સૌરાષ્ટ્રમાં લેઉવા પાટીદાર સમાજના નેતા બનવાની હોડ?

રાજકોટ જિલ્લાના જામ કંડોરણામાં યોજાયેલા સમુહ લગ્નોત્સવમાં ધારાસભ્ય જયેશ રાદડિયાએ કરેલા નિવેદન સામે લેઉવા પાટીદાર સમાજમાં વિરોધ શરૂ થયો છે. સમાજના 2 ટકા ‘ટપોરી’ ઓ હવનમાં હાડકા નાખી રહ્યા હોવાના નિવેદનનો જામ કંડોરણાના પાટીદાર સમાજના આગેવાન ચંદુ સોજીત્રાએ વિરોધ કરી રાદડિયા સામે મોરચો ખોલ્યો છે. સમાજમાં નેતા બનવાની હોડ લાગી હોય તેમ પૂર્વ ધારાસભ્ય લલિત વસોયાએ પણ આ મામલામાં ઝુકાવીને વિવાદનો અંત લાવવા વિનંતી કરી છે.

જામ કંડોરણામાં યોજાયેલા લેઉવા પાટીદાર સમાજના સમુહ લગ્નોત્સવ સામાજીક ઓછા અને રાજકીય વધારે બની ગયા છે. લેઉવા પાટીદાર સમાજના અગ્રણી અને જેતપુરના ધારાસભ્ય જયેશ રાદડિયાએ સમુહ લગ્ન સમારોહના સ્ટેજ પરથી નામ લીધા વગર સમાજના વિરોધીઓ ઉપર નિશાન તાક્યુ હતુ. તેમણે સમાજના 2 ટકા ‘ટપોરી’ ઓ હવનમાં હાડકાં નાખી રહ્યા હોવાનું વિવાદિત નિવેદન કર્યુ હતુ. રાદડિયા પરિવાર ઉપર સોશિયલ મીડિયામાં કોમેન્ટ કરતાં હોવાનો ઉલ્લેખ કરીને કેટલાક લોકો રાજનીતિમાં નહી હોવા છતાં સમાજમાં રાજનીતિ કરી રહ્યા હોવાની ટકોર કરી હતી. જ્યારે રાજનીતિ કરવા માટે રાજકારણમાં આવી જવા ખુલ્લી ચેલેન્જ આપી હતી.

લેઉવા પાટીદાર સમાજના સમુહ લગ્ન સમારોહમાં સ્ટેજ પરથી ધારાસભ્ય જયેશ રાદડિયાએ લેઉવા સમાજના 2 થી 3 ટકા આગેવાનો ટપોરી હોવાનું નિવેદન કર્યું હતું. આ નિવેદન અંગે લેઉવા પટેલ સમાજમાં વિરોધ ઉઠ્યો છે. સોશિયલ મીડિયાના માધ્યમથી રાદડિયાને લોકો સણસણતા જવાબ આપી રહ્યા છે. જામકંડોરણાના મેઘાવડ ગામના પાટીદાર અગ્રણી ચંદુ સોજીત્રાએ કહ્યું હતું કે, જયેશ રાદડિયાના નિવેદનનો ખુલ્લો વિરોધ કરતો વીડિયો બનાવી સોશિયલ મીડિયામાં વાયરલ કર્યો છે. તેમણે સમુહ લગ્નના આયોજનને આવકારી સ્ટેજ પરથી રાજકીય ભાષણ કરવા અને સમાજને બદનામ કરવા બાબતે વાંધો ઉઠાવ્યો છે. સોજીત્રાએ ટપોરીની વ્યાખ્યા આપતા કહ્યું હતું કે, લૂંટ, ચોરી, મારામારી કરતા હોય, બેંકના કૌભાંડ, મગફળીના કૌભાંડ, ખાતરના કૌભાંડ કરતા હોય આ કૌભાંડિયાઓને ટપોરી કહેવાય.  જામકંડોરણામાં થયેલા ખાતર કૌભાંડ, બોર્ડનું સેન્ટર કેન્સલ થવા અને રાજકોટ ડિસ્ટ્રીક્ટ બેન્કમાં આર્થિક વ્યવહાર વગર નોકરી નહી મળવા તેમજ અમરેલીમાં પાટીદાર યુવતી વરઘોડા મામલે એકપણ શબ્દ નહી બોલવાની બાબતને ‘ટપોરીવેડા’ ગણાવ્યા હતા.  

જયેશ રાદડિયાના નિવેદન સામે સોશિયલ મીડિયામાં સમાજના યુવાનો વિરોધ કરતી પોસ્ટ મૂકી રહ્યા છે. સોશિયલ મીડિયામાં રાદડિયાના વિરોધના મામલાએ વધારે તૂલ પકડતાં ધોરાજીના કોંગ્રેસના પૂર્વ ધારાસભ્ય લલિત વસોયાએ વિવાદમાં ઝુકાવ્યુ છે. તેમણે લેઉવા પાટીદાર સમાજના આગેવાનો અને લોકોને આંતરિક વિખવાદ નહી કરવા વિનંતી કરી છે. સોશિયલ મીડિયામાં બંને આગેવાનો વિરુદ્ધ ચાલી રહેલા પોસ્ટ યુદ્ધથી પાટીદાર સમાજની પાઘડી ઉતરી રહી હોવાથી તેને બંધ કરવા અપીલ કરી છે.

સૌરાષ્ટ્રમાં લોકસભા ચૂંટણી સમયે લેઉવા અને કડવા પાટીદાર સમાજનો વિવાદ શરૂ થયો હતો. સહકારી સંસ્થાઓ અને રાજકારણમાં વર્ચસ્વ જમાવવા લેઉવા અને કડવા પાટીદાર સમાજના આગેવાનો વચ્ચે રીતસરની હોડ જામી છે. આગામી દિવસોમાં ભાજપ સંગઠન અને સ્થાનિક સ્વરાજની સંસ્થાઓમાં મહત્વનું પદ મેળવવા માટે સમાજના નામે ટાંટીયા ખેંચ સ્પર્ધા શરૂ થઈ છે. ત્યારે લેઉવા પાટીદાર સમાજમાં જયેશ રાદડિયાનો ‘ટપોરી’ શબ્દનો મામલો વધુ ગરમાય તેવા એંધાણ વર્તાઈ રહ્યા છે.