મહારાષ્ટ્રના NCPના વરિષ્ઠ નેતા અને પૂર્વ ધારાસભ્ય એકનાથ ખડસેના જમાઈ પ્રાંજલ ખેવલકરની ધરપકડ કરવામાં આવતાં રાજકીય ગરમાવો આવ્યો છે. પુણેના ખરાડી વિસ્તારના લક્ઝુરિયસ ફ્લેટમાં રેવ પાર્ટી કરતાં તેઓને ઝડપી લેવામાં આવ્યા છે. પ્રાંજલ ખેવલકર શરદ પવાર જૂથના મહિલા પ્રદેશ પ્રમુખ રોહિણી ખડસેના પતિ છે. રેવ પાર્ટીના કેસમાં ક્રાઇમ બ્રાન્ચે પાડેલા દરોડા દરમિયાન પ્રાંજલ ખેવલકર ઝડપાતાં રાજકીય વર્તુળોમાં ખળભળાટ મચી ગયો છે.

પોલીસના જણાવ્યા અનુસાર, પ્રાંજલ ખેવલકર મોડી રાત્રે ખરાડી વિસ્તારની એક સોસાયટીમાં તેના મિત્ર સાથે પાર્ટી કરી રહ્યા હતા. આ અંગે માહિતી મળતાં ટીમે દરોડો પાડ્યો હતો. દરોડા દરમિયાન દારૂ, ગાંજા અને હુક્કાનો સ્ટોક મળી આવ્યો હતો. આ કાર્યવાહીમાં પ્રાંજલ ખેવલકર સહિત પાંચ પુરુષો અને બે મહિલાઓની અટકાયત કરવામાં આવી છે. રેવ પાર્ટી કેસમાં જમાઈ સામે કાર્યવાહી થતાં રાજકીય વર્તુળોમાં મામલો ભારે ચર્ચાસ્પદ બન્યો છે.

એકનાથ ખડસેના જમાઈ પ્રાંજલ ખેવલકરને પોલીસે ફ્લેટમાં પાર્ટી કરતી વખતે ધરપકડ કરી છે. ખરાડી વિસ્તારની એક સોસાયટીમાં એક ફ્લેટમાં પાર્ટી ચાલી રહી હતી. પ્રાંજલ ખેવલકર, તેમના મિત્ર અને ત્રણ મહિલાઓ સાથે પાર્ટીમાં ભાગ લીધો હતો. પોલીસનો દાવો છે કે આ પાર્ટીમાં દારૂ, હુક્કા અને કેટલીક માત્રામાં ડ્રગ્સનું સેવન કરવામાં આવ્યું હતું. પ્રાંજલ ખેવલકર અને અટકાયતમાં લેવાયેલા અન્ય લોકોને તબીબી તપાસ માટે હોસ્પિટલમાં લઈ ગયા છે. રોહિણી ખડસેએ સમગ્ર મામલાની જાણકારી મળ્યા બાદ ટિપ્પણી કરવાનું કહી કંઈપણ કહેવાનો ઈન્કાર કર્યો છે.

આ મામલે મહારાષ્ટ્ર સરકારના મંત્રી ગિરીશ મહાજને મીડિયા સાથે વાત કરી. પોલીસ આ મામલાની તપાસ કરી રહી છે. ગિરીશ મહાજને કહ્યું કે આ અંગેની સંપૂર્ણ માહિતી હજુ સુધી સામે આવી નથી. જોકે, જે માહિતી સામે આવી છે તે મુજબ, એકનાથ ખડસેના જમાઈ પ્રાંજલ ખેવલકર રેવ પાર્ટીમાં હતા. મહાજને આરોપ લગાવ્યો હતો કે તેઓ માત્ર સામેલ જ નહોતા પરંતુ પાર્ટીનું આયોજન પણ કરતા હતા. તેમના આરોપોને કારણે મામલો વધુ ગંભીર બની ગયો છે.

July 27, 2025 | 15:45 IST