અન્નામલાઈના રાજીનામાથી તમિલનાડુમાં રાજકીય ભૂકંપ

તમિલનાડુ ભાજપમાં હલચલ, અન્નામલાઈનું રાજીનામું

તમિલનાડુ ભાજપના પૂર્વ પ્રદેશ પ્રમુખ કે. અન્નામલાઈએ પાર્ટીના રાષ્ટ્રીય નેતૃત્વને પોતાનું રાજીનામું સોંપતા રાજકારણમાં નવી ચર્ચાઓ શરૂ થઈ ગઈ છે. દિલ્હીમાં ભાજપના રાષ્ટ્રીય અધ્યક્ષ નીતિન નવીન સાથેની મુલાકાત દરમિયાન તેમણે રાજીનામું આપી દીધું છે. તેમણે ભાજપના રાષ્ટ્રીય અધ્યક્ષ નીતિન નવીનને 5 પાનાનો ત્યાગપત્ર સોંપ્યો છે. ભાજપ દ્વારા હજુ સુધી તેમના રાજીનામા અંગે કોઈ અંતિમ નિર્ણય લેવામાં આવ્યો નથી.

દિલ્હીની મુલાકાતે વધારી રાજકીય અટકળો

રાજીનામું આપ્યા બાદ અન્નામલાઈએ કેન્દ્રીય ગૃહમંત્રી અમિત શાહ સાથે મુલાકાત કરી હતી. લગભગ અડધા કલાકથી વધુ સમય ચાલેલી આ બેઠકને રાજકીય રીતે અત્યંત મહત્વપૂર્ણ માનવામાં આવી રહી છે. કેટલાક સમયથી પક્ષની અંદર ચાલી રહેલા અસંતોષ અને અન્નામલાઈના ભવિષ્ય અંગે ચાલી રહેલી ચર્ચાઓ વચ્ચે આ મુલાકાતે વધુ ઉત્સુકતા જગાવી છે.

પાર્ટી છોડવાની ઇચ્છા વ્યક્ત કર્યાની ચર્ચા

ભાજપના ટોચના નેતાઓ સાથે થયેલી બેઠક દરમિયાન અન્નામલાઈએ પોતાનો અલગ માર્ગ પસંદ કરવાની ઇચ્છા વ્યક્ત કરી હોવાનું રાજકીય વર્તુળોમાં ચર્ચાઈ રહ્યું છે. બીજી તરફ, પાર્ટી નેતૃત્વ તેમને સંગઠનમાં જાળવી રાખવા માટે પ્રયત્નશીલ હોવાનું પણ કહેવાય છે. સૂત્રો અનુસાર, અન્નામલાઈને હાલ દિલ્હી ન છોડવાની સૂચના આપવામાં આવી છે.

તમિલનાડુના રાજકારણમાં મોટો ઉલટફેર

અન્નામલાઈનું રાજીનામું સ્વીકારવામાં આવશે તો તમિલનાડુ ભાજપ માટે મોટો ફટકો માનવામાં આવશે. છેલ્લા કેટલાક વર્ષોમાં તેઓ રાજ્યમાં ભાજપનો સૌથી પ્રભાવશાળી ચહેરો બનીને ઉભર્યા હતા. રાજકીય નિરીક્ષકોનું માનવું છે કે તેમની વિદાયથી રાજ્યના રાજકારણમાં નવી સમીકરણો સર્જાઈ શકે છે.

અટકળો એવી ચાલી રહી છે કે અન્નામલાઈ પરસ્પર સંમતિથી પાર્ટી છોડવા માંગતા હતા. અહેવાલોમાં એમ પણ કહેવામાં આવ્યું છે કે તેઓ હવે ભાજપમાં ભવિષ્ય જોતા નથી. નૈનાર નાગેન્દ્રન તમિલનાડુ ભાજપના વડા બન્યા પછી અન્નામલાઈ ઓછા સક્રિય જોવા મળ્યા હતા.

અભિનેતા વિજયના ઉદય બાદ બદલાયું રાજકીય ચિત્ર

અન્નામલાઈના નજીકના વર્તુળોનું કહેવું છે કે, અભિનેતા વિજયના રાજકારણમાં પ્રવેશ બાદ તમિલનાડુનું રાજકીય પરિદ્રશ્ય ઝડપથી બદલાઈ રહ્યું છે. યુવા મતદારોમાં વિજયની વધતી લોકપ્રિયતા અને નવા રાજકીય વિકલ્પોની માંગને કારણે પરંપરાગત રાજકીય સમીકરણોમાં ફેરફાર જોવા મળી રહ્યો છે.

પોસ્ટર વોરથી અટકળોને મળ્યો વેગ

તાજેતરમાં કોઈમ્બતુર સહિત અનેક વિસ્તારોમાં અન્નામલાઈના સમર્થકો દ્વારા લગાવવામાં આવેલા વિશાળ પોસ્ટરોએ રાજકીય ચર્ચાઓને વધુ વેગ આપ્યો હતો. "અમારા નેતા, આગળ આવો અને અમને માર્ગદર્શન આપો" જેવા સંદેશા ધરાવતા પોસ્ટરોને કારણે નવા રાજકીય પ્લેટફોર્મ અંગેની અટકળો વધુ મજબૂત બની છે.

‘બે દિવસ રાહ જુઓ’નું નિવેદન ચર્ચામાં

દિલ્હી જતાં પહેલાં મીડિયા સાથેની ટૂંકી વાતચીતમાં અન્નામલાઈએ સીધો જવાબ આપવાને બદલે માત્ર એટલું કહ્યું હતું કે, “બે દિવસ રાહ જુઓ, પછી બધું સ્પષ્ટ થઈ જશે.” તેમના આ નિવેદન પછી રાજકીય વર્તુળોમાં ઉત્સુકતા વધુ વધી ગઈ છે.

IPS અધિકારીથી રાજકીય નેતા સુધીની સફર

ભૂતપૂર્વ IPS અધિકારી અન્નામલાઈ વર્ષ 2020માં ભાજપમાં જોડાયા હતા. ટૂંકા સમયગાળામાં તેમણે તમિલનાડુમાં પાર્ટીને નવી ઓળખ અપાવી હતી. 2021થી 2025 સુધી પ્રદેશ પ્રમુખ તરીકે તેમણે અનેક જન આંદોલનો અને રાજ્યવ્યાપી અભિયાનોનું નેતૃત્વ કર્યું હતું. સોશિયલ મીડિયા અને યુવા વર્ગમાં પણ તેમની સારી લોકપ્રિયતા રહી છે.

ચૂંટણી ન લડતાં ઉઠ્યાં સવાલ

2026ની વિધાનસભા ચૂંટણી દરમિયાન ભાજપના લોકપ્રિય ચહેરાઓમાં સામેલ હોવા છતાં અન્નામલાઈએ ચૂંટણી ન લડવાનો નિર્ણય લીધો હતો. ત્યારથી જ તેમના રાજકીય ભવિષ્ય અંગે અટકળો શરૂ થઈ હતી. તાજેતરમાં શિક્ષણ અને ભાષા નીતિ અંગે કરેલી ટીકાએ પક્ષ સાથેના તેમના સંબંધોને લઈને ચર્ચાઓને વેગ આપ્યો હતો. ધોરણ 9ના વિદ્યાર્થીઓ માટે ત્રણ ભાષાની નીતિ અમલી બનાવવાના કેન્દ્ર સરકારના નિર્ણયની તેમની તાજેતરની ટીકાએ પણ રાજકીય ચર્ચા જગાવી હતી અને પક્ષના નેતૃત્વ સાથેના તેમના સંબંધો વિશે નવી અફવાઓ ફેલાઈ હતી.

આગામી નિર્ણય પર સૌની નજર

હાલ ભાજપનું કેન્દ્રીય નેતૃત્વ અન્નામલાઈને મનાવવાનો પ્રયાસ કરી રહ્યું હોવાનું કહેવાય છે. જોકે તેઓ ભાજપમાં નવી ભૂમિકા સ્વીકારશે કે પછી અલગ રાજકીય માર્ગ પસંદ કરશે તે આગામી દિવસોમાં સ્પષ્ટ થશે. તમિલનાડુ સહિત દેશભરના રાજકીય વર્તુળોની નજર હવે અન્નામલાઈના આગામી નિર્ણય પર ટકેલી છે.