‘સિસ્ટમ સડી ગઈ છે....’, ભાજપના પૂર્વ મંત્રીનો પોતાની જ સરકાર સામે બળાપો

Jawahar Chavda BJP Gujarat Government Criticism: ગુજરાતના રાજકારણમાં બેરોજગારીનો મુદ્દો ફરી એકવાર ગરમાયો છે. ભાજપના પૂર્વ કેબિનેટ મંત્રી જવાહર ચાવડાએ યુવાનોના રોજગાર અને બેરોજગારીના પ્રશ્નને લઈને પોતાની જ ભાજપ સરકારની કામગીરી સામે ગંભીર સવાલો ઉઠાવ્યા છે. ચાવડાએ રાજ્યની વહીવટી વ્યવસ્થાને ‘ડાફે ચડેલી અને સડેલી સિસ્ટમ’ ગણાવીને આ સિસ્ટમ બદલવાની જરૂરિયાત વ્યક્ત કરી છે. તેમના આ નિવેદનથી ગુજરાતના રાજકારણમાં નવી ચર્ચા શરૂ થઈ છે.

 

“ હવે સાથે મળીને સીસ્ટમ ને બદલીશું “ pic.twitter.com/vaii0t9qUv

— Jawahar Chavda (@jawaharpchavda) October 2, 2026

 

મુખ્યમંત્રીને પત્ર લખ્યો, જવાબ ન મળ્યાનો દાવો
જવાહર ચાવડાના જણાવ્યા મુજબ છેલ્લા દોઢ વર્ષથી તેઓ ગુજરાતના અલગ અલગ વિસ્તારોમાં ફરી રહ્યા છે અને ગામડે ગામડે યુવાનો સાથે મુલાકાત કરી રહ્યા છે. આ જનસંપર્ક દરમિયાન બેરોજગાર યુવાનોની સમસ્યાઓ, રોજગારની તકો અને સરકારી વ્યવસ્થાને લઈને ભારે નિરાશા અને આક્રોશ જોવા મળ્યો હોવાનો ચાવડાએ દાવો કર્યો છે. યુવાનોના આ પ્રશ્નોને લઈને તેમણે મુખ્યમંત્રીને પત્ર લખ્યો હતો. ચાવડાના જણાવ્યા પ્રમાણે, બેરોજગારી અને વ્યવસ્થાની સમસ્યા અંગે ચર્ચા કરવા માટે તેમણે મુખ્યમંત્રી પાસે મુલાકાત માટે સમય માંગ્યો હતો. જોકે, તેમના દાવા મુજબ પત્ર લખ્યા બાદ આજદિન સુધી કોઈ પ્રતિભાવ મળ્યો નથી.

‘આ ડાફે ચડેલી અને સડેલી સિસ્ટમને આપણે જ બદલવી પડશે’
જવાહર ચાવડાએ સરકારની કામગીરી અને વહીવટી તંત્ર સામે આક્રોશ વ્યક્ત કરતા કહ્યું કે, ‘બેરોજગારી અને ભૂલભરેલી સિસ્ટમનો ભોગ બનેલા યુવાનોનો આક્રોશ ઉકેલવા માટે મેં મુખ્યમંત્રીને પત્ર લખીને સમય માંગ્યો હતો, પરંતુ આજ દિન સુધી કોઈ પ્રતિભાવ મળ્યો નથી. આટલી મોટી ગંભીર બાબત કદાચ શાસકોના ધ્યાનમાં જ નથી!’ મુખ્યમંત્રી કક્ષાએથી કોઈ ગંભીરતા ન દર્શાવાઈ હોવાનો દાવો કરતાં ચાવડાએ વધુ તીખા શબ્દોમાં કહ્યું, ‘હવે લાગે છે કે આ ડાફે ચડેલી અને સડેલી સિસ્ટમને આપણે જ બદલવી પડશે.’ ચાવડાના આ નિવેદનમાં સરકારની નીતિ કરતાં વહીવટી વ્યવસ્થાને લઈને તેમનો સીધો આક્રોશ જોવા મળે છે. ભાજપના પૂર્વ મંત્રી તરીકે તેમણે પોતાની જ સરકારની કામગીરી સામે જાહેરમાં સવાલ ઉઠાવતા આ મુદ્દો ગુજરાતના રાજકારણમાં ચર્ચાનો વિષય બન્યો છે.

‘યુવાનો નિરાશ છે, પણ નબળા નથી’
ચાવડાએ છેલ્લા દોઢ વર્ષના પોતાના પ્રવાસનો ઉલ્લેખ કરતા કહ્યું કે ગામડે ગામડે યુવાનો સાથે મુલાકાત દરમિયાન તેમને રોજગારને લઈને ભારે નિરાશા અને આક્રોશ જોવા મળ્યો છે. તેમના જણાવ્યા મુજબ યુવાનો પાસે કામ કરવાની ક્ષમતા છે, પરંતુ યોગ્ય તકનો અભાવ છે. યુવાનોને સંબોધતા ચાવડાએ કહ્યું, ‘તમે નિરાશ છો પણ નબળા નથી. તમારી પાસે ક્ષમતા છે પણ આ સરકાર તક આપતી નથી. હવે શાંત બેસવાનો નહીં પણ સિસ્ટમ ઉથલાવી પાડવાનો સમય છે.’ ચાવડાના આ નિવેદનથી બેરોજગારીનો મુદ્દો માત્ર રોજગારની તકો સુધી સીમિત ન રહેતા સરકારની વહીવટી કામગીરી સાથે પણ જોડાયો છે.

‘રોજગાર સહાયતા અભિયાન’ શરૂ
બેરોજગાર યુવાનોના પ્રશ્નોને વાચા આપવા માટે જવાહર ચાવડાએ ‘રોજગાર સહાયતા અભિયાન’ શરૂ કરવાની જાહેરાત કરી છે. આ અભિયાન અંતર્ગત રોજગારને લગતા પ્રશ્નો, યુવાનોની મુશ્કેલીઓ અને સરકારી વ્યવસ્થામાં આવતી અડચણો અંગે રજૂઆત કરવામાં આવશે. ચાવડાના જણાવ્યા મુજબ આ અભિયાન કોઈપણ પ્રકારના ભેદભાવ વગર યુવાનો માટે ખુલ્લું રહેશે. રોજગાર સંબંધિત પ્રશ્નોને એક મંચ પરથી સતત ઉઠાવવાની વાત પણ તેમણે કરી છે. અભિયાન માટે હેલ્પલાઈન શરૂ કરવામાં આવી હોવાની માહિતી પણ સામે આવી છે.

ભાજપના પૂર્વ મંત્રીનું નિવેદન કેમ મહત્વનું?
ગુજરાતમાં લાંબા સમયથી ભાજપ સરકાર સત્તામાં છે. આવી સ્થિતિમાં ભાજપના પૂર્વ કેબિનેટ મંત્રી દ્વારા બેરોજગારી અને વહીવટી તંત્રની કામગીરી અંગે જાહેરમાં સવાલો ઉઠાવવાનું નિવેદન રાજકીય રીતે ચર્ચાસ્પદ બન્યું છે. ચાવડાએ સરકારને સીધો રાજકીય પડકાર આપ્યો છે કે કેમ તે અંગે અલગ અલગ અર્થઘટન થઈ શકે છે, પરંતુ તેમના પોતાના નિવેદનમાં ‘સિસ્ટમ બદલવી પડશે’ અને ‘સિસ્ટમ ઉથલાવી પાડવાનો સમય છે’ જેવા શબ્દો સ્પષ્ટપણે જોવા મળે છે. હવે જોવાનું એ રહેશે કે જવાહર ચાવડાનું ‘રોજગાર સહાયતા અભિયાન’ કેટલું આગળ વધે છે, બેરોજગાર યુવાનોના પ્રશ્નોને લઈને તેઓ આગામી દિવસોમાં સરકાર સામે કેટલો અવાજ ઉઠાવે છે અને તેમના મુખ્યમંત્રીને લખેલા પત્ર અંગે સરકાર તરફથી કોઈ સત્તાવાર જવાબ આવે છે કે નહીં.