નિમ્બાલકર કેસથી મહારાષ્ટ્રની રાજનીતિમાં નવા સમીકરણ

20 વર્ષ જૂના કેસમાં તમામ આરોપીઓને રાહત
મહારાષ્ટ્રના ચર્ચિત પવનરાજે નિમ્બાલકર હત્યા કેસમાં સીબીઆઈની વિશેષ અદાલતે તમામ નવ આરોપીઓને નિર્દોષ જાહેર કર્યા છે. આ નિર્ણય સાથે મહારાષ્ટ્રની રાજનીતિમાં નવા સમીકરણો ઊભા થવાની ચર્ચા શરૂ થઈ છે. કેસમાં મુખ્ય કાવતરાખોર પૂર્વ એનસીપી નેતા પદ્મસિંહ પાટીલને પણ કોર્ટે નિર્દોષ છોડવાનો હુકમ કર્યો છે.

વર્ષ 2006માં કોંગ્રેસના ભૂતપૂર્વ નેતા પવનરાજે નિમ્બાલકર અને તેમના ડ્રાઇવર સમદ કાઝીના હત્યા કેસમાં સીબીઆઈની વિશેષ કોર્ટે નવ આરોપીઓને નિર્દોષ જાહેર કર્યા છે. નિર્દોષ જાહેર કરેલા લોકોમાં ભૂતપૂર્વ NCP નેતા પદ્મસિંહ પાટીલનો પણ સમાવેશ થાય છે. જેમને CBIએ કાવતરાના મુખ્ય આરોપી તરીકે નામ આપ્યા હતા. હાઇ-પ્રોફાઇલ હત્યા કેસમાં ચુકાદા બાદ મહારાષ્ટ્રમાં મોટો રાજકીય વળાંક લઈ શકે છે. જે રાજ્યના રાજકીય સમીકરણને બદલી શકે છે.

ઓમરાજે નિમ્બાલકરના નિર્ણય પર રાજકીય નજર
પવનરાજે નિમ્બાલકરના પુત્ર અને ધારાશિવના લોકસભા સાંસદ ઓમરાજે નિમ્બાલકર હાલ ઉદ્ધવ ઠાકરેની શિવસેના (યુબીટી) સાથે જોડાયેલા છે. કેટલાક સમયથી તેઓ એકનાથ શિંદે જૂથમાં જોડાવાના અહેવાલો મળી રહ્યા હતા. જો કે, આજના ચુકાદા બાદ તેઓ પોતાનો નિર્ણય ફેરવી તોળે તેવી ચર્ચા તેજ બની છે. આ સ્થિતિમાં, ઉદ્ધવ ઠાકરે અને શિંદે જૂથ બંને નિમ્બાલકરના નિર્ણય પર નજીકથી નજર રાખી રહ્યા છે. તેમનો જવાનો ઇનકાર ઉદ્ધવ ઠાકરે માટે જીવનરેખા બનશે. જે શિંદેના ઓપરેશન ટાઇગર માટે મોટો આંચકો બની શકે છે.

ઉદ્ધવ ઠાકરે માટે રાહતના સંકેત
ઓમરાજે નિમ્બાલકર શિંદે જૂથમાં જવાનો નિર્ણય ટાળે છે તો ઉદ્ધવ ઠાકરે માટે મોટી રાજકીય રાહત સાબિત થઈ શકે છે. કારણ કે સંભવિત બળવાખોર સાંસદોના નવા જૂથ માટે જરૂરી સંખ્યાબળ મેળવવું મુશ્કેલ બની શકે તેમ છે.

પરિવારને ન્યાય ન મળ્યાની લાગણી
કોર્ટના નિર્ણય બાદ નિમ્બાલકર પરિવાર નિરાશ જોવા મળ્યો હતો. ઓમરાજે નિમ્બાલકરે સ્પષ્ટ કહ્યું કે તેમના પરિવારને બે દાયકાની રાહ પછી પણ ન્યાય મળ્યો નથી. તેમના પિતાની હત્યાના આરોપીઓને સજા ન મળતા પરિવાર દુઃખી છે.

કાર્યકરો સાથે ચર્ચા બાદ અંતિમ નિર્ણય
ઓમરાજે નિમ્બાલકરે જણાવ્યું કે, તેઓ પોતાના મતવિસ્તાર ધારાશિવમાં કાર્યકરો અને સમર્થકો સાથે ચર્ચા કરશે. ત્યારબાદ ભવિષ્યની રાજકીય દિશા અંગે નિર્ણય લેવામાં આવશે. તેમના નજીકના સહયોગી અને ધારાસભ્ય કૈલાશ પાટીલની માતોશ્રી ખાતે મુલાકાતને પણ મહત્વપૂર્ણ માનવામાં આવી રહી છે.

પદ્મસિંહ પાટીલ અને નિમ્બાલકર પરિવાર વચ્ચે જૂની હરીફાઈ
પવનરાજે નિમ્બાલકર અને પદ્મસિંહ પાટીલ વચ્ચે રાજકીય સ્પર્ધા લાંબા સમયથી ચાલી રહી હતી. વર્ષ 2004ની વિધાનસભા ચૂંટણીમાં બંને આમને-સામને આવ્યા હતા. પદ્મસિંહ પાટીલનો સાંકડા અંતરથી વિજય થયો હતો. ત્યારબાદ 3 જૂન 2006ના રોજ પવનરાજે નિમ્બાલકરની હત્યા થઈ હતી. આ કેસમાં મુખ્ય આરોપી ભૂતપૂર્વ NCP નેતા પદ્મસિંહ પાટીલ હતાં. જે રાજ્યના નાયબ મુખ્યમંત્રી સુનેત્રા પવારના ભાઈ હતા. રાજકીય અને વ્યવસાયિક દુશ્મનાવટને કારણે તેમના પિતરાઈ ભાઈની હત્યાનું કાવતરું ઘડવાનો તેમના પર આરોપ હતો.

3 જૂન, 2006ના રોજ થઈ હતી હત્યા
વર્ષ 2004માં બંને નેતાઓ (પવનરાજે નિમ્બાલકર અને પદ્મસિંહ પાટીલ) વિધાનસભા ચૂંટણીમાં એકબીજાનો સામનો કરી રહ્યા હતા. પદ્મસિંહ પાટીલે નજીકની હરીફાઈમાં પવનરાજે કરતાં 484 મતોથી ચૂંટણી જીતી હતી. પરંતુ બાદમાં 3 જૂન, 2006ના રોજ તેમની હત્યા કરવામાં આવી હતી. ત્યારબાદ  તેમના પુત્ર ઓમરાજે રાજકારણમાં સક્રિય થયા. ઓમરાજેએ વિધાનસભા ચૂંટણીમાં પદ્મસિંહ પાટિલના પુત્ર રાણા જગજીતસિંહ પાટિલને હરાવ્યા અને ધારાસભ્ય બન્યા. 2024ની લોકસભા ચૂંટણીમાં તેમણે ઉદ્ધવ જૂથ વતી ઉસ્માનાબાદ લોકસભા મતવિસ્તારમાંથી ચૂંટણી લડી અને જીત મેળવી. તેઓ હવે શિંદે જૂથમાં ભળી રહેલા સાંસદોમાં સામેલ છે.

રાજકારણમાં સક્રિય બન્યા ઓમરાજે
પિતાના અવસાન બાદ ઓમરાજે નિમ્બાલકર રાજકારણમાં સક્રિય બન્યા હતા. તેમણે પહેલા વિધાનસભાની ચૂંટણીમાં રાણા જગજીતસિંહ પાટીલને હરાવ્યા અને ત્યારબાદ 2024ની લોકસભા ચૂંટણીમાં ઉદ્ધવ ઠાકરેના સમર્થનથી જીત મેળવી હતી. પવનરાજે નિમ્બાલકર અને પદ્મસિંહ પાટીલ નજીકના સંબંધીઓ હતા. બંને પરિવારો વચ્ચે ધીમે ધીમે રાજકીય મતભેદો ઉભા થયા. પવનરાજે 2004માં કોંગ્રેસમાં જોડાયાં, જ્યારે પદ્મસિંહ પાટીલ એનસીપીમાં રહ્યા હતા.

CBI હાઈકોર્ટનો દરવાજો ખટખટાવશે?
સૂત્રોના જણાવ્યા અનુસાર, સીબીઆઈ વિશેષ અદાલતના નિર્ણય સામે હાઈકોર્ટમાં અપીલ કરવાની તૈયારીમાં છે. એવી ચર્ચા પણ ચાલી રહી છે કે, રાજ્યના મુખ્યમંત્રી દેવેન્દ્ર ફડણવીસ અને નાયબ મુખ્યમંત્રી એકનાથ શિંદેએ કેન્દ્રીય ગૃહમંત્રી અમિત શાહ સાથે આ મુદ્દે ચર્ચા કરી હતી. જોકે આ અંગે કોઈ સત્તાવાર પુષ્ટિ કરવામાં આવી નથી.

મહારાષ્ટ્રની રાજનીતિમાં નવા સમીકરણોની શરૂઆત
સમગ્ર ઘટનાક્રમ બાદ હવે સૌની નજર ઓમરાજે નિમ્બાલકરના આગામી નિર્ણય પર છે. તેઓ ઉદ્ધવ ઠાકરે સાથે રહે છે કે શિંદે જૂથમાં જોડાય છે. તેના આધારે મહારાષ્ટ્રના રાજકારણમાં નવા સમીકરણો સર્જાઈ શકે છે.

નિમ્બાલકરના નજીકના ધારાસભ્ય માતોશ્રી પહોંચ્યા
બળવાખોર શિવસેના (UBT) સાંસદ ઓમરાજે નિમ્બાલકરના નજીકના સહયોગી કૈલાશ પાટિલ માતોશ્રી પહોંચ્યા છે. તેઓ પાર્ટીના વડા ઉદ્ધવ ઠાકરેને મળશે. કૈલાશ પાટિલ જિલ્લા પ્રમુખની બેઠકમાં હાજરી આપવા માટે માતોશ્રી પહોંચ્યા હોવાનું કહેવાય છે. પાટિલ UBTના ધારાશિવ જિલ્લાના ધારાસભ્ય છે અને ઓમરાજે નિમ્બાલકરના ખૂબ નજીકના માનવામાં આવે છે. ઉદ્ધવ આજે મરાઠવાડા જિલ્લાના વડાઓ અને ધારાસભ્યો સાથે બેઠક કરી રહ્યા છે.