રાહુલ-પ્રિયંકા સામે ફરી FIR! 91ની અટકાયત બાદ રાહુલનું ‘100 કેસ’ વાળું નિવેદન કેમ ચર્ચામાં?

Rahul Gandhi Priyanka Gandhi FIR Delhi Police Assault Case: મુખ્ય ચૂંટણી કમિશનર જ્ઞાનેશ કુમારના રાજીનામા અને મતદાર યાદીની Special Intensive Revision એટલે કે SIR પ્રક્રિયાને લઈને ચાલી રહેલા INDIA બ્લોકના વિરોધ વચ્ચે દિલ્હીનું રાજકારણ ગરમાયું છે. દિલ્હી પોલીસે કોંગ્રેસ નેતા રાહુલ ગાંધી અને પ્રિયંકા ગાંધી વાડ્રા સહિત અનેક કોંગ્રેસ નેતાઓ અને કાર્યકરો સામે વધુ એક FIR નોંધાવી છે. પોલીસના જણાવ્યા અનુસાર, વિરોધ દરમિયાન પોલીસ અધિકારીઓ સાથે કથિત ગેરવર્તણૂક, સરકારી કામમાં અવરોધ, ધક્કામુક્કી અને પોલીસની ફરજમાં અડચણ ઉભી કરવાના આરોપોને લઈને આ કાર્યવાહી કરવામાં આવી છે. પોલીસના જણાવ્યા અનુસાર, FIRમાં રાહુલ ગાંધી અને પ્રિયંકા ગાંધી ઉપરાંત બુધવારે યોજાયેલા વિરોધ પ્રદર્શનમાં સામેલ અન્ય ઘણા કોંગ્રેસ નેતાઓ અને કાર્યકરોના નામ છે. પોલીસ હવે વિરોધ દરમિયાન બનેલી ઘટનાઓમાં કોની શું ભૂમિકા હતી તેની તપાસ કરી રહી છે. પોલીસ અધિકારીઓ પર કથિત હુમલો અથવા તેમને ફરજ બજાવતા રોકવામાં આવ્યા હતા કે કેમ તે અંગે પણ તપાસ ચાલી રહી છે.

વિરોધ દરમિયાન 91 લોકોની અટકાયત
બુધવારે દિલ્હી પોલીસે કોંગ્રેસ અને INDIA બ્લોકના વિરોધ પ્રદર્શન દરમિયાન કુલ 91 લોકોની અટકાયત કરી હતી. તેમાં અનેક સાંસદો અને અન્ય નેતાઓનો સમાવેશ થતો હતો. રાહુલ ગાંધીએ INDIA બ્લોકના નેતાઓ સાથે વિરોધ પ્રદર્શનનું નેતૃત્વ કર્યું હતું. જ્ઞાનેશ કુમારના રાજીનામા અને SIR પ્રક્રિયાને લઈને વિપક્ષી સાંસદો જંતર-મંતર તરફ આગળ વધ્યા હતા, જ્યાં પોલીસે અનેક નેતાઓની અટકાયત કરી હતી. આ દરમિયાન રાહુલ ગાંધી બેરિકેડ પાસે જોવા મળ્યા હતા અને બાદમાં અટકાયત દરમિયાન તેમણે મીડિયા તરફ હાથ હલાવીને ‘V’ સાઇન પણ બતાવ્યું હતું. પ્રિયંકા ગાંધીને પણ અટકાયતમાં લેવામાં આવ્યા હતા અને તેઓ વિરોધ દરમિયાન રસ્તા પર સૂતેલા જોવા મળ્યા હતા.

આકાશવાણી ભવન મામલે અગાઉ પણ FIR
આ સમગ્ર ઘટનાક્રમમાં અગાઉ પણ FIR નોંધાઈ હતી. 6 ઓક્ટોબરે INDIA બ્લોકના નેતાઓએ સંસદથી ચૂંટણી પંચ કાર્યાલય સુધી કૂચ કરવાનો પ્રયાસ કર્યો હતો. પોલીસે રસ્તામાં રોક્યા બાદ રાહુલ ગાંધી, પ્રિયંકા ગાંધી સહિત અનેક નેતાઓ આકાશવાણી ભવનમાં પ્રવેશ્યા અને કલાકો સુધી ધરણા કર્યા હતા. ત્યારબાદ તેમની અટકાયત કરવામાં આવી હતી. પોલીસના જણાવ્યા અનુસાર, આકાશવાણી ભવનની ઘટનામાં બે સુરક્ષા કર્મચારીઓ ઘાયલ થયા હતા. પોલીસનું કહેવું છે કે વિરોધ દરમિયાન સરકારી કામગીરીમાં અવરોધ અને પરિસરમાં પરવાનગી વિના પ્રવેશના આરોપોની પણ તપાસ કરવામાં આવી રહી છે.

‘મારી સામે 45 FIR છે, લક્ષ્ય 100 કેસનું છે’
FIR અંગે રાહુલ ગાંધીએ બુધવારે કહ્યું હતું, "મારા વિરુદ્ધ 45 FIR દાખલ થઈ ચૂકી છે, અને મારું લક્ષ્ય 100 કેસ છે. FIR મારા માટે એક મેડલ છે." રાહુલ ગાંધીએ વધુમાં કહ્યું હતું, "બંધારણ અને લોકશાહીને બચાવવા માટે કોંગ્રેસ પક્ષ અને વિપક્ષ રસ્તા પર ઉતરવા, ધરપકડ વહોરવા અને જરૂર પડે તેટલી વાર કાનૂની કેસોનો સામનો કરવા તૈયાર છે." તેમણે વધુમાં જણાવ્યું હતું કે મોદી સરકાર અને ચૂંટણી પંચ વચ્ચેની સાંઠગાંઠ હવે ખુલ્લી પડી ગઈ છે. રાજીનામા અને કાર્યવાહીની માંગણી કરતા રાહુલ ગાંધીએ ભારપૂર્વક કહ્યું કે જનતાના સંકલ્પ સામે કોઈ પણ અહંકારી સરકાર લાંબો સમય ટકી શકતી નથી. તેમણે જાહેર કર્યું કે જ્યાં સુધી મુખ્ય ચૂંટણી કમિશનર જ્ઞાનેશ કુમાર રાજીનામું નહીં આપે ત્યાં સુધી વિપક્ષ પોતાનો વિરોધ ચાલુ રાખશે.

પ્રિયંકા ગાંધીનો પણ સવાલ
અટકાયત દરમિયાન પ્રિયંકા ગાંધી વાડ્રાએ બંધારણની નકલ બતાવીને કહ્યું, "આ દેશમાં બંધારણનું શું મૂલ્ય છે? અમે બંધારણ માટે અમારા પ્રાણ પણ ન્યોછાવર કરવા તૈયાર છીએ. અમારા માટે આનાથી મોટું કોઈ મૂલ્ય નથી." તેમણે પોલીસ પર વિરોધ કરી રહેલા સાંસદો સામે બળપ્રયોગ કરવાનો આક્ષેપ પણ કર્યો હતો.

આજે પણ વિરોધ ચાલુ
કોંગ્રેસે દિલ્હી પોલીસની કાર્યવાહી અને INDIA બ્લોકના સાંસદો સાથે થયેલા કથિત દુર્વ્યવહારના વિરોધમાં 8 ઓક્ટોબરે બ્લેક ડે મનાવવાની જાહેરાત કરી છે. INDIA બ્લોકના નેતાઓ તરફથી જ્ઞાનેશ કુમારના રાજીનામા અને SIR પ્રક્રિયા પર રોકની માંગ સાથે વિરોધ ચાલુ રાખવાની જાહેરાત કરવામાં આવી છે. આમ, રાહુલ ગાંધી અને પ્રિયંકા ગાંધી સામે નોંધાયેલી નવી FIR બાદ SIR, ચૂંટણી પંચ અને જ્ઞાનેશ કુમારના રાજીનામાનો મુદ્દો હવે વધુ એક વખત દિલ્હી રાજકારણના કેન્દ્રમાં આવ્યો છે. પોલીસની તપાસ એક તરફ આગળ વધી રહી છે, જ્યારે કોંગ્રેસ આ કાર્યવાહીને રાજકીય દબાણ તરીકે રજૂ કરી રહી છે.