પશ્ચિમ બંગાળના 9 જિલ્લામાં TMCના સૂપડાં સાફ

પશ્ચિમ બંગાળ વિધાનસભા ચૂંટણીમાં તૃણમૂલ કોંગ્રેસે 15 વર્ષ પછી સત્તા ગુમાવી દીધી. રાજ્યના નવ જિલ્લાઓમાં પાર્ટીનો સંપૂર્ણ સફાયો થઈ ગયો. આ જિલ્લાઓમાં મતદારોને આકર્ષવા માટે ભાજપે કઈ રણનીતિ અપનાવી અને TMCની હારના કારણો શું હતાં..આવો જાણીએ

ભારતીય જનતા પાર્ટીએ પશ્ચિમ બંગાળના 23 માંથી 9 જિલ્લામાં તૃણમૂલ કોંગ્રેસ (TMC)નો સંપૂર્ણ સફાયો કરી દીધો છે. આ વિસ્તારોમાં તમામ 68 બેઠકો જીતી લીધી. ભાજપે રાજ્યમાં TMCનો સંપૂર્ણ સફાયો કરી દીધો. રાજ્યમાં પ્રથમ વખત સત્તામાં આવેલી ભાજપ માટે નવ જિલ્લામાં મળેલા જનાદેશ દર્શાવે છે કે વડા પ્રધાન નરેન્દ્ર મોદીની ચૂંટણી પ્રચારની આગાહી સાચી પડી કે TMC ઘણા જિલ્લાઓમાં પોતાનું ખાતું ખોલવામાં નિષ્ફળ જશે.

ભાજપે 294 વિધાનસભાની બેઠકોમાંથી 206 બેઠકો જીતીને બે તૃતીયાંશથી વધુ બહુમતી મેળવી છે. 15 વર્ષથી સત્તામાં રહેલી ટીએમસી 80 બેઠકો પર સમેટાઈ ગઈ. આ પરિણામ સાથે ભાજપે પૂર્વ ભારતમાં તેનો છેલ્લો મુખ્ય ગઢ જીતી લીધો. પશ્ચિમ બંગાળના વિજય સાથે 'આંગ, બાંગ અને કલિંગ' એટલે કે બિહાર, બંગાળ અને ઓડિશામાં તેની પકડ મજબૂત કરી છે.

સુવેન્દુ અધિકારીનો પ્રભાવ વધ્યો

પૂર્વ મેદિનીપુર જિલ્લામાં ભાજપનું પ્રદર્શન સારૂ રહ્યું, જ્યાં પાર્ટીના અગ્રણી નેતા સુવેન્દુ અધિકારીનો સંપૂર્ણ પ્રભાવ હતો. ભાજપે અહીં તમામ 16 બેઠકો જીતી. જે અગાઉની ચૂંટણીમાં 15 હતી. નિષ્ણાતો માને છે કે 2020 માં ભાજપમાં જોડાયા પછી સુવેન્દુ અધિકારીનો પ્રભાવ સતત વધ્યો છે. ખાસ કરીને તેમના ગૃહ જિલ્લા કાંઠીમાં. 2026ના ચૂંટણી પરિણામોએ સાબિત કર્યું કે જિલ્લા પર તેમની પકડ હવે મજબૂત રીતે સ્થાપિત થઈ ગઈ છે.

ઉત્તર બંગાળના દાર્જિલિંગ, કાલિમપોંગ, જલપાઈગુડી અને અલીપુરદુઆર જેવા પહાડી વિસ્તારોમાં ટીએમસી અને તેના સાથી પક્ષો અસર કરવામાં નિષ્ફળ ગયા. ભાજપે ચાર જિલ્લાઓમાં 18 બેઠકો જીતી. ઉત્તર બંગાળમાં ભાજપે 54 માંથી 40 બેઠકો જીતી. જ્યારે ટીએમસીની સંખ્યા 23 થી ઘટીને ફક્ત 14 થઈ ગઈ.

ગોરખા ટેરિટોરિયલ એડમિનિસ્ટ્રેશન(GTA)નું ભવિષ્ય જોખમમાં

ભાજપે પહાડી વિસ્તારોમાં તમામ બેઠકો પર કબજો જમાવ્યો. ગોરખા ટેરિટોરિયલ એડમિનિસ્ટ્રેશન (GTA) ના ભવિષ્ય અંગે ચર્ચાઓ તીવ્ર બની છે. આ સંગઠન મમતા બેનર્જી સરકારના સમર્થનથી ચલાવવામાં આવતું હતું. ચૂંટણી દરમિયાન કેન્દ્રીય ગૃહમંત્રી અમિત શાહે બંધારણના માળખામાં પહાડીઓની સમસ્યાઓનો કાયમી ઉકેલ આપવાનું વચન આપ્યું હતું. ભાજપના સાંસદ રાજુ બિસ્તાએ GTAને તોડી પાડવાના સંકેત તરીકે જોયું. ટીએમસીના સાથી ભારતીય ગોરખા પ્રજાતાંત્રિક મોરચાના વડા અનિત થાપાએ રાજ્યમાં "સરકાર વિરુદ્ધ મતદાન"ને કારણે હારનો શ્રેય આપ્યો. અનિત થાપા GTAના વડા પણ છે.

સ્થાનિક મતદાતાએ કહ્યું કે, લોકો હવે જોવા માંગે છે કે ભાજપ રાજ્ય અને કેન્દ્ર બંને સ્તરે સત્તામાં હોવાથી પહાડીઓ માટે કયા કાયમી ઉકેલો લાવે છે. સિલિગુડી મ્યુનિસિપલ કોર્પોરેશનના મેયર અને ટીએમસીના હારેલા ઉમેદવાર ગૌતમ દેબે જણાવ્યું હતું કે, પાર્ટીનું નબળું પ્રદર્શન મતદાર યાદી (SIR) માંથી નામ કાઢી નાખવા અને વહીવટી મુદ્દાઓને કારણે થયું છે.

કુર્મી-મહાતો સમુદાયનો ભાજપ તરફી ઝુકાવ

મધ્ય બંગાળના જંગલ મહલ પ્રદેશ (પુરુલિયા, બાંકુરા અને ઝારગ્રામ) માં ટીએમસીનો સંપૂર્ણ સફાયો થઈ ગયો. ભાજપે પુરુલિયામાં 9, બાંકુરામાં 12 અને ઝારગ્રામમાં 4 બેઠકો જીતી. નિષ્ણાતો કહે છે કે અનુસૂચિત જનજાતિનો દરજ્જો આપવામાં વિલંબથી અસંતોષને કારણે કુર્મી-મહાતો સમુદાયના મત ભાજપ તરફ ગયા. આનાથી ટીએમસીને નુકસાન થયું. ભાજપે આ સમુદાયના નેતાઓને મેદાનમાં ઉતાર્યા. જેનો ફાયદો ભાજપને થયો. વધુમાં, આદિવાસી મતોનું વિભાજન, રોજગારીના અભાવે સ્થળાંતર, ટીએમસીમાં આંતરિક જૂથવાદ અને ઉમેદવારોની પસંદગીમાં અસંતોષ પણ ટીએમસીના નબળા પ્રદર્શન માટે જવાબદાર ગણાય છે.

ભાજપે પશ્ચિમ બર્ધમાન જિલ્લાની તમામ બેઠકો જીતી

ભાજપે પશ્ચિમ બર્ધમાન જિલ્લામાં શાનદાર પ્રદર્શન કરીને તમામ 9 બેઠકો કબજે કરી. ભાજપે 2021 માં TMC દ્વારા જીતેલી 6 બેઠકો છીનવી લીધી અને બાકીની ત્રણ બેઠકો જાળવી રાખી. સ્થાનિક TMC કાર્યકરો કહે છે કે કેટલાક નેતાઓના ઘમંડ અને જાહેર સેવાને બદલે વ્યક્તિગત લાભ પર ધ્યાન કેન્દ્રિત કરવાથી પાર્ટીની છબી ખરડાઈ છે. ભૂતપૂર્વ TMC નેતા જિતેન્દ્ર તિવારીએ કહ્યું કે, જનતાએ "બંગાળમાં ઉદ્યોગ પુનઃસ્થાપિત કરવા, રોજગાર વધારવા અને મહિલાઓની સલામતી સુનિશ્ચિત કરવા" માટે આ જનાદેશ આપ્યો છે. જિતેન્દ્ર તિવારી હવે ભાજપ સાથે છે અને તેઓ વિધાનસભાની ચૂંટણી જીતી ગયા છે.