Tamil Nadu CM Vijay Gets Governor Nod: તમિલનાડુના રાજકારણમાં છેલ્લા છ દિવસથી ચાલી રહેલી ભારે ખેંચતાણ અને અનિશ્ચિતતાનો અંત આવ્યો હોય તેવું જણાય છે. અભિનેતામાંથી નેતા બનેલા વિજયની પાર્ટી 'તમિલગા વેત્રી કઝગમ' (TVK) માટે સત્તાના દ્વાર ખુલી ગયા છે. રસાકસીભરી રાજકીય પેરવી બાદ, આખરે વિદુથલાઈ ચિરુતાઈગલ કચ્ચી (VCK) એ પોતાનો સમર્થન પત્ર વિજયને સોંપી દીધો છે, જેની સાથે જ તમિલનાડુમાં નવી સરકાર રચવાનો માર્ગ મોકળો થયો છે.
બહુમતીનું ગણિત: 118નો આંકડો વટાવ્યો તમિલનાડુ વિધાનસભાની કુલ 234 બેઠકોમાંથી બહુમતી સાબિત કરવા માટે 118 ધારાસભ્યોના સમર્થનની જરૂર હોય છે. તાજેતરના અહેવાલો મુજબ, વિજયની પાર્ટી TVK એ સ્વતંત્ર રીતે 108 બેઠકો જીતી હતી. અત્યાર સુધી તેમની પાસે 116 ધારાસભ્યોનું સમર્થન હતું, જે બહુમતીથી માત્ર બે ડગલાં દૂર હતું. જોકે, VCK ના બે ધારાસભ્યોના સમર્થન અને અન્ય સાથી પક્ષોના જોડાણ સાથે હવે આ આંકડો 119 પર પહોંચી ગયો છે. આ સાથે જ વિજયે જાદુઈ આંકડો સફળતાપૂર્વક પાર કરી લીધો છે.
વિજયને 'બિનશરતી' ટેકો જાહેર VCK પ્રમુખ થોલ. થિરુમાવલવને TVK નેતા આધવ અર્જુનાને સત્તાવાર રીતે સમર્થન પત્ર સોંપ્યો હતો. આ મુલાકાતની તસવીરો સામે આવતા જ વિજયના સમર્થકોમાં ભારે ઉત્સાહ જોવા મળી રહ્યો છે. અગાઉ VCK દ્વારા ડેપ્યુટી સીએમ પદની માંગણી કરવામાં આવી રહી હોવાના અહેવાલો હતા, પરંતુ અંતે પક્ષે વિજયને 'બિનશરતી' ટેકો જાહેર કરીને તમામ અટકળો પર વિરામ મૂકી દીધો છે.
રાજ્યપાલ સાથેની ત્રણ મુલાકાતો અને હાઈ-વોલ્ટેજ ડ્રામા આ સરકાર રચનાની પ્રક્રિયા કોઈ ફિલ્મી ડ્રામાથી ઓછી નહોતી. વિજયે શુક્રવારે સતત ત્રીજા દિવસે રાજ્યપાલ રાજેન્દ્ર વિશ્વનાથ આર્લેકર સાથે મુલાકાત કરી હતી. અગાઉ 6 અને 7 મેના રોજ પણ તેમણે સરકાર બનાવવાનો દાવો રજૂ કર્યો હતો, પરંતુ ત્યારે તેમની પાસે પૂરતું સંખ્યાબળ (118 ધારાસભ્યો) ન હોવાથી રાજ્યપાલે તેમને આમંત્રિત કરવાનો ઇનકાર કર્યો હતો. શુક્રવારની મુલાકાત વખતે પણ તેમની પાસે 116 પત્રો હતા, પરંતુ VCK ના લેટેસ્ટ સમર્થન બાદ હવે ચિત્ર સ્પષ્ટ થઈ ગયું છે.
હોર્સ ટ્રેડિંગનો ફાળકો: કોંગ્રેસના ધારાસભ્યો હૈદરાબાદ શિફ્ટ એકતરફ સરકાર બનાવવાની તૈયારીઓ ચાલી રહી છે, ત્યારે બીજી તરફ 'હોર્સ ટ્રેડિંગ' (ધારાસભ્યોની ખરીદ-વેચાણ)નો ડર પણ પક્ષોને સતાવી રહ્યો છે. કોંગ્રેસે સાવચેતીના પગલા રૂપે પોતાના પાંચ ધારાસભ્યોને તાત્કાલિક અસરથી હૈદરાબાદ મોકલી દીધા છે. મેલૂરના ધારાસભ્ય પી. વિશ્વનાથન આ ગ્રુપનું નેતૃત્વ કરી રહ્યા છે. ચર્ચા છે કે જો TVK સરકાર બનશે, તો પી. વિશ્વનાથનને મંત્રીમંડળમાં મહત્વનું સ્થાન મળી શકે છે.
પડકારો અને વિવાદો વચ્ચે વિજયનો ઉદય વિજય માટે આ સફર સરળ રહી નથી. ગઠબંધન ગણિતમાં ઇન્ડિયન યુનિયન મુસ્લિમ લીગે ડીએમકે સાથે રહેવાનું નક્કી કર્યું હતું, જ્યારે અમ્મા મક્કલ મુનેત્ર કઝગમે TVK પર નકલી સમર્થન પત્ર વાયરલ કરવાનો ગંભીર આરોપ લગાવીને કાનૂની વિવાદ ઉભો કર્યો હતો. આ આરોપોને કારણે સાથી પક્ષોમાં થોડા સમય માટે અવિશ્વાસનું વાતાવરણ સર્જાયું હતું. જોકે, કોંગ્રેસ (5 ધારાસભ્યો), CPI (2 ધારાસભ્યો), અને CPI(M) (2 ધારાસભ્યો) ના અગાઉથી મળેલા ટેકા બાદ હવે VCK ના જોડાણથી સ્થિતિ સંપૂર્ણપણે વિજયની તરફેણમાં છે.
નવા રાજકીય પક્ષનો ઉદય તમિલનાડુમાં હવે 'થલાપતિ' વિજયના નેતૃત્વમાં નવી સરકાર રચાય તે માત્ર સમયની વાત છે. રાજ્યપાલ દ્વારા ટૂંક સમયમાં જ વિજયને સરકાર રચવા માટે સત્તાવાર આમંત્રણ આપવામાં આવે તેવી શક્યતા છે. દાયકાઓથી ચાલી આવતી દ્રવિડિયન રાજનીતિના બે મુખ્ય સ્તંભો (DMK અને AIADMK) વચ્ચે એક નવા રાજકીય પક્ષનો આ ઉદય તમિલનાડુના ઇતિહાસમાં એક નવો અધ્યાય લખવા જઈ રહ્યો છે.

તમિલનાડુમાં 'થલાપતિ' શાસનની તૈયારી

VCKના સમર્થન સાથે વિજયે જાદુઈ આંકડો પાર કર્યો, ગમે ત્યારે શપથ ગ્રહણ

May 9, 2026 | 17:24 IST