Vijay In Floor Test Wins: તમિલનાડુના રાજકારણમાં આજે એક નવો અધ્યાય શરૂ થયો છે. અભિનેતામાંથી રાજનેતા બનેલા સી. જોસેફ વિજયની આગેવાની હેઠળની તમિલગા વેટ્ટ્રી કઝગમ (TVK) સરકારે આજે તમિલનાડુ વિધાનસભામાં બહુમતી સાબિત કરી દીધી છે. વિધાનસભાના સ્પીકર જે.સી.ડી. પ્રભાકરે સત્તાવાર જાહેરાત કરી હતી કે વિજય સરકારના વિશ્વાસ મતના પક્ષમાં144 ધારાસભ્યોએ મતદાન કર્યું છે, જ્યારે વિરોધમાં માત્ર 22 મતો પડ્યા હતા. આ મહત્વપૂર્ણ ફ્લોર ટેસ્ટ દરમિયાન પાંચ ધારાસભ્યો ગેરહાજર રહ્યા હતા.
ગૃહમાં સમીકરણો અને મતદાનની પ્રક્રિયા વિધાનસભાની કાર્યવાહી શરૂ થતા જ મુખ્યમંત્રી વિજયે વિશ્વાસ મત મેળવવા માટેનો પ્રસ્તાવ રજૂ કર્યો હતો. પ્રસ્તાવ પરની ચર્ચા દરમિયાન વિવિધ પક્ષોના ફ્લોર લીડરોને બોલવાની તક આપવામાં આવી હતી. શાસક પક્ષ ટીવીકે પાસે સ્પીકર સહિત કુલ 107 ધારાસભ્યોનું સંખ્યાબળ છે. જોકે, હાઈકોર્ટના એક આદેશને કારણે તિરુપત્તુરના ધારાસભ્ય આર. શ્રીનિવાસન સેતુપતિ આ મતદાન પ્રક્રિયામાં ભાગ લઈ શક્યા ન હતા.
ટીવીકે સરકારને બહારથી ટેકો ટીવીકે સરકારને કોંગ્રેસના પાંચ ધારાસભ્યો ઉપરાંત CPI, CPI(M), VCK અને IUML જેવા પક્ષોએ બહારથી ટેકો જાહેર કર્યો હતો. આ તમામ પક્ષોના બબ્બે ધારાસભ્યોએ સરકારની તરફેણમાં મતદાન કર્યું હતું. બીજી તરફ, ભારતીય જનતા પાર્ટી (BJP) ના એકમાત્ર ધારાસભ્યએ મતદાન દરમિયાન "તટસ્થ" રહેવાનું વલણ અપનાવ્યું હતું, જ્યારે અંબુમણિ રામદાસની આગેવાની હેઠળની પીએમકે (PMK) ના ચાર ધારાસભ્યો મતદાનથી દૂર રહ્યા હતા.
વિરોધ પક્ષોમાં મડાગાંઠ અને વોકઆઉટ રાજ્યના મુખ્ય વિરોધ પક્ષ ડીએમકે (DMK) એ ગૃહમાં સરકારનો સામનો કરવાને બદલે વોકઆઉટ કરવાનો માર્ગ પસંદ કર્યો હતો અને મતદાન પ્રક્રિયાથી સંપૂર્ણપણે દૂર રહ્યા હતા. દરમિયાન, અગાઉની સત્તાધારી પાર્ટી એઆઈએડીએમકે (AIADMK) માં આ ફ્લોર ટેસ્ટને લઈને બે ફાટા જોવા મળ્યા હતા. પક્ષના વડા કે. પલાનીસ્વામીએ સરકાર વિરુદ્ધ મતદાન કરવાનું નેતૃત્વ કર્યું હતું અને પોતાના ધારાસભ્યોને પક્ષપલટા વિરોધી કાયદાની ચેતવણી પણ આપી હતી.
AIADMK જૂથમાં ભંગાણ જોકે, પલાનીસ્વામીની ચેતવણી છતાં AIADMK માં મોટું ભંગાણ જોવા મળ્યું હતું. વરિષ્ઠ નેતાઓ એસ.પી. વેલુમાણી અને સી.વી. શનમુગમના નેતૃત્વ હેઠળના અંદાજે ૩૦ જેટલા બળવાખોર ધારાસભ્યોએ પક્ષના આદેશનો અનાદર કરીને ટીવીકે સરકારને સમર્થન આપ્યું હતું. એસ.પી. વેલુમાણીએ ગૃહમાં જાહેરાત કરી હતી કે તેમનું જૂથ રાજ્યની સ્થિરતા માટે વિજય સરકારને ટેકો આપી રહ્યું છે.
વિજયની નવી રાજકીય ઈનિંગ માટે મોટી સફળતા આ જીત સાથે સી. જોસેફ વિજયે તમિલનાડુના મુખ્યમંત્રી તરીકે પોતાની પકડ મજબૂત કરી લીધી છે. વિરોધ પક્ષોના વિરોધ અને આંતરિક ખેંચતાણ વચ્ચે પણ ૧૪૪ ધારાસભ્યોનું સમર્થન મેળવવું એ વિજયની નવી રાજકીય ઈનિંગ માટે મોટી સફળતા માનવામાં આવી રહી છે. હવે વિજય સરકાર સામે રાજ્યના વિકાસ અને પ્રજાલક્ષી કાર્યોના વચનો પૂરા કરવાનો પડકાર રહેશે.

તમિલનાડુમાં વિજય સરકારનો વિજય

ટીવીકેએ ફ્લોર ટેસ્ટ પાસ કર્યો, 144 મતો સાથે વિશ્વાસનો મત જીત્યો

May 13, 2026 | 15:43 IST