ગાંધીનગરમાં PASSના નેતાઓ એક મંચ પર, ચિંતિન શિબિરના બહાને રાજનીતિ?

પાટીદાર અનામત આંદોલનના 10 વર્ષ બાદ ફરીથી PASSના નેતાઓ એક મંચ પર એકઠાં થયા હતા. ચિંતન શિબિરના બહાને ભાજપ અને કોંગ્રેસ સાથે સંકળાયેલા નેતાઓએ ગાંધીનગરમાં ફરીથી સમાજના નામે રાજનીતિ શરૂ કરી છે. બેઠકમાં અનામત આંદોલનનો મુખ્ય ચહેરો હાર્દિક પટેલની સૂચક ગેરહાજરી રહી હતી. પૂર્વ કન્વીનર જયેશ પટેલને આમંત્રણ નહી આપવા મુદ્દે એક વ્યક્તિએ હોબાળો કરતાં મામલો ગરમાયો હતો. પાટીદાર સમાજને અસર કરતાં વિવિધ મુદ્દાઓ અંગે ચર્ચા કરવામાં આવી હોવાનો વરૂણ પટેલે દાવો કર્યો હતો.

વિસાવદર બેઠકની પેટાચૂંટણીમાં ગોપાલ ઈટાલિયાની જીત થતાં પાટીદાર અનામત આંદોલન સાથે સંકળાયેલા નેતાઓમાં ફરીથી સળવળાટ શરૂ થયો છે. પાટીદાર અનામત આંદોલન સાથે સંકળાયેલા નેતાઓએ ગાંધીનગરમાં ચિંતન શિબિરના બહાને બેઠક બોલાવી રાજનીતિ શરૂ કરી છે. ચિંતન શિબિરમાં લલિત કગથરા, લલિત વસોયા, કિરીટ પટેલ, અલ્પેશ કથીરિયા, મનોજ પનારા, દિનેશ બાંભણિયા, રેશ્મા પટેલ, ગીતા પટેલ, ધાર્મિક માલવિયા, ચિરાગ પટેલ સહિતના નેતાઓ જોડાયા હતા.

પાટીદાર સમાજના નામે આંદોલન કરી રાજકારણમાં જોડાયેલા હાર્દિક પટેલ અને ગોપાલ ઈટાલિયા ગેરહાજર રહ્યા હતા. PASS ના નામે રાજનીતિ કર્યા બાદ હાર્દિક પટેલ કોંગ્રેસમાં જોડાયા હતા. બાદમાં આંદોલન કર્યુ હતુ તેવા ભાજપમાં જોડાઈને હાર્દિક પટેલ ધારાસભ્ય બની ગયા છે. ચિંતન શિબિરમાં હાર્દિક પટેલને આમંત્રણ આપ્યુ હતુ કે કેમ તે પણ ચર્ચાનો વિષય બન્યો છે.

બેઠક પૂર્ણ થયા બાદ વરૂણ પટેલે જણાવ્યુ હતું કે, સમાજ જીવનમાં જેનો જન્મ થયો તેવા લોકો 10 વર્ષ પછી ચિંતન શિબિરમાં જોડાયા હતા. બેઠકમાં જન સમર્થનના કાર્યક્રમ અંગે ચર્ચા કરવામાં આવી હતી. લોકો સુધી અવાજ પહોંચે તે માટે કામ કરવામાં આવશે. શિક્ષિત, વિકસિત સમાજનો મહત્વનો પ્રશ્ન છે. ભાગેડું લગ્નના નામે મોટું રેકેટ ચાલે છે. તે અંગે સરકારમાં રજૂઆત કરવામાં આવશે.

લગ્નની નોંધણી સ્થાનિક કક્ષાએ કરવામાં આવે, માતા પિતાની સંમતિ લેવામાં આવે તેવો કાયદો બને. સમાજના યુવાનો માટે ચિંતાનો વિષય છે ઓનલાઇન ગેમિંગ. વ્યાજે પૈસા આપવા, જમીન પડાવી લેવા કિસ્સા બની રહ્યા છે. સરકાર ઓનલાઈન ગેમિંગ ઉપર પ્રતિબંધ મૂકી કડક પગલાં લે તેવી અમારી માંગ છે. ગોંડલમાં લોકો ડરીને જીવી રહ્યા છે. ગોંડલમાં સામાજીક સુરક્ષા માટે સરકાર કાર્યવાહી કરે. ગોંડલમાં લોકો ભયના વાતાવરણમાં જીવી રહ્યાં છે.

તેમણે ઉમેર્યુ કે, ઓબીસી સમાજને લાભ મળે છે તેવી રીતે આર્થિક ધોરણે બિન અનામત વર્ગના લોકોને ચૂંટણીમાં પણ ઓબીસી સમકક્ષ લાભ મળે. પાટીદાર સમાજના યુવાનો સામે થયેલા બાકીના કેસ પરત ખેંચાય તે માટે અમારી સરકારને રજૂઆત છે.

કરમસદનો સરદારધામ અને યાત્રાધામ તરીકે વિકાસ કરવામાં આવે, યુવા સ્વાવલંબન સ્કીમ અને બિન અનામત આયોગમાં નિમણુકો થતી નથી. લોકોને લાભ મળે તે માટે બજેટ ફાળવી કામ કરે તેવા અધિકારીઓની નિમણુક કરવામાં આવે. પાટીદાર યુવાનો મુખ્યમંત્રી અને ગૃહ મંત્રીને મળીને ચિંતન શિબિરમાં ચર્ચાયેલા મુદ્દાઓ અંગે રજૂઆત કરશે.

બેઠકમાં થયેલા હોબાળા મુદ્દે વરૂણ પટેલે જણાવ્યુ કે, મારા કે કોઈના દીકરાના લગ્ન નહોતા. સમાજના કાર્યક્રમોમાં હંમેશા એક બે તો રીસાતા જ હોય છે. સમાજનું કામ છે. સમાજ અવિરત પ્રવાહ છે. સમાજ માટે લાગણી હોય તે લોકો આવ્યા છે. જેને આવવું હતું તે આવ્યા છે જેમને ન આવવું  હોય તે નથી આવ્યા. ઉલ્લેખનીય છે કે, ચિંતન શિબિરમાં શાંતિલાલ સોજીત્રા નામના વ્યક્તિએ હોબાળો કર્યો હતો. પૂર્વ પાસ કન્વીનર જયેશ પટેલને આમંત્રણ ન આપવા મુદ્દે હોબાળો કરતાં બહાર લઈ જઈ મામલો થાળે પાડ્યો હતો.