વડોદરામાં તકતી પલટ...શહેર ભાજપમાં ભારે વિવાદ

વડોદરા શહેર ભાજપના નવા કાર્યાલયનું રવિવારે ઉદ્ધાટન થયું હતું પણ હવે વિવાદ સામે આવ્યો છે. નવા નમો કાર્યાલયનું ઉદ્ઘાટન થયાના 24 કલાકમાં જ શહેર ભાજપ પ્રમુખને અનાવરણ કરાયેલી તક્તીને ઉતારી લેવાની ફરજ પડી છે. 

વડોદરા શહેર ભાજપના નવા કાર્યાલયનું ઉદ્ઘાટન થયા બાદ વિવાદ સામે આવ્યો છે.  શહેર ભાજપના નવા કાર્યાલય ખાતે લગાવેલી તકતી વિવાદ થતાં આખરે ઉતારી લેવાઈ છે. હજું તો નવા કાર્યાલયમાં કેન્દ્રિય મંત્રી અને ભાજપ પ્રમુખ સી.આર.પાટીલ, મુખ્યમંત્રી ભૂપેન્દ્ર પટેલ અને ગૃહ રાજ્ય મંત્રી હર્ષ સંઘવીની હાજરીમાં ગઇ કાલે રવિવારે તકતીનું અનાવરણ કરાયું હતું પણ સોમવારે તકતી ઉતારી લેવાઇ છે. પ્રદેશ મોવડી મંડળના આદેશ બાદ આ તક્તી ઉતારી લેવાઇ હોવાનું જાણવા મળે છે. 

રવિવારે જ્યારે નવ નિર્મિત નમો કમલમનું ઉદ્ઘાટન કરાયું ત્યારે અનાવરણ તક્તીમાં વડોદરા શહેર ભાજપમાંથી માત્ર શહેર પ્રમુખ ડો.વિજય શાહનું જ નામ હતું જેથી શહેર ભાજપમાં વિવાદ થયો હતો. આખરે વિવાદ વકરતાં તકતી જ ઉતારી લેવાનો નિર્ણય કરાયો હતો. 
તકતીમાં કેન્દ્રીય મંત્રી સી આર પાટીલ, મુખ્યમંત્રી ભૂપેન્દ્ર પટેલ, ગૃહ મંત્રી હર્ષ સંઘવી અને ડો વિજય શાહના નામ હતા 

આ તકતીમાં  પ્રદેશ મોવડી મંડળ, શહેર પ્રભારી, સાંસદ, ધારાસભ્યોનું નામ ના હોવાથી ભારે નારાજગી વ્યાપી હતી અને આખરે પ્રદેશ મોવડી મંડળના આદેશથી તકતી તાત્કાલિક ઉતારી લેવાઈ છે.કમુરતામાં કાર્યાલય શરૂ કરવાની ઉતાવળ શહેર પ્રમુખ ડો વિજય શાહને ભારે પડી છે.