પૂર્વ કેન્દ્રીય મંત્રી હરીભાઈ ચૌધરીનું પત્તુ કપાયુ

બનાસ ડેરીમાં વર્તમાન ચેરમેન શંકર ચૌધરીનો દબદબો યથાવત છે. ભાજપે શંકર ચૌધરીની પેનલના ઉમેદવારોને મેન્ડેટ આપતાં સ્થાનિક રાજકારણ ગરમાયુ છે. પૂર્વ કેન્દ્રીય મંત્રી હરીભાઈ ચૌધરી અને થરા માર્કેટયાર્ડના પૂર્વ ચેરમેન અણદા પટેલનું પત્તુ કપાયુ છે. ભાજપે મેન્ડેટ જાહેર કર્યા બાદ વડગામ, દાંતીવાડા અને કાંકરેજ બેઠકના ઉમેદવારોએ ફોર્મ પરત ખેંચી લીધા હતા. જ્યારે દાંતા, પાલનપુર બેઠક પર ફોર્મ પરત ખેંચવાની પ્રક્રિયા ચાલુ હોવાનું સૂત્રો દ્વારા જાણવા મળતાં તમામ બેઠકો બિનહરીફ થાય તેવી શક્યતા છે. 

રાજકારણમાં હંમેશા સમય બળવાન હોય છે. બનાસ ડેરીમાં સત્તા મેળવવા એક સમયે શંકર ચૌધરીએ પૂર્વ કેન્દ્રીય મંત્રી હરીભાઈ ચૌધરીની મદદ લેવી પડી હતી. હરીભાઈ ચૌધરીની રણનીતિના કારણે પરથી ભટોળને હરાવીને શંકર ચૌધરી ડેરીના ચેરમેન બન્યા હતા. આજે એ જ શંકર ચૌધરીએ હરીભાઈ ચૌધરીનું પત્તુ કપાવીને પોતાની સત્તા જાળવી રાખવાનો પ્રયાસ કર્યો છે.

બનાસ ડેરીના નિયામક મંડળની ચૂંટણીમાં શંકર ચૌધરીની પેનલ સામે પૂર્વ કેન્દ્રીય મંત્રી હરીભાઈ ચૌધરીએ ચૂંટણી જંગમાં ઝુકાવવાનો નિર્ણય કર્યો હતો. તેના ભાગરૂપે તેમણે પાલનપુર બેઠક ઉપર ઉમેદવારી નોંધાવી હતી. હરીભાઈ ચૌધરીએ પોતાની સાથે ભાજપના જૂના જોગીઓને અલગ અલગ બેઠકો ઉપરથી ઉમેદવારી કરાવી હતી.

બનાસ ડેરીમાં અગાઉ 10 બેઠકો ઉપર શંકર ચૌધરીની પેનલના એકમાત્ર ઉમેદવારો રહેતાં બિનહરીફ જાહેર થયા હતા. જ્યારે 6 બેઠકો ઉપર એક કરતાં વધુ ઉમેદવારો રહ્યા હતા. તેથી ભાજપે 6 બેઠકો ઉપર મેન્ડેટ જાહેર કર્યો હતો. જેમાં પાલનપુર બેઠક ઉપર કેન્દ્રીય મંત્રી હરીભાઈ ચૌધરીના બદલે શંકર ચૌધરીની પેનલના ભરત પટેલને મેન્ડેટ આપ્યો હતો. જ્યારે કાંકરેજ બેઠક ઉપર અણદા પટેલના બદલે બાબુ ચૌધરીને, દાંતીવાડા બેઠક ઉપર વિનોદ ભૂતડીયાના બદલે પરથી ચૌધરીને, વડગામ બેઠક ઉપર કે.પી.ચૌધરીના બદલે ફલજી ચૌધરીને, દાંતા બેઠક ઉપર દિલીપસિંહ બારડના બદલે અમરતજી ઠાકોરને અને ધાનેરા બેઠક ઉપર પૂર્વ ધારાસભ્ય જોઈતા પટેલને મેન્ડેટ આપ્યો હતો.

મેન્ડેટ જાહેર થતાં પાલનપુર, વડગામ, કાંકરેજ, દાંતીવાડા અને ધાનેરા બેઠકના સામાવાળા ઉમેદવારોએ ફોર્મ પરત ખેંચી લીધા હતા. જેના કારણે ડેરીના નિયામક મંડળની 16 બેઠકો પૈકી 15 બેઠકો બિનહરીફ જાહેર થઈ છે. જ્યારે દાંતા બેઠક ઉપર દિલીપસિંહ બારડે ઉમેદવારી પરત નહી ખેંચતાં આગામી 11 ઓક્ટોબરના રોજ એક બેઠકની ચૂંટણી યોજાશે.

કોના પત્તા કપાયા
ભાજપે છેલ્લી ઘડીએ મેન્ટેડ જાહેર કર્યા હતા. પાલનપુર બેઠક પર ભાજપે પૂર્વ કેન્દ્રીય મંત્રી હરી ચૌધરીનું પત્તુ કાપી વર્તમાન ડિરેક્ટર ભરત પટેલને મેન્ડેટ આપ્યું છે. વડગામ બેઠક પરથી વર્તમાન ડિરેકટર દિનેશ ભટોળનું પત્તુ કાપી ફ્લજી ચૌધરીનું મેન્ડેટ આપ્યું. દાંતા બેઠક પર વર્તમાન ડિરેકટર દિલીપસિંહ બારડનું પત્તુ કાપી અમરતજી પરમારનું મેન્ડેટ આપ્યું છે. દાંતીવાડા બેઠક પર ભાજપ આગેવાન વિનોદ ભૂતડીયાનું પત્તુ કાપી વર્તમાન ડિરેકટર પરથી ચૌધરીને, ધાનેરા બેઠક પર પૂર્વ ધારાસભ્ય અને વર્તમાન ડિરેકટર જોઈતા પટેલને મેન્ડેટ આપ્યું. કાંકરેજ બેઠક પર વર્તમાન ડિરેકટર અણદા પટેલનું પત્તુ કાપી બાબુ ચૌધરીને ભાજપે મેન્ડેટ આપ્યું.  

હરી ચૌધરી સામે ભરત પટેલે વાંધો ઉઠાવ્યો હતો 
ફોર્મ ચકાસણી દરમિયાન પાલનપુર બેઠક પરથી બનાસ ડેરીની ચૂંટણીમાં ઝંપલાવનાર પૂર્વ કેન્દ્રિય મંત્રી હરી ચૌધરીના ઉમેદવારી ફોર્મ સામે તેમના હરીફ ઉમેદવાર ભરત પટેલે વાંધો રજૂ કર્યો હતો. ભરત ચૌધરીએ ચૂંટણી અધિકારીને લેખિતમાં વાંધો રજૂ કરતા રાજકારણ ગરમાયું હતું. પૂર્વ કેન્દ્રીય મંત્રી હરી ચૌધરીએ પોતાની મંડળીનો ઠરાવ નિયમો અનુસાર ન કર્યો હોવાનો વાંધો રજૂ કર્યો હતો. પરંતુ ગણતરીના કલાકો બાદ આ વાંધો ભરત પટેલે પરત ખેંચી લીધો છે.