UNGAની બેઠકમાં ભાગ લેવા અમેરિકા નહિ જાય PM

 વડાપ્રધાન નરેન્દ્ર મોદીએ આ વર્ષના અંતમાં યોજાનારી સંયુક્ત રાષ્ટ્ર મહાસભાની બેઠકમાં ભાગ ન લેવાનો મહત્વનો નિર્ણય કર્યો છે. અગાઉ જુલાઈમાં જાહેર થયેલી વક્તાઓની યાદીમાં તેમના નામનો સમાવેશ હતો, પરંતુ સુધારેલી યાદી મુજબ તેમના સ્થાને વિદેશમંત્રી એસ. જયશંકર ભારતનું પ્રતિનિધિત્વ કરશે. આ નિર્ણય ભારતના આંતરરાષ્ટ્રીય રાજદ્વારી સંબંધો માટે એક નવો વળાંક સૂચવે છે.

બેઠકમાં પ્રથમ વક્તા બ્રાઝિલ

સંયુક્ત રાષ્ટ્ર મહાસભાનું 80મું સત્ર 9 સપ્ટેમ્બરથી શરૂ થશે, જે 23થી 29 સપ્ટેમ્બર સુધી ચાલશે. આ બેઠકમાં પ્રથમ વક્તા બ્રાઝિલ હશે અને ત્યારબાદ અમેરિકા મહાસભાને સંબોધશે. અમેરિકન પ્રમુખ ડોનાલ્ડ ટ્રમ્પ 23 સપ્ટેમ્બરે UNGAના પોડિયમ પરથી વૈશ્વિક નેતાઓને સંબોધિત કરશે. પ્રમુખ તરીકેના તેમના બીજા કાર્યકાળમાં ડોનાલ્ડ ટ્રમ્પ પ્રથમ વખત આ સત્રને સંબોધિત કરવાના છે.

બેઠક પર વિશ્વભરના દેશોની નજર

ભારતના વિદેશમંત્રી એસ. જયશંકર 27 સપ્ટેમ્બરે ભારત વતી સત્રને સંબોધિત કરશે. આ અગાઉ, જ્યારે PM મોદીનું નામ યાદીમાં હતું, ત્યારે તેઓ 26 સપ્ટેમ્બરે સંબોધન કરવાના હતા. PM મોદીના આ નિર્ણય પાછળનું ચોક્કસ કારણ સ્પષ્ટ નથી, પરંતુ તે દર્શાવે છે કે, ભારત પોતાના વિદેશમંત્રી દ્વારા પણ આંતરરાષ્ટ્રીય મંચો પર સક્રિય અને મજબૂત ભૂમિકા ભજવવા સક્ષમ છે. આ બેઠક પર વિશ્વભરના દેશોની નજર રહેશે કારણ કે વૈશ્વિક મુદ્દાઓ પર મહત્વની ચર્ચાઓ થવાની છે.