પરસોત્તમ સોલંકીનો 'ધોકાવાળી' વાળો કટાક્ષ ચર્ચામાં

સૌરાષ્ટ્રના રાજકારણમાં 'દાદા' તરીકે ઓળખાતા અને કોળી સમાજના કદાવર નેતા પરસોત્તમ સોલંકીએ ફરી એકવાર પોતાના અંદાજમાં નિવેદન આપીને રાજકીય ગરમાવો લાવી દીધો છે. ઉનાના સિમર ગામે આયોજિત સમૂહ લગ્નમાં મંત્રી સોલંકીએ જે રીતે 'ધોકાવાળી' અને 'સમાજની સુરક્ષા'ની વાતો કરી, તેનાથી સ્પષ્ટ થાય છે કે તેઓ રાજકારણ કરતા સમાજ પ્રત્યેની પોતાની વફાદારીને વધુ મહત્વ આપે છે.

ઉના તાલુકાના સિમર ગામે કોળી સમાજ દ્વારા આયોજિત સમૂહ લગ્નોત્સવમાં પરસોત્તમ સોલંકી અને તેમના ભાઈ હીરા સોલંકી ઉપસ્થિત રહ્યા હતા. મંત્રી સોલંકીએ મંચ પરથી પોતાના જૂના 'ધોકાવાળી' નિવેદનનો ઉલ્લેખ કરતા કહ્યું કે, "ઘણીવાર હું જાહેરમાં કહી દઉં છું કે કોઈ ન સમજે તો ધોકાવાળી કરાય. જ્યારે આ વાત મીડિયામાં આવી ત્યારે ટીવીવાળાઓએ ઘણો પ્રચાર કર્યો. મને પૂછ્યું કે તમારે શું કહેવું છે? તો મેં કહી દીધું કે મેં જે કહ્યું છે તે સાચું છે, તમે ના સમજો તો એ તમારો વિષય છે."

તેમણે રાજકારણીઓની પદ્ધતિ પર કટાક્ષ કરતા ઉમેર્યું કે, "ભાષણ તો બધા નેતાઓ કરે છે અને વાતો કરીને ભાગી જાય છે, પણ હું એમાંનો નથી. ચિંતા ન કરતા, હું તમને કોઈ ટેન્શન નહીં આપું, પણ જો કોઈ તમને ધોકા મારે તો યાદ રાખજો કે તમારી પાછળ પરસોત્તમ સોલંકી ઊભો છે."

કોળી સમાજની મજબૂતી અને રાજકીય ટકોર

પરસોત્તમ સોલંકીએ પોતાની જાતને 'કોળી સમાજનો દીકરો' ગણાવીને ભાવનાત્મક કાર્ડ ખેલ્યું હતું. તેમણે કહ્યું કે, "મને બીજું કંઈ આવડતું નથી, પણ મારા સમાજને જો કોઈ દુઃખી કરતું હશે તો હું તેને નહીં છોડું. મને કોઈ મર્યાદા નડતી નથી, કારણ કે હું રાજકારણ કરતો નથી અને મને તે આવડતું પણ નથી. હું દિલથી કામ કરું છું."

તેમણે સમાજની શક્તિનું ઉદાહરણ આપતા જણાવ્યું કે હાલ ગુજરાત વિધાનસભામાં કોળી સમાજના 18 ધારાસભ્યો છે, પરંતુ તેમની ઈચ્છા છે કે આ સંખ્યા હજુ વધે અને સમાજ વધુ મજબૂત બને. તેમણે સ્પષ્ટ કર્યું કે તેઓ સરકાર પાસે કશું માંગતા નથી, પરંતુ સમાજ પર અત્યાચાર થશે તો સૌથી પહેલા તેઓ રક્ષણ આપવા આવશે.

હીરા સોલંકીનો શાયરાના અંદાજ

પરસોત્તમ સોલંકીના ભાઈ અને રાજુલાના ધારાસભ્ય હીરા સોલંકીએ પણ મંચ પરથી એક શાયરી દ્વારા વિરોધીઓને જવાબ આપ્યો હતો. તેમણે કહ્યું, "તેરે દિન અચ્છે હૈ તો મુજસે કિનારા કરલે, હમ તો બુરે લોગ હૈ બુરે વક્ત મેં કામ આતે હૈ." તેમણે પણ ટકોર કરી હતી કે જેને જે સમજવું હોય તે સમજે, પણ જ્યારે સમાજ પર ખરાબ સમય આવશે ત્યારે આ બંને ભાઈઓ ઢાલ બનીને ઊભા રહેશે.

પરસોત્તમ સોલંકીનું રાજકીય કદ અને પ્રભુત્વ

સૌરાષ્ટ્રના દરિયાકાંઠાના વિસ્તારોમાં પરસોત્તમ સોલંકીનું વર્ચસ્વ અકબંધ છે. તેમની રાજકીય સફર પર એક નજર કરીએ:

પહેલી જીત 1998માં ઘોઘા બેઠક પરથી પ્રથમવાર ધારાસભ્ય બન્યા. સતત વિજય 2002, 2007, 2012, 2017 અને 2022 (કુલ 6 વખત ધારાસભ્ય). મંત્રી પદ 2007થી અત્યાર સુધી સતત મંત્રીમંડળમાં સ્થાન. મુખ્યમંત્રીઓ સાથે કામ મોદી, આનંદીબેન, રૂપાણી અને ભૂપેન્દ્ર પટેલ - તમામની કેબિનેટમાં સ્થાન.

રાજકીય પકડ: ભાવનગર, અમરેલી અને સૌરાષ્ટ્રના દરિયાકાંઠાના પટ્ટામાં કોળી સમાજના મતો પર તેમની અસાધારણ પકડ છે. તેઓ માત્ર એક નેતા જ નહીં પણ કોળી સમાજના 'સતવારા' તરીકે ઓળખાય છે. જોકે, તેમના કાર્યકાળ દરમિયાન 2008માં ફિશરીઝ કૌભાંડને લઈને તેમના પર કેટલાક આક્ષેપો પણ લાગ્યા હતા, જેનો કેસ ગાંધીનગરની સ્પેશિયલ કોર્ટમાં ચાલી રહ્યો છે.

પરસોત્તમ સોલંકીનું આ નિવેદન ફરી સાબિત કરે છે કે તેઓ ભલે ભાજપ સરકારનો ભાગ હોય, પરંતુ તેમની પ્રાથમિકતા હંમેશા તેમનો સમાજ રહ્યો છે. ધોકાવાળી વાત હોય કે હીરા સોલંકીની શાયરી, આ બંને ભાઈઓએ કોળી સમાજના મતદારોને એક સ્પષ્ટ સંદેશ આપ્યો છે કે તેઓ હંમેશા તેમની પડખે છે. આ આક્રમક અંદાજ આગામી સમયમાં સૌરાષ્ટ્રના રાજકારણ પર કેવી અસર કરે છે તે જોવું રહ્યું.