UGC NET પેપર રદ થતા રાજકીય ઘમાસાણ

Rahul Gandhi On UGC NET Re-exam: જૂન 2026માં યોજાયેલી UGC NET પરીક્ષાના English, Commerce અને Sociology વિષયના પ્રશ્નપત્રો રદ કરવાના નિર્ણય બાદ દેશના રાજકારણમાં ગરમાવો આવ્યો છે. NTA દ્વારા ત્રણેય પેપર રદ કરીને સપ્ટેમ્બર 2026માં પુનઃપરીક્ષા લેવાની જાહેરાત થતાં કોંગ્રેસે કેન્દ્ર સરકાર અને પરીક્ષા એજન્સી પર આકરા પ્રહારો કર્યા છે. ખાસ કરીને રાહુલ ગાંધી અને જયરામ રમેશે UGC NET વિવાદ, NTAની કામગીરી અને વિદ્યાર્થીઓના ભવિષ્યને લઈને સરકાર પાસે જવાબ માગ્યો છે.

UGC NET પેપર રદ થતા રાહુલ ગાંધીનો મોદી સરકાર પર સીધો હુમલો
કોંગ્રેસ નેતા રાહુલ ગાંધીએ UGC NET પેપર રદ થવાના મુદ્દે મોદી સરકાર અને NTAને ઘેર્યા છે. તેમણે આક્ષેપ કર્યો કે પરીક્ષા યોજાયાના લગભગ બે મહિના બાદ પ્રશ્નપત્રોમાં ગંભીર ભૂલો હોવાનું સામે આવવું પરીક્ષા વ્યવસ્થાની વિશ્વસનીયતા પર મોટો સવાલ છે. રાહુલ ગાંધીએ કહ્યું કે NTAની ભૂલોનો સીધો ભોગ વિદ્યાર્થીઓએ બનવું પડે છે. તેમના જણાવ્યા મુજબ, વિદ્યાર્થીઓના પૈસા, સમય, મહેનત અને માનસિક શાંતિ પર તેની અસર પડે છે. તેમણે સરકારને સવાલ કર્યો કે જો પરીક્ષા વ્યવસ્થામાં વારંવાર ખામીઓ સામે આવે છે તો તેની જવાબદારી કોણ નક્કી કરશે?

 

Modi ji, look at what your NTA has just done.

UGC-NET exams for Sociology, English and Commerce were held between 22 and 30 June. Nearly two months later, NTA has cancelled all three because it set faulty papers and repeated old questions.

Thousands of candidates who prepared… https://t.co/TUMhhMhjvL

— Rahul Gandhi (@RahulGandhi) August 17, 2026

 

'શું પેપર લીક થયું હતું?' રાહુલ ગાંધીનો મોટો સવાલ
રાહુલ ગાંધીએ UGC NET પેપર રદ થવાના મામલે પેપર લીકની સંભાવના અંગે પણ સવાલ ઉઠાવ્યો છે. તેમણે પૂછ્યું કે NTA દ્વારા રદ કરાયેલા પ્રશ્નપત્રો પરીક્ષા પહેલાં લીક થયા હતા કે નહીં તેની તપાસ થઈ છે કે કેમ. કોંગ્રેસ નેતાએ NTAના ઉચ્ચ સ્તરના અધિકારીઓની જવાબદારી નક્કી કરવાની માંગ સાથે કહ્યું કે પરીક્ષા વ્યવસ્થામાં બેદરકારી બદલ જવાબદારી નક્કી થવી જરૂરી છે.

જયરામ રમેશે પૂછ્યું- બે મહિના બાદ ભૂલો કેમ મળી?
કોંગ્રેસના વરિષ્ઠ નેતા જયરામ રમેશે પણ NTAના નિર્ણયને લઈને અનેક સવાલો કર્યા છે. તેમણે પ્રશ્ન કર્યો કે જૂન 2026માં પરીક્ષા યોજાયા બાદ લગભગ બે મહિના પછી NTAને English, Commerce અને Sociologyના પેપરોમાં રહેલી ગંભીર ખામીઓ કેમ જોવા મળી? તેમણે પ્રશ્નપત્રોમાં સ્પેલિંગ, ભાષા, વ્યાકરણ, નામો અને પુસ્તકોના શીર્ષકો સંબંધિત ભૂલો તેમજ અગાઉના પ્રશ્નોના પુનરાવર્તનનો મુદ્દો ઉઠાવ્યો હતો.

પ્રશ્નપત્રોમાં ગંભીર ભૂલો હોવાના આક્ષેપ
UGC NET ઉમેદવારો દ્વારા પણ પ્રશ્નપત્રોની ગુણવત્તા અંગે ફરિયાદો કરવામાં આવી હતી. ઉમેદવારોના જણાવ્યા અનુસાર કેટલાક પ્રશ્નો અસ્પષ્ટ હતા અને અનેક જગ્યાએ ભાષાકીય તથા વ્યાકરણની ભૂલો જોવા મળી હતી. આ ઉપરાંત, કેટલાક પ્રશ્નોમાં ખોટી સ્પેલિંગ, વિદ્વાનોના નામોમાં ભૂલો, પુસ્તકોના નામમાં વિસંગતતા અને અગાઉની પરીક્ષાઓના પ્રશ્નોના પુનરાવર્તન જેવા મુદ્દા સામે આવ્યા હતા.

NTAની નિષ્ણાત સમિતિની ભલામણ બાદ લેવાયો નિર્ણય
NTA દ્વારા બહાર પાડવામાં આવેલી પ્રોવિઝનલ આન્સર કી પહેલાં જ પ્રશ્નપત્રોની ગુણવત્તા અંગે નિષ્ણાત સમિતિ દ્વારા સમીક્ષા કરવામાં આવી હતી. તપાસ બાદ સમિતિની ભલામણોને ધ્યાનમાં રાખીને ત્રણેય વિષયોની પરીક્ષા સંપૂર્ણપણે રદ કરવાનો નિર્ણય લેવામાં આવ્યો હતો. NTAનું માનવું છે કે પ્રશ્નપત્રમાં રહેલી ખામીઓ માત્ર એક-બે પ્રશ્નો પૂરતી મર્યાદિત ન હોવાથી આખી પરીક્ષા ફરી યોજવી જરૂરી બની હતી.

9 અને 10 સપ્ટેમ્બરે ફરી UGC NET પરીક્ષા
રદ કરાયેલા ત્રણેય વિષયોની પુનઃપરીક્ષા માટે NTAએ નવું શેડ્યૂલ જાહેર કર્યું છે. NTA મુજબ પુનઃપરીક્ષા માટે ઉમેદવારો પાસેથી કોઈ વધારાની પરીક્ષા ફી લેવામાં આવશે નહીં.
English: 9 સપ્ટેમ્બર 2026, શિફ્ટ-1
Commerce: 9 સપ્ટેમ્બર 2026, શિફ્ટ-2
Sociology: 10 સપ્ટેમ્બર 2026, શિફ્ટ-1

બાકીના 84 વિષયોના પરિણામ પર અસર નહીં
NTAએ સ્પષ્ટ કર્યું છે કે કુલ 87 વિષયોમાંથી માત્ર ત્રણ વિષયોની પરીક્ષા રદ કરવામાં આવી છે. બાકીના 84 વિષયોના પરિણામો નિર્ધારિત પ્રક્રિયા મુજબ જાહેર કરવામાં આવશે. આ ઉમેદવારો માટે JRF, Assistant Professor અને PhD પ્રવેશ માટેની પાત્રતા સંબંધિત પ્રક્રિયામાં કોઈ વિલંબ નહીં થાય તેવું NTAએ જણાવ્યું છે.

UGC NET વિવાદથી વિદ્યાર્થીઓની મુશ્કેલી વધી
એક તરફ NTAએ પુનઃપરીક્ષાની તારીખ જાહેર કરી છે, તો બીજી તરફ વિદ્યાર્થીઓમાં ફરી પરીક્ષા આપવાની ચિંતા જોવા મળી રહી છે. અનેક ઉમેદવારોએ પરીક્ષા કેન્દ્ર સુધી ફરી મુસાફરી, વધારાનો સમય અને માનસિક તણાવ અંગે પ્રશ્નો ઉઠાવ્યા છે. UGC NET પેપર રદ, NTA વિવાદ અને રાજકીય આક્ષેપો વચ્ચે હવે મુખ્ય સવાલ એ છે કે પરીક્ષા વ્યવસ્થામાં આવી ગંભીર ખામીઓ માટે જવાબદારી ક્યારે નક્કી થશે અને વિદ્યાર્થીઓના સમય તથા મહેનતનું વળતર કેવી રીતે મળશે.