં આવે છે.

રાજકીય વર્તુળોમાં વ્યાપક ચર્ચા છે કે, ભાજપે કાળજીપૂર્વક વિચારણા કર્યા પછી અને પાયાના સ્તરેથી મળેલા પ્રતિસાદના આધારે આશ્ચર્યજનક નિર્ણય લીધો છે. જો કે, પાયાના સંગઠનમાં નરોત્તમ મિશ્રાનું વર્ચસ્વ એટલું મજબૂત છે કે સમગ્ર જિલ્લા એકમ બળવો કરવા માટે તૈયાર છે. તેના કારણે દતિયા પેટાચૂંટણી ખૂબ જ જટિલ અને રસપ્રદ વળાંક પર પહોંચી ગઈ છે.

રાજકીય વર્તુળોમાં સૌથી મોટો પ્રશ્ન એ છે કે, શું ભાજપ હાઈકમાન્ડ અસંતુષ્ટ જિલ્લા સંગઠનના દબાણ હેઠળ નિર્ણય બદલશે. જો નિર્ણય યથાવત રહેશે તો ડૉ. નરોત્તમ મિશ્રા તેમના ગુસ્સે ભરાયેલા સમર્થકોને કેવી રીતે શાંત કરશે? શું તેઓ પોતે આશુતોષ તિવારી માટે પ્રચાર કરશે કે પછી એક નવી વાર્તા...

મધ્યપ્રદેશના રાજકારણમાં દતિયા બેઠક સત્તાનું એપી સેન્ટર
દતિયા વિધાનસભા બેઠક મધ્યપ્રદેશના રાજકારણમાં સત્તાનું કેન્દ્ર અને VIP બેઠક રહી છે. દતિયાના રાજકીય ઇતિહાસ પર નજર કરીએ તો ડૉ. નરોત્તમ મિશ્રાએ છેલ્લા દોઢ દાયકાથી અહીં સંપૂર્ણ પ્રભુત્વ જાળવી રાખ્યું છે. તેમણે સતત ત્રણ ચૂંટણીઓ જીતીને દતિયાને ભાજપ માટે એક અદમ્ય ગઢ બનાવ્યો હતો. આવી સ્થિતિમાં આ પેટાચૂંટણી ભાજપ માટે તેના લાંબા સમયથી ખોવાયેલા ગઢને ફરીથી કબજે કરવા અને તેના ભૂતપૂર્વ વર્ચસ્વને પાછું મેળવવાની લડાઈ છે. ત્યારે કોંગ્રેસને નવા ચહેરા સામે તેની તાજેતરની જીત જાળવી રાખવા માટે મુશ્કેલ પડકારનો સામનો કરવો પડી રહ્યો છે. દતિયા પેટાચૂંટણી હવે ફક્ત વિધાનસભા પેટાચૂંટણી નથી. તે ભૂતપૂર્વ સૈનિકો અને ઉભરતા રાજકીય દળોની વિશ્વસનીયતા માટે એક લિટમસ ટેસ્ટ બની ગઈ છે.