પેટાચૂંટણીનું ચિત્ર સ્પષ્ટઃ કડીમાં 8 અને વિસાવદરમાં 16 ઉમેદવારો વચ્ચે ખેલાશે જંગ

કડી અને વિસાવદર વિધાનસભાની પેટાચૂંટણીનું ચિત્ર હવે સ્પષ્ટ થઈ ગયુ છે. ફોર્મ ખેંચવાના અંતિમ દિવસે કડી અને વિસાવદર વિધાનસભામાં 3-3 ઉમેદવારોએ ઉમેદવારી પરત ખેંચી હતી. તેના કારણે કડીમાં 8 અને વિસાવદરમાં 16 ઉમેદવારો વચ્ચે ચૂંટણી જંગ ખેલાશે. કડીમાં 11 અને વિસાવદરમાં 19 ઉમેદવારોએ ઉમેદવારી પત્ર ભર્યા હતા. 

ચૂંટણી પંચે કડી અને વિસાવદરની પેટા ચૂંટણી જાહેર કરી 26 મેના રોજ જાહેરનામુ બહાર પાડ્યુ હતું.  24--કડી (અ.જા.) તથા 87-વિસાવદર વિધાનસભા મત વિભાગની પેટાચૂંટણીનું જાહેરનામું પ્રસિદ્ધ કરાયા બાદ ઉમેદવારીપત્રો ભરવાની શરૂઆત થઈ હતી. 2 જૂન સુધીમાં કડી બેઠક ઉપર કુલ 11 અને વિસાવદર બેઠક ઉપર 19 ઉમેદવરીપત્રો ભરાયા હતા. 3 જૂનના રોજ ઉમેદવારી પત્રોની ચકાસણી કરવામાં આવી હતી. જ્યારે 5 જૂનના રોજ ઉમેદવારી પત્રો પરત ખેંચવાની અંતિમ તારીખ હતી. છેલ્લાં દિવસે કડી અને વિસાવદર બેઠક ઉપર 3-3 ઉમેદવારોએ ઉમેદવારીપત્ર પરત ખેંચ્યા હતા. તેથી હવે કડી બેઠક ઉપર 8 અને વિસાવદર બેઠક ઉપર 16 ઉમેદવારો મેદાનમાં રહ્યા છે. 

કડી બેઠકના ઉમેદવારો

1.    ચાવડા જગદીશભાઈ ગણપતભાઈ આમ આદમી પાર્ટી
2.    રમેશભાઈ મગનભાઈ ચાવડા ઈન્‍ડિયન નેશનલ કોંગ્રેસ
3.    રાજેન્‍દ્રકુમાર (રાજુભાઈ) દાનેશ્વર ચાવડા ભારતીય જનતા પાર્ટી
4.    ડૉ. ગિરીશભાઈ જેઠાભાઈ કાપડીયા પ્રજાશક્તિ ડેમોક્રેટિક પાર્ટી 
5.    જયેન્‍દ્ર કરશનભાઈ રાઠોડ રાઈટ ટુ રીકોલ પાર્ટી 
6.    પ્રવિણભાઈ ઈશ્વરભાઈ ચૌહાણ ભારતીય જન પરિષદ
7.    મકવાણા કમલેશભાઈ સરદાર વલ્લભભાઈ પટેલ પાર્ટી 
8.    મકવાણા દશરથભાઈ ગણપતભાઈ આપકી આવાઝ પાર્ટી

વિસાવદર બેઠકના ઉમેદવારો 

1.    ઈટાલીયા ગોપાલ આમ આદમી પાર્ટી
2.    કિરીટ પટેલ ભારતીય જનતા પાર્ટી
3.    નીતીન રાણપરીયા ઈન્‍ડિયન નેશનલ કોંગ્રેસ
4.    કિશોરભાઈ કાનકડ પ્રજાશક્તિ ડેમોક્રેટિક પાર્ટી
5.    તુલસી લાલૈયા અપક્ષ
6.    નિરૂપાબેન નટવરલાલ માધુ અપક્ષ
7.    પટેલ બિનલકુમાર વિષ્ણુભાઈ અપક્ષ
8.    પરમાર રાજેશકુમાર પ્રેમજીભાઈ અપક્ષ
9.    નારીગરા ભરતભાઈ એસ. પ્રજાપતિ અપક્ષ
10.    યુનુસભાઈ હુસુનભાઈ સોલંકી અપક્ષ
11.    રજનીકાંત વાધાણી અપક્ષ
12.    રાજ પ્રજાપતિ અપક્ષ
13.    સુરેશ માલવીયા અપક્ષ
14.    સોલંકી રોહિત બધાભાઈ અપક્ષ
15.    સંજય હિતેષભાઈ ટાંક અપક્ષ
16.    હીતેશભાઈ પ્રેમજીભાઈ વઘાસીયા અપક્ષ

સ્ટાર પ્રચારકોની યાદીમાં હાર્દિક પટેલ અને અલ્પેશ ઠાકોરની બાદબાકી

19 જૂન, 2025ના રોજ કડી અને વિસાવસર વિધાનસભાની પેટાચૂંટણી અંતર્ગત મતદાન થશે. ભાજપે સ્ટાર પ્રચારકોની યાદી જાહેર કરીને વિધિવત રીતે પ્રચાર અભિયાન શરૂ કર્યુ છે. જેમાં પ્રદેશ પ્રમુખ સી.આર.પાટીલ, મુખ્યમંત્રી ભૂપેન્દ્ર પટેલ, પૂર્વ મુખ્યમંત્રી વિજય રૂપાણી, પૂર્વ નાયબ મુખ્યમંત્રી નીતિન પટેલ, કેન્દ્રીય મંત્રી મનસુખ માંડવિયા, સાંસદ પુરૂષોત્તમ રૂપાલા, પૂર્વ પ્રદેશ પ્રમુખ જીતુ વાઘાણી સહિત 40 સ્ટાર પ્રચારકોની યાદી જાહેર કરી છે. કડી બેઠક ઉપર પાટીદાર અને ઠાકોર સમાજના મતદારોની વિશેષ વસતી હોવા છતાં બંને ધારાસભ્યોની સ્ટાર પ્રચારકોની યાદીમાંથી બાદબાકી કરી છે. એક સમયે ગુજરાતના રાજકારણમાં તરખાટ મચાવી દેનાર બંને નેતાની સ્ટાર પ્રચારકોની યાદીમાંથી બાદબાકી થતાં કાર્યકરોમાં પણ ગણગણાટ સાંભળવા મળ્યો છે.