ગુજરાત કોંગ્રેસના સંગઠનની મજબૂતી માટે રાહુલ ગાંધી ગંભીરઃ નિરીક્ષકોને જવાબદારી સોંપાઈ

સુરેશ વણોલ, અમદાવાદ

કોંગ્રેસના સંગઠનને મજબૂત કરવા સંગઠન સૃજન અભિયાનના પાયલોટ પ્રોજેક્ટનો 16 એપ્રિલથી પ્રારંભ થઈ રહ્યો છે. સંગઠન સૃજન અભિયાન માટે રાહુલ ગાંધી ગુજરાતની બે દિવસની મુલાકાતે આવ્યા છે. અરવલ્લીના મોડાસાથી પાયલોટ પ્રોજેક્ટનો રાહુલ ગાંધી શુભારંભ કરાવશે. મંગળવારે(15 એપ્રિલે) રાહુલ ગાંધીએ પ્રદેશ કાર્યાલય ઉપર નિરીક્ષકો સાથે બેઠક કરી જવાબદારી સોંપી છે. તમામ નિરીક્ષકોને જે તે જિલ્લાનો પ્રથમ રિપોર્ટ 10 દિવસમાં સબમિટ કરવા સૂચના આપી છે. ગુજરાત કોંગ્રેસના સંગઠન બાબતે રાહુલ ગાંધી ગંભીર હોય તેમ છેલ્લાં દોઢ મહિનામાં ગુજરાતની ત્રીજી મુલાકાત કરી છે. 

વર્ષ 2027ની ગુજરાત વિધાનસભા ચૂંટણીમાં ભાજપને હરાવવાની ચેલેન્જ આપ્યા બાદ રાહુલ ગાંધી અને કોંગ્રેસ હાઈકમાન્ડે ગુજરાત પર વિશેષ ધ્યાન કેન્દ્રિત કર્યું છે. ગુજરાત કોંગ્રેસના વરઘોડાના અને રેસના ઘોડાને અલગ તારવવા રાહુલ ગાંધી સતત ગુજરાતની મુલાકાત લઈ રહ્યા છે. 15 એપ્રિલે રાહુલ ગાંધીએ અમદાવાદમાં પ્રદેશ કાર્યાલય ઉપર નિરીક્ષકો સાથે બેઠક કરી નિરીક્ષકોને જવાબદારી સોંપી છે. એક કેન્દ્રીય નિરીક્ષક સાથે 4 ગુજરાતનાં નિરીક્ષકોની ટીમ બનાવી 10 દિવસમાં જે તે જિલ્લાનો પ્રથમ રિપોર્ટ સબમિટ કરવામાં આવશે.   

નિરીક્ષકોની બેઠક દરમિયાન રાહુલ ગાંધીએ 49 નિરીક્ષકોને વન ટુ વન સાંભળ્યા હતા. જિલ્લા પ્રમુખ માટે કોઈપણ જ્ઞાતિ કે જાતિવાદ ન રાખવા સ્પષ્ટ સૂચના આપી હતી. મજબૂત નેતાને પ્રાથમિકતા આપવા તેમજ જિલ્લા પ્રમુખની સારી કામગીરી બદલ યોગ્ય સ્થાન આપવા કહેવાયું હોવાનું સૂત્રો દ્વારા જાણવા મળ્યું છે. દરેક જિલ્લામાં કોંગ્રેસનું વ્યવસ્થિત કાર્યાલય બનાવવા ચર્ચા કરવામાં આવી છે. 

જિલ્લામાં સૌથી વધુ સશક્ત વ્યક્તિને પ્રમુખ બનાવાશેઃ શક્તિસિંહ ગોહિલ

શક્તિસિંહ ગોહિલે બેનિફિટ ન્યૂઝ સાથે વાત કરતાં જણાવ્યું કે જિલ્લામાં સૌથી સશક્ત વ્યક્તિને કોંગ્રેસ જિલ્લા પ્રમુખ બનાવશે. એક કરતા વધારે સશક્ત હોય એમને પ્રદેશ માળખામાં સ્થાન અપાશે. સિનિયર પ્રભારી અને ગુજરાતનાં 4 સભ્યો મળી 5 સભ્યોની ટીમ બનાવી છે. નિરીક્ષકો કોંગ્રેસને જે તે જિલ્લા અંગેનો પ્રથમ રિપોર્ટ 10 દિવસમાં સબમિટ કરશે. પોલિટિકલ અફેર્સ કમિટીના સભ્યો, સાંસદ, પૂર્વ સાંસદ, ધારાસભ્ય, પૂર્વ ધારાસભ્યોને નિરીક્ષક તરીકે જવાબદારી સોંપાઈ છે. જેમાં જિલ્લા,મહાનગરપાલિકાના પૂર્વ પ્રમુખો, જિલ્લા પંચાયત અને મનપાના વર્તમાન નેતા, જીપીસીસી ફ્રન્ટલ અને SC, ST, OBC અને માયનોરિટી ડિપાર્ટમેન્ટના વડા અને સ્થાનિક સ્વરાજ્યની સંસ્થાઓના પૂર્વ વડાઓને નિરીક્ષક બનાવાયા છે. તમામ જિલ્લામાં ત્રણ દિવસનો કેમ્પ કરી જિલ્લા સંગઠનમાં અયોગ્ય નામોની છટણી કરાશે. પ્રદેશ સમિતિ સાથે પરામર્શ કર્યા બાદ નિમણૂકો આપવામાં આવશે. આ કામગીરી 45 દિવસમાં પૂર્ણ કરવામા આવશે. AICCના નિરીક્ષકોને જિલ્લા સોંપી દેવામાં આવ્યા છે.

જિલ્લા પ્રમુખ માટે 5 દાવેદારોની પેનલ બનાવાશે...

રાહુલ ગાંધીએ નિરીક્ષકો સાથેની બેઠકમાં 31 મે સુધી કોંગ્રેસનું સંગઠન માળખું પૂર્ણ કરવા સૂચના આપી છે. સતત ત્રણ દિવસ સુધી નિરીક્ષકોને જિલ્લામાં જઈને રહેવા પણ કહેવાયું છે. જિલ્લા પ્રમુખો માટે 5 દાવેદારોની પેનલ બનાવવામાં આવશે. જિલ્લાના ઉદ્યોગપતિઓ અને જાગૃત નાગરિકોને મળવા પણ સૂચના આપી છે. 

સરકિટ હાઉસમાં કોર કમિટીની મિટીંગ...

રાહુલ ગાંધીએ રાજીવ ગાંધી ભવનમાં નિરીક્ષકો સાથે બેઠક કર્યા બાદ સરકિટ હાઉસમાં સિનિયર નેતાઓ સાથે મિટીંગ કરી હતી. આ મિટિંગમાં શક્તિસિંહ ગોહિલ, અમિત ચાવડા, મધુસૂદન મિસ્ત્રી, સિદ્ધાર્થ પટેલ, હિંમતસિંહ પટેલ, ઈન્દ્રવિજયસિંહ ગોહિલ, બિમલ શાહ, હેતા પરીખ, ગીતાબેન પટેલ, વીરજી ઠુંમર, જગદીશ ઠાકોર, ભરતસિંહ સોલંકી, સોનલબેન પટેલ, ગ્યાસુદીન શેખ,અમીબેન યાજ્ઞિક, હરપાલસિંહ ચુડાસમા સહિતના નેતાઓ સાથે પાયલોટ પ્રોજેક્ટ અંગે ચર્ચા કરી હતી. 

બુધવારે મોડાસાથી સંગઠન સૃજન અભિયાનનો પ્રારંભ...

કોંગ્રેસના સંગઠન સૃજન અભિયાન અંતર્ગત 16 એપ્રિલને બુધવારે અરવલ્લી જિલ્લાના મોડાસામાં રાહુલ ગાંધી કોંગ્રેસના સિનિયર નેતાઓ સાથે બેઠક કરશે. સ્વામિનારાયણ મંદિરમાં યોજાનાર બેઠકમાં સંગઠન સૃજન અભિયાન અંગે માર્ગદર્શન કરી બાદમાં કાર્યકરોને રાહુલ ગાંધી સંબોધન કરશે. 

કોંગ્રેસનું સંગઠન વધારે મજબૂત થશેઃ જગદીશ ઠાકોર

જગદીશ ઠાકોરે કહ્યું કે જિલ્લા પ્રમુખની પસંદગી માટે નિરીક્ષકોની ટીમ 23 એપ્રિલથી 8 મે સુધી જિલ્લાનો પ્રવાસ કરશે. બ્લોક લેવલના કાર્યકરો અને જનતાને મળશે. જિલ્લા પ્રમુખ કોઇ વ્યક્તિનો કે જૂથનો નહી હોચ. સામાજિક સમીકરણ શું છે, ભૌગોલિક પરિસ્થિતિ શું છે એ બધુ નક્કી કરી ચારથી પાંચ નામ AICCને મોકલવામાં આવશે. આ પ્રક્રિયા થવાથી બે, પાંચ, દસ લોકોથી ચાલતી કોંગ્રેસ દોઢસો. બસો, પાંચસો કાર્યકરોથી ચાલતી કોંગ્રેસ બનશે.