મમતા બેનરજીને મોટો રાજકીય ઝટકો!

TMC West Bengal: પશ્ચિમ બંગાળની રાજનીતિમાં ફરી એકવાર મોટો રાજકીય ભૂકંપ આવ્યો છે.તૃણમૂલ કોંગ્રેસ (TMC)ના પશ્ચિમ બંગાળ એકમના પ્રમુખ ચંદ્રિમા ભટ્ટાચાર્યએ પક્ષના તમામ પદોથી રાજીનામું આપી દીધું છે.આ ઘટનાને મમતા બેનરજી માટે મોટા રાજકીય પડકાર તરીકે જોવામાં આવી રહી છે.પશ્ચિમ બંગાળના મુખ્યમંત્રી મમતા બેનરજીને વિધાનસભા ચૂંટણી હાર્યા બાદથી એક પછી એક મોટા ઝટકા લાગી રહ્યા છે. આ શ્રેણીમાં જ આજે તેમના સૌથી વિશ્વસનીય નેતા અને તૃણમૂલ કોંગ્રેસના પ્રદેશ અધ્યક્ષ ચંદ્રિમા ભટ્ટાચાર્યએ પણ હવે તેમનો સાથ છોડી દીધો છે.

TMCમાં આંતરિક અસંતોષ ફરી સપાટી પર
પશ્ચિમ બંગાળ વિધાનસભા ચૂંટણી બાદ TMCમાં આંતરિક મતભેદો સતત સામે આવી રહ્યા છે. કેટલાક નેતાઓ દ્વારા પક્ષના નેતૃત્વ, સંગઠન અને નિર્ણયો અંગે ખુલ્લેઆમ અસંતોષ વ્યક્ત કરવામાં આવ્યો છે. આવા સમયે પશ્ચિમ બંગાળ TMCના પ્રમુખ ચંદ્રિમા ભટ્ટાચાર્યનું તમામ પક્ષ પદોથી રાજીનામું પક્ષ માટે મોટો ઝટકો માનવામાં આવી રહ્યું છે.

તમામ મહત્ત્વના પદો પરથી રાજીનામું
માહિતી અનુસાર ચંદ્રિમા ભટ્ટાચાર્યએ પ્રદેશ અધ્યક્ષ પદની સાથે પાર્ટીના તમામ મહત્ત્વના હોદ્દા પણ છોડી દીધા છે. આ મામલે તેમણે મમતા બેનરજીએ પત્ર લખી દીધો છે.તેમાં પાર્ટીની સાઈનિંગ ઓથોરિટીનો હોદ્દો પણ છોડવાની જાહેરાત કરી છે.

તૃણમૂલ કોંગ્રેસનો મહત્ત્વનો ચહેરો ગણાતા
ચંદ્રિમા ભટ્ટાચાર્ય લાંબા સમયથી તૃણમૂલ કોંગ્રેસનો એક મજબૂત ચહેરો ગણાતા હતા. સરકારથી લઇને સંગઠનમાં પણ તેમની મજબૂત પકડ હતી.હાલ આ મામલે ટીએમસી તરફથી કે પછી મમતા બેનરજી તરફથી કોઈ સત્તાવાર પ્રતિક્રિયા સામે આવી નથી પરંતુ આ ઘટનાએ બંગાળના રાજકારણનો પારો ગરમાવ્યો છે.

કોણ છે ચંદ્રિમા ભટ્ટાચાર્ય?
ચંદ્રિમા ભટ્ટાચાર્ય લાંબા સમયથી તૃણમૂલ કોંગ્રેસ સાથે જોડાયેલા વરિષ્ઠ નેતા છે. તેઓ પશ્ચિમ બંગાળ સરકારમાં પણ મહત્વની જવાબદારીઓ સંભાળી ચૂક્યા છે અને પક્ષના સંગઠનને મજબૂત બનાવવામાં તેમની ભૂમિકા મહત્વપૂર્ણ રહી છે.તાજેતરમાં તેઓ પશ્ચિમ બંગાળ TMCના પ્રમુખ તરીકે કાર્યરત હતા.ચંદ્રિમા ભટ્ટાચાર્ય પશ્ચિમ બંગાળના ભૂતપૂર્વ મંત્રી છે અને લાંબા સમયથી મમતા બેનર્જીના નજીકના સહાયકોમાંના એક માનવામાં આવે છે.તેમણે મમતા બેનર્જીની આગેવાની હેઠળની ટીએમસી સરકારમાં નાણા,આરોગ્ય અને પરિવાર કલ્યાણ,જમીન સુધારણા અને શરણાર્થીઓ અને પુનર્વસન રાજ્યમંત્રી તરીકે સેવા આપી છેભટ્ટાચાર્ય પાસે કલકત્તા યુનિવર્સિટીમાંથી કાયદાની ડિગ્રી છે અને 2011ની ચૂંટણી સુધી કાયદાનો અભ્યાસ કર્યો છે.

તેઓ ટીએમસીની ટિકિટ પર દમ દમ ઉત્તર બેઠક પરથી પશ્ચિમ બંગાળ વિધાનસભામાં ચૂંટાયા હતા.તેમના પ્રસ્થાનથી પહેલાથી જ મુશ્કેલીમાં મુકાયેલી મમતા બેનર્જીને વધુ એક ફટકો પડ્યો છે, જેઓ પશ્ચિમ બંગાળ વિધાનસભા અને સંસદ બંનેમાં વરિષ્ઠ નેતાઓના રાજીનામા અને ત્યાગને કારણે અસ્તિત્વના સંકટનો સામનો કરી રહ્યા છે. વિધાનસભા ચૂંટણીમાં ભાજપને મળેલી કારમી હાર બાદ,પાર્ટીના મોટાભાગના ધારાસભ્યોએ મુખ્યમંત્રી મમતા બેનર્જી અને તેમના ભત્રીજા અભિષેક બેનર્જીના નેતૃત્વથી પોતાને દૂર કરી દીધા છે.

રાજીનામામાં શું કહેવામાં આવ્યું?
ચંદ્રિમા ભટ્ટાચાર્યએ પોતાના રાજીનામા પત્રમાં જણાવ્યું કે હું આજથી ઓલ ઈન્ડિયા તૃણમૂલ કોંગ્રેસના રાજ્ય પ્રમુખ પદ પરથી રાજીનામું આપું છું,હું હાલમાં મારા દ્વારા સંભાળવામાં આવતા અન્ય તમામ પદો પરથી પણ રાજીનામું આપું છું.તેમણે વધુમાં જણાવ્યું હતું કે કૃપા કરીને નોંધ લો કે હું ઓલ ઈન્ડિયા તૃણમૂલ કોંગ્રેસ અને તેની સાથે સંકળાયેલા સંગઠનોના વિવિધ બેંકોમાં રહેલા ખાતાઓ માટે અધિકૃત સહીકર્તા તરીકે મારું નામ પાછું ખેંચી રહી છું.હું ભારતના ચૂંટણી પંચ સમક્ષ તમારા અધિકૃત વ્યક્તિ તરીકે મારું નામ પણ પાછું ખેંચી રહી છું.

શું મમતા બેનરજી માટે આ મોટો પડકાર?
રાજકીય વિશ્લેષકોનું માનવું છે કે રાજ્ય પ્રમુખનું રાજીનામું કોઈપણ પક્ષ માટે ગંભીર સંકેત હોઈ શકે છે. જોકે તેની રાજકીય અસર કેટલી થશે તે આગામી દિવસોમાં સ્પષ્ટ થશે.તાજેતરના મહિનાઓમાં કેટલાક અન્ય TMC નેતાઓએ પણ પક્ષના વિવિધ પદો છોડ્યા છે અથવા અસંતોષ વ્યક્ત કર્યો છે. કેટલાક નેતાઓએ પક્ષમાં ભ્રષ્ટાચાર, સંગઠનાત્મક કાર્યશૈલી અને આંતરિક વ્યવહાર અંગે સવાલો ઉઠાવ્યા હતા.