મણિપુરના મુખ્યમંત્રી એન.બિરેનસિંહે આપ્યુ રાજીનામુઃ નવા મુખ્યમંત્રી અંગે થશે નિર્ણય

મણિપુરના મુખ્યમંત્રી એન.બિરેનસિંહે રવિવારે સાંજે રાજ્યપાલને પોતાનું રાજીનામું સુપરત કરી દીધુ છે. તેના કારણે નવા મુખ્યમંત્રીની નિમણૂક અંગેનો નિર્ણય એક કે બે દિવસમાં લેવામાં આવશે. રાજ્યમાં 21 મહિનાથી ચાલી રહેલી હિંસાને કારણે બિરેનસિંહ ભારે દબાણમાં હતા. આ મુદ્દે વિપક્ષોએ સતત એનડીએ પર સવાલ ઉઠાવ્યા હતા.

સૂત્રોના જણાવ્યા અનુસાર, રાજ્યપાલે તેમને કાર્યકારી મુખ્યમંત્રી તરીકેનો કાર્યભાર સંભાળવા વિનંતી કરી છે. મણિપુર ચૂંટણીમાં ભાજપની જીત બાદ બિરેનસિંહે કેન્દ્રીય નેતૃત્વને આશ્ચર્યચકિત કરી દીધું હતું.

એક મહિના પહેલાં મણિપુરના મુખ્યમંત્રીએ રાજ્યમાં થયેલી હિંસા અને જાનહાનિ માટે માફી માંગી હતી. તેમણે કહ્યું હતું કે, "માફ કરશો, આખું વર્ષ ખૂબ જ દુર્ભાગ્યપૂર્ણ રહ્યું છે. ૩ મે, ૨૦૨૩ થી આજદિન સુધી જે કંઈ બન્યું તેના માટે હું રાજ્યના લોકોની માફી માંગુ છું."

"ઘણા લોકોએ પોતાના પ્રિયજનો ગુમાવ્યા છે. ઘણાને પોતાના ઘર છોડવા પડ્યા. તેનો મને અફસોસ છે અને હું માફી માંગુ છું," બીરેન સિંહે સચિવાલયમાં મીડિયા સાથે વાત કરતા ઉપરોક્ત નિવેદન કહ્યું હતુ.

ઉલ્લેખનીય છે કે, મણિપુરમાં ૩ મે ૨૦૨૩ થી કુકી અને મેઈતેઈ સમુદાયો વચ્ચે હિંસા ચાલી રહી હતી. અત્યાર સુધીમાં 600 થી વધુ દિવસ વીતી ગયા છે. બિરેનસિંહે જણાવ્યું હતું કે મે 2023 થી ઓક્ટોબર 2023 સુધીમાં 408 ગોળીબારની ઘટનાઓ નોંધાઈ હતી. જ્યારે નવેમ્બર 2023 થી એપ્રિલ 2024 સુધીમાં 345 ઘટનાઓ બની હતી. મે 2024 થી અત્યાર સુધીમાં 112 ઘટનાઓ નોંધાઈ છે. જોકે, ગત મહિનાથી રાજ્યમાં શાંતિ છે. હિંસાની કોઈ નવી ઘટના બની નથી અને સરકારી કચેરીઓ અને શાળાઓ સામાન્ય રીતે કાર્યરત છે.