ભાજપનો મેન્ડેટ, વ્હિપ છતાં બળવાખોરની જીત! રાજકોટ-લોધિકા સંઘની ચૂંટણીનું આખું પરિણામ જાણો

Rajkot Lodhika Sangh Election: રાજકોટ-લોધિકા ખરીદ વેચાણ સંઘની ચૂંટણીનું પરિણામ જાહેર થઈ ગયું છે. રાજકોટ જિલ્લાના સહકારી રાજકારણમાં મહત્વની ગણાતી આ ચૂંટણીમાં જયેશ રાદડિયા જૂથનો પ્રભાવ જોવા મળ્યો છે. કુલ 15 બેઠકોમાંથી 10 બેઠકો બિનહરીફ થયા બાદ 5 બેઠકો પર યોજાયેલી ચૂંટણીમાં કુવાડવા અને માધાપર બેઠકના પરિણામોએ ખાસ રાજકીય ચર્ચા જગાવી છે.

ભાજપના મેન્ડેટ સામે બળવાખોર ઉમેદવારોની જીત
રાજકોટ-લોધિકા ખરીદ વેચાણ સંઘની ચૂંટણીમાં ભાજપ દ્વારા કેટલાક ઉમેદવારોને મેન્ડેટ આપવામાં આવ્યા હતા. આ ઉપરાંત મતદારોને વ્હિપ પણ આપવામાં આવ્યો હતો. જોકે, કુવાડવા અને માધાપર બેઠક પર ભાજપના મેન્ડેટ સામે ચૂંટણી લડનારા ઉમેદવારો વિજેતા બન્યા હતા. કુવાડવા બેઠક પર નીતિન ચોવટિયાએ જીત મેળવી હતી. નીતિન ચોવટિયાના જણાવ્યા મુજબ તેમને 3 મત મળ્યા હતા, જ્યારે અરવિંદ રૈયાણીને 1 મત મળ્યો હતો. બીજી તરફ માધાપર બેઠક પર વિજય સખીયાની જીત થઈ હતી. વિજય સખીયાએ જણાવ્યું હતું કે તેમના બ્લોકમાં કુલ 5 મત હતા, જેમાંથી તેમને 4 મત મળ્યા હતા.

 

રાજકોટ-લોધિકા સંઘની ચૂંટણીમાં રાદડિયા જૂથનો દબદબો યથાવત! પાંચ બેઠકોના પરિણામમાં 3 બેઠક પર જયેશ રાદડિયા જૂથના ઉમેદવારોનો વિજય. ત્રંબા બેઠક પર ટાઈ બાદ ચિઠ્ઠીથી નીતિન રૈયાણી વિજેતા, જ્યારે ખોખળદર બેઠક પર બાબુભાઈ નસીતની જીત. #Rajkot #JayeshRadadiya #CooperativeElection… pic.twitter.com/6yiute995r

— Benefit News 24 (@BenefitNews24) September 9, 2026

 

અરવિંદ રૈયાણી અને પૃથ્વીસિંહ જાડેજાની હાર
કુવાડવા બેઠક પર પૂર્વ મંત્રી અરવિંદ રૈયાણી ચૂંટણી મેદાનમાં હતા. જ્યારે માધાપર બેઠક પર પૂર્વ ડેપ્યુટી મેયર નરેન્દ્રસિંહ જાડેજાના પિતા પૃથ્વીસિંહ ઉર્ફે ઘોઘુભા જાડેજા ઉમેદવાર હતા. બંને ઉમેદવારોને પાર્ટીનું મેન્ડેટ મળ્યું હોવા છતાં ચૂંટણીમાં હારનો સામનો કરવો પડ્યો હતો. આ બંને બેઠકોના પરિણામને કારણે ભાજપના મેન્ડેટ અને રાજકોટના સહકારી રાજકારણમાં ચાલી રહેલા જૂથવાદને લઈને ચર્ચા તેજ બની છે.

ત્રંબા બેઠક પર ટાઈ બાદ ચિઠ્ઠીથી નિર્ણય
ત્રંબા બેઠક પર બંને ઉમેદવારોને 2-2 મત મળતા ટાઈ પડી હતી. ત્યારબાદ ચિઠ્ઠી ઉછાળીને નિર્ણય કરવામાં આવ્યો હતો. જેમાં પાર્ટીના મેન્ડેટવાળા નીતિન રામાણી વિજેતા બન્યા હતા. હલેન્ડા બેઠક પર મહેશ આસોદરિયાની જીત થઈ હતી, જ્યારે ખોખડદળ બેઠક પર બાબુ નસીતનો વિજય થયો હતો. આ રીતે ચૂંટણી યોજાયેલી 5 બેઠકોના પરિણામ જાહેર થયા છે.

15માંથી 10 બેઠકો બિનહરીફ
રાજકોટ-લોધિકા ખરીદ વેચાણ સંઘની કુલ 15 બેઠકોમાંથી 10 બેઠકો પર ઉમેદવારો બિનહરીફ ચૂંટાયા હતા. સણોસરા બેઠક પર અશ્વિન લીંબાસીયા, તરઘડીયા પર લક્ષ્મણ પરસાણા, બેડલાં પર પરષોત્તમ પડાયા, રફાળા પર કરશન ડાંગર, સરધાર પર નીતિન ઢાંકેચા, લોધીકા પર સંજય અમરેલીયા, ચીભડાં પર મનસુખ સરધારા, ખીરસરા પર નરેન્દ્રસિંહ જાડેજા, માખાવડ પર છગન પટોરીયા અને પાયડી પર રઘુવીરસિંહ જાડેજા બિનહરીફ ચૂંટાયા હતા.

સહકારી રાજકારણમાં પરિણામની ચર્ચા
કુવાડવા અને માધાપર બેઠક પર ભાજપના મેન્ડેટ સામે આવેલા પરિણામો અને બાકીની બેઠકોના પરિણામ બાદ રાજકોટ જિલ્લાના સહકારી રાજકારણમાં આ ચૂંટણી મહત્વપૂર્ણ બની છે. ચૂંટણીના પરિણામોને જયેશ રાદડિયા જૂથ માટે મહત્વપૂર્ણ ગણવામાં આવી રહ્યા છે. આગામી સમયમાં આ પરિણામોની અસર રાજકોટ જિલ્લાના સહકારી રાજકારણ અને જૂથોના સમીકરણો પર કેવી પડે છે તે જોવું મહત્વનું રહેશે.