સ્થાનિક સ્વરાજની સંસ્થાઓની ચૂંટણીમાં અન્ય પક્ષ સાથે ગઠબંધન નહીઃ શક્તિસિંહ ગોહિલ

ગુજરાતમાં સ્થાનિક સ્વરાજની સંસ્થાઓની ચૂંટણીની જાહેર થતાં ભાજપ અને કોંગ્રેસે તૈયારીઓ શરૂ કરી દીધી છે. ચૂંટણીની તૈયારીઓના ભાગરૂપે કોંગ્રેસ પ્રભારી મુકુલ વાસનિકે પોલિટિકલ અફેર્સની બેઠક કરી હતી. બેઠક પહેલા પ્રદેશ કોંગ્રેસ પ્રમુખ શક્તિસિંહ ગોહિલે કહ્યુ હતુ કે, કોઇ પાર્ટીનો ગઠબંધન અંગે પ્રસ્તાવ આવ્યો નથી. સ્થાનિક સંગઠનની માગ મુજબ ગઠબંધન કરીશું. રાજ્ય કક્ષાએ ગઠબંધન અંગે હાલમાં કોઇ ચર્ચા થઈ નથી.

રાજ્યમાં સ્થાનિક સ્વરાજની સંસ્થાઓની ચૂંટણીને લઈ કોંગ્રેસ પક્ષની પોલિટિકલ અફેર્સની બેઠક યોજાઈ હતી. પ્રભારી મુકુલ વાસનિકની અધ્યક્ષતામાં યોજાયેલી બેઠકમાં પ્રદેશ પ્રમુખ શક્તિસિંહ ગોહિલ સહિત વરિષ્ઠ નેતાઓ જોડાયા હતા. બેઠકમાં ઉમેદવાર પસંદગી, ગઠબંધન અને રણનીતિ અંગે ચર્ચા કરવામાં આવી હતી. બેઠક પહેલાં કોંગ્રેસ પ્રમુખ શક્તિસિંહ ગોહિલે ગઠબંધન અંગે નિવેદન આપ્યુ હતુ. કોઈપણ પાર્ટીનો રાજ્યસ્તરે ગઠબંધન અંગે પ્રસ્તાવ આવ્યો નથી. સ્થાનિક સંગઠનની માંગ મુજબ ગઠબંધન અંગે ચર્ચા કરીશું. મજબૂતીથી ચૂંટણી લડે એવા ઉમેદવારોની કોંગ્રેસ પસંદગી કરશે.ચૂંટણી અંગે પોલિટિકલ અફેર્સ કમિટીની બેઠકમાં ચર્ચા કરાશે.

ભાજપ પર પ્રહાર કરતાં કહ્યુ કે, લોકશાહીમાં લોકોને પ્રતિનિધિ પસંદ કરવાનો અધિકાર હોવા છતાં સ્થાનિક સ્વરાજની સંસ્થાઓમાં બે વર્ષ સુધી ભાજપના વહીવટદારો રહ્યા. સતત મતો મળવાને કારણે ભાજપને અહંકાર આવી ગયો છે. રાજ્યમાં લોકોના ઘર અને ભ્રષ્ટાચારના બ્રિજ તૂટી રહ્યા છે. નાના ગુનેગારોના વરઘોડા નીકળે છે અને મોટા ગુનેગારો સામે કાર્યવાહી થતી નથી. રાજ્યમાં કાયદાનું શાસન જરૂરી છે. ચૂંટણીપંચ ભય અને પક્ષપાત વગર ચૂંટણી કરાવે એ જરૂરી છે. રાજ્યમાં કાયદો વ્યવસ્થા પડી ભાંગી છે. કાયદો સૌ માટે સમાન હોવો જોઈએ. મોટા કૌભાંડીને કંઈ નહીં પરંતુ નાના ગુનેગારોના ટાંટિયા તોડી નખાય છે.

કોંગ્રેસ પ્રભારી મુકુલ વાસનિકે જણાવ્યુ કે, ઘણાં સમયથી સ્થાનિક સ્વરાજ્યની તૈયારીઓ ચાલી રહી છે. આ ચૂંટણીમાં કોંગ્રેસ પોતાના સિમ્બોલ પર ચૂંટણી લડશે. સાથી પક્ષો સાથે ગઠબંધનનો નિર્ણય સ્થાનિક નેતાઓ કરશે. ગઠબંધન અંગેના નિર્ણયમાં સ્થાનિક નેતાઓની ભૂમિકા મહત્વની રહેશે. જે તે વિસ્તારમાં સ્થાનિક સંગઠનની માંગ મુજબ ગઠબંધનનો નિર્ણય કરશે. લોકસભા, વિધાનસભા અને સ્થાનિક સ્વરાજની સંસ્થાઓની ચૂંટણી અલગ પ્રકારની હોય છે. ગુજરાત કોંગ્રેસનું સંગઠન હમણાં જાહેર નહીં થાય. સ્થાનિક સ્વરાજ્યની ચૂંટણીને કારણે સંગઠન અંગે ચર્ચા નહીં થાય.

ઉલ્લેખનીય છે કે, રાજ્યમાં 16 ફેબ્રુઆરીએ જૂનાગઢ મહાનગરપાલિકા, 66 નગરપાલિકા ઉપરાંત કઠલાલ, કપડવંજ અને ગાંધીનગર તાલુકા પંચાયતની સમાન્ય ચૂંટણી સાથે બોટાદ, વાંકાનેર નગરપાલિકાની મધ્યસત્ર અને સ્થાનિક સ્વરાજની સંસ્થાઓની ખાલી પડેલી મહાનગરપાલિકાની 3, નગરપાલિકાઓની 21, જિલ્લા પંચાયતની 9 અને તાલુકા પંચાયતોની 91 બેઠકોની પેટાચૂંટણી યોજાશે.