રાજુ કરપડાની કોંગ્રેસ નેતાઓ સાથે બેઠકથી અટકળો તેજ

ગુજરાતના રાજકારણમાં સ્થાનિક સ્વરાજની ચૂંટણીઓ પહેલા મોટા ઉલટ ફેરના સંકેતો મળી રહ્યા છે. આમ આદમી પાર્ટીના કિસાન સેલના પૂર્વ પ્રમુખ રાજુ કરપડાએ કોંગ્રેસ સેવા દળના રાષ્ટ્રીય અધ્યક્ષ લાલજી દેસાઈની મુલાકાત લીધી હતી. આ મુલાકાત દરમિયાન પ્રદેશ પ્રમુખ અમિત ચાવડા અને પાલ આંબલીયા પણ ઉપસ્થિત રહ્યા હતા.

સત્તાવાર રીતે આ મુલાકાત લાલજી દેસાઈના ખબર અંતર પૂછવા માટે હોવાનું જણાવાયું છે. પરંતુ રાજુ કરપડાએ AAP માંથી આપેલા રાજીનામા બાદ બેઠકને કારણે તેઓ કોંગ્રેસમાં જોડાશે તેવી અટકળોએ જોર પકડ્યું છે.

આદ આદમી પાર્ટીના કિસાન સંગઠનના અધ્યક્ષ રાજુ કરપડાએ રાજીનામુ આપ્યા બાદ ભાજપમાં જોડાશે કે કોંગ્રેસમાં તેવી અટકળો તેજ બની છે. તેવા સમયે શુક્રવારે મોડી રાત્રે રાજુ કરપડાએ કોંગ્રેસના નેતાઓ અમિત ચાવડા, પાલ આંબલિયા અને લાલજી દેસાઈ સાથે બેઠક કરી હતી. જેના કારણે રાજુ કરપડાની ભાજપમાં જોડાવાના બદલે કોંગ્રેસમાં જોડાવાની ચર્ચાએ જોર પકડ્યું છે.

રાજુ કરપડાએ આમ આદમી પાર્ટી છોડી ત્યારથી ક્યા પક્ષમાં જોડાશે તેની અફવાઓએ બજાર ગરમ કર્યુ છે. રાજુ કરપડાએ શુક્રવારે મોડી રાત્રે અમદાવાદમાં પ્રદેશ પ્રમુખ અમિત ચાવડા, સેવાદળના રાષ્ટ્રીય અધ્યક્ષ લાલજી દેસાઈ અને કિસાન કોંગ્રેસના ચેરમેન પાલ આંબલીયા સાથે બેઠક કરી હતી. કોંગ્રેસ નેતાઓ રાજુ કરપડાને પોતાના પક્ષમાં જોડવા માટે મથામણ કરી રહ્યા છે. રાજુ કરપડા અગાઉ પણ પાલ આંબલિયા સહિતના નેતાઓને મળી ચૂક્યા છે. 

આમ આદમી પાર્ટીમાંથી રાજુ કરપડાએ રાજીનામું આપતાં ગુજરાતનાં રાજકારણમાં ગરમાવો આવ્યો છે. રાજુ કરપડાને પોતાની પક્ષમાં ખેંચવા માટે ભાજપ અને કોંગ્રેસ દ્વારા સામેથી આમંત્રણ આપવામાં આવ્યું હતું. તેમના રાજીનામાની રાજકીય હલચલ વચ્ચે કોંગ્રેસના પાલ આંબલીયાએ રાજુ કરપડાની ઓફિસે બેઠક કરી હતી. પાલ આંબલીયાએ મુલાકાતને રાજકીય નહીં પરંતુ પારિવારિક સંબંધોના ભાગરૂપે કરી હોવાનું જણાવી ચર્ચાઓ પર પૂર્ણવિરામ મૂકવા પ્રયાસ કર્યો હતો. 

રાજુ કરપડા અગાઉ લાંબો સમય કોંગ્રેસમાં ખેડૂત આગેવાન તરીકે સક્રિય રહી ચૂક્યા હોવાથી કોંગ્રેસમાં પરત ફરે તેવી પ્રબળ શક્યતા છે. કોંગ્રેસ છોડ્યા બાદ તેઓ આમ આદમી પાર્ટીમાં જોડાયા હતા. પરંતુ રાજીનામુ આપ્યા બાદ તેમની આગામી વ્યૂહરચના પર સૌની નજર છે. પાલ આંબલિયાની મુલાકાત બાદ રાજુ કરપડા કયા પક્ષનો ખેસ ધારણ કરશે તે અંગે તર્ક-વિતર્ક ચાલી રહ્યા છે.

લાલજી દેસાઈની મુલાકાત સમયે કોંગ્રેસના નેતાઓની હાજરી સૂચવે છે કે વિપક્ષી ખેમામાં નવા સમીકરણો રચાઈ રહ્યા છે. રાજુ કરપડા જેવા મજબૂત કિસાન નેતા જો કોંગ્રેસમાં જોડાય તો સૌરાષ્ટ્રમાં સ્થાનિક સ્વરાજની ચૂંટણીમાં સમીકરણો બદલાઈ શકે છે.