તેલંગાણાઃ પક્ષ પ્રમુખ પિતાએ પુત્રીને સસ્પેન્ડ કરી

ભારત રાષ્ટ્ર સમિતિ (BRS) ના પ્રમુખ કે.ચંદ્રશેખર રાવ (KCR) એ તેમની પુત્રી અને MLC કે.કવિતા સામે મોટી કાર્યવાહી કરી છે. KCR એ મંગળવારે પુત્રી કે. કવિતાને પક્ષ વિરોધી પ્રવૃત્તિઓ કરવા બદલ BRS માંથી હાંકી કાઢ્યા છે. ભૂતપૂર્વ મુખ્યમંત્રી કે.સી.આર.એ પક્ષના વરિષ્ઠ નેતાઓ સાથે બેઠક કર્યા બાદ  નિર્ણય લીધો હતો.

ભારત રાષ્ટ્ર સમિતિ (BRS) ના મહાસચિવ ટી.અરવિંદ રાવ અને સોમુ ભરત કુમારે એક નિવેદનમાં જણાવ્યું હતું કે, KCR એ કવિતાને તાત્કાલિક અસરથી પક્ષમાંથી સસ્પેન્ડ કરવાનો નિર્ણય લીધો છે. નિવેદન અનુસાર, BRS નેતૃત્વએ કવિતાના કાર્યો અને તેમની પક્ષ વિરોધી પ્રવૃત્તિઓથી પાર્ટીને થઈ રહેલા નુકસાનને ગંભીરતાથી લીધું છે.

કે. કવિતાએ ભૂતપૂર્વ મંત્રી હરીશ રાવ, ભૂતપૂર્વ સાંસદ સંતોષ કુમાર અને ભૂતપૂર્વ રાજ્યસભા સભ્ય મેઘા કૃષ્ણ રેડ્ડી સામે ગંભીર આરોપો લગાવ્યા હતા. હરીશ રાવ અને સંતોષ કુમાર પૂર્વ મુખ્યમંત્રી કે.સી.આર.ના ભત્રીજા છે. સોમવારે એક પ્રેસ કોન્ફરન્સ દરમિયાન કવિતાએ ત્રણેય પર આકરા પ્રહારો કર્યા હતા અને તેમના પર કેસીઆરની છબી ખરાબ કરવાનો આરોપ લગાવ્યો હતો.

મુખ્યમંત્રી રેવંત રેડ્ડીએ કાલેશ્વરમ પ્રોજેક્ટમાં કથિત ગેરરીતિઓ સંબંધિત કેસ સેન્ટ્રલ બ્યુરો ઓફ ઇન્વેસ્ટિગેશન (સીબીઆઈ) ને સોંપવાની જાહેરાત કર્યાના કલાકો પછી તેમણે ટિપ્પણી કરી હતી.

એમએલસી કે. કવિતાએ આરોપ લગાવ્યો હતો કે કેસીઆરની આસપાસના લોકોના દુષ્ટ કાર્યોએ તેમની પ્રતિષ્ઠાને કલંકિત કરી છે અને તેમની સામે સીબીઆઈ તપાસ શરૂ કરી છે. તેમણે કહ્યું કે, કેસીઆર જનતા વિશે વિચારી રહ્યા હતા. જ્યારે તેમની આસપાસના લોકો તેમના સ્વાર્થ માટે મોટા કોન્ટ્રાક્ટરો સાથે સાંઠગાંઠ કરી રહ્યા હતા. તેમણે કહ્યું કે તેમના કારણે જ રેવંત રેડ્ડી જેવા વ્યક્તિએ કેસીઆર સામે સીબીઆઈ તપાસ શરૂ કરી છે.

કવિતાએ વધુમાં જણાવ્યું કે, તેમણે પાર્ટીમાં હરીશ રાવ અને સંતોષ કુમારના તમામ કાવતરાઓને સહન કરી અને તેમના વ્યક્તિગત હુમલાઓનો જવાબ આપ્યો નહીં. તેમણે કહ્યું કે કેસીઆરની પુત્રી હોવાના કારણે તેમને ખરાબ લાગ્યું કે તેમને સીબીઆઈ તપાસનો સામનો કરવો પડ્યો.

હાલમાં, પોતાના પક્ષના નેતાઓના નામ આપવા બદલ કે.કવિતાને પક્ષમાંથી દૂર કરવાની કાર્યવાહી કરવામાં આવી છે. કે.ચંદ્રશેખર રાવે પુત્રી કે.કવિતાને પક્ષમાંથી સસ્પેન્ડ કરવાની ફરજ પડી છે.

--IANS