'નેપાળવાળી' નહી કરીએ તો ગાદી છોડાવીશુઃ કોંગ્રેસ

ગુજરાતના ખેડૂતોના વિવિધ પ્રશ્નો મુદ્દે સરકાર ખેડૂતો સાથે નહી રહે તો નેપાળવાળી કરવા પ્રદેશ કોંગ્રેસ પ્રમુખ અમિત ચાવડાએ ચાબખા માર્યા હતા. અમિત ચાવડાએ સરકારને 2 મહિનાનું અલ્ટિમેટમ આપીને બે મહિનામાં ખેડૂતોની માંગ ન સ્વીકારે તો વિધાનસભા ઘેરાવ કરીને નેપાળવાળી નહી કરીએ તો ગાદી સો ટકા છોડાવીશું તેવી આપી ચીમકી આપી હતી.

બોટાદના હડદડમાં કોંગ્રેસની કૃષક આંદોલન ક્ષેત્રિય મહાપંચાયત અને રાજકોટમાં જન આક્રોશ સભા અંતર્ગત સભા યોજાઈ હતી. જેમાં પ્રદેશ કોંગ્રેસ પ્રભારી મુકુલ વાસનિક, પ્રદેશ પ્રમુખ અમિત ચાવડા, રાજ્યસભા સાંસદ શક્તિસિંહ ગોહિલ, લોકસભા સાંસદ ગેનીબેન ઠાકોર સહિતના હોદ્દેદારો, ખેડૂતો અને કાર્યકરો જોડાયા હતા.

જાહેરસભામાં કોંગ્રેસના આગેવાનોએ ખેડૂતોને પડતી મુશ્કેલીઓ તેમજ ખેડૂતોની સમસ્યામાં સરકાર દ્વારા ખેડૂતોની માંગ મુજબ જરૂરિયાત પૂરી કરવા તેમજ પોષણક્ષમ ભાવ મળે, કમોસમી વરસાદથી થયેલા નુકસાનનું વળતર આપવા, પ્રધાનમંત્રી વીમા યોજના અંતર્ગત સહાય આપવા માંગ કરી હતી.

પ્રદેશ કોંગ્રેસ પ્રમુખ અમિત ચાવડાએ સરકારને ચીમકી આપતાં કહ્યું કે, આગામી બે મહિનામાં સરકાર દ્વારા ખેડૂતોના હિતમાં કામગીરી નહીં કરે તો કોંગ્રેસ દ્વારા ગામે ગામથી લોકો અને ખેડૂતોને સાથે જોડી ગાંધીનગર ખાતે માંગ પૂર્ણ ન થાય ત્યાં સુધી આંદોલન સાથે વિધાનસભા ઘેરાવ કરવામાં આવશે. હવે નેપાળવાળી કરવી પડશે તેવો લોકોમાં આક્રોશ છે તેવો ઉલ્લેખ કરી નેપાળવાળી કરવાની ફરજ પડશે તો નેપાળવાળી કરીશું.

રાજ્યના નાગરિકોની સમસ્યાઓને લઈ અમિત ચાવડાએ સરકાર પર પ્રહાર કરતાં કહ્યું કે, સરકાર લોકોની પીડા નહી સમજે તો ‘નેપાળવાળી’ થતાં પણ વાર નહી લાગે, નેપાળવાળી તો કરતાં કરીશું પણ ગાદી સો ટકા છોડાવી દઈશું.

મંત્રીમંડળના વિસ્તરણને લઈ અમિત ચાવડાએ ભૂપેન્દ્ર પટેલ સરકારને આડેહાથ લીધી હતી. તેમણે કહ્યું કે, સરકારની આખી ટીમ ભ્રષ્ટાચારી હતી તેથી તેને દૂર કરી છે. ટીમને ઘરભેગી કરી, હવે કેપ્ટન ક્યારે ઘરભેગા થશે? બિહાર ચૂંટણી પછી કેપ્ટન રાજીનામું આપશે, કેપ્ટન કહેશે તબિયત સારી નથી, હું રાજીનામું આપું છું તેમ કહીને રાજ્યની ભાજપ સરકારની ભવિષ્યવાણી કરી હતી.

નાયબ મુખ્યમંત્રી હર્ષ સંઘવીને મળેલા પ્રમોશન અને જયેશ રાદડિયાને મંત્રીમંડળમાંથી પડતા મૂકવા અંગે મોટો ખુલાસો કર્યો હતો. ભાજપના નેતાઓને મળતાં પ્રમોશન મુદ્દે અમિત ચાવડાએ આક્ષેપ કર્યો કે, ભાજપમાં જમીન, સમાજ સાથે જોડાયેલાને પ્રમોશન ન મળે, જયેશ રાદડિયા જેવા નેતાને પ્રમોશન ન મળે, પરંતુ જેના શાસનમાં દારૂ, જુગાર વધ્યો હોય તેમને પ્રમોશન મળે, ગુંડાગીરી વધી હોય એવા હર્ષ સંઘવીનું પ્રમોશન થાય તેવો સીધો આક્ષેપ કર્યો હતો.