અમિત શાહે હિન્દી દિવસ પર એવું શું કહ્યું કે ભાષા મુદ્દે ફરી ચર્ચા શરૂ થઈ?

Amit Shah On Hindi Dowas 2026: હિન્દી દિવસ 2026 નિમિત્તે કેન્દ્રીય ગૃહમંત્રી અમિત શાહે દેશવાસીઓને શુભેચ્છા પાઠવી અને ભારતની ભાષાકીય વિવિધતાને દેશની સૌથી મોટી તાકાત ગણાવી. અમિત શાહે કહ્યું કે ભારતમાં બોલાતી વિવિધ ભાષાઓ નબળાઈ નહીં, પરંતુ ભારતની સાંસ્કૃતિક સમૃદ્ધિ અને ‘વિવિધતામાં એકતા’ની ભાવનાનું પ્રતિબિંબ છે.

'હિન્દી અન્ય ભારતીય ભાષાઓની હરીફ નથી'
અમિત શાહે હિન્દી દિવસના સંદેશમાં સ્પષ્ટ કર્યું કે હિન્દી અન્ય ભારતીય ભાષાઓની હરીફ નથી. તેમના મતે, હિન્દીનો હેતુ દેશની વિવિધ ભાષાઓ વચ્ચે સંવાદ વધારવાનો અને રાષ્ટ્રીય એકતાને વધુ મજબૂત કરવાનો છે. દરેક ભારતીય ભાષા પોતાની સાથે અનોખો ઇતિહાસ, લોકપરંપરા, સંસ્કૃતિ અને જીવનને જોવાનો અલગ દ્રષ્ટિકોણ ધરાવે છે.

‘વિશ્વની ભાષાઓ શીખો, પરંતુ માતૃભાષા ન છોડો’
કેન્દ્રીય ગૃહમંત્રી અમિત શાહે યુવાનોને અપીલ કરી કે તેઓ વિશ્વની જેટલી ભાષાઓ શીખી શકે તેટલી શીખે, પરંતુ પોતાની માતૃભાષા ક્યારેય ન છોડે. તેમણે માતાપિતાને પણ બાળકો સાથે તેમની માતૃભાષામાં વાતચીત કરવા અપીલ કરી. અમિત શાહે કહ્યું કે પોતાની ભાષા બોલવામાં કોઈએ હીનભાવ રાખવો જોઈએ નહીં. ભાષા માત્ર સંવાદનું માધ્યમ નથી, પરંતુ તે વ્યક્તિને માતા, માટી, ઇતિહાસ અને સંસ્કૃતિ સાથે જોડે છે.

14 સપ્ટેમ્બર 1949થી હિન્દી દિવસનું મહત્વ
અમિત શાહે જણાવ્યું કે 14 સપ્ટેમ્બર 1949ના રોજ બંધારણ સભાએ હિન્દીને સંઘની સત્તાવાર ભાષા તરીકે સ્વીકારી હતી. આ ઐતિહાસિક નિર્ણયની યાદમાં દર વર્ષે 14 સપ્ટેમ્બરે હિન્દી દિવસ ઉજવવામાં આવે છે. તેમણે વડાપ્રધાન નરેન્દ્ર મોદીના ‘વસાહતી માનસિકતાથી મુક્તિ’ના આહ્વાનનો ઉલ્લેખ કરતાં કહ્યું કે ભારતીય ભાષાઓ આ વિચારને આગળ વધારવામાં મહત્વપૂર્ણ ભૂમિકા ભજવી શકે છે.

‘મારી માતૃભાષા ગુજરાતી છે, હિન્દી મને લોકો સાથે જોડે છે’
અમિત શાહે પોતાની માતૃભાષાનો ઉલ્લેખ કરતાં કહ્યું કે તેમની માતૃભાષા ગુજરાતી છે. જોકે, દેશના અલગ-અલગ વિસ્તારોમાં પ્રવાસ દરમિયાન હિન્દી તેમને સામાન્ય લોકો સાથે સીધો સંવાદ સ્થાપિત કરવામાં મદદ કરે છે. ગૃહમંત્રીએ કહ્યું કે સ્વતંત્રતા પછી હિન્દી સહિત તમામ ભારતીય ભાષાઓએ રાષ્ટ્ર નિર્માણ, વહીવટ, વિકાસ અને જનજાગૃતિમાં મહત્વપૂર્ણ યોગદાન આપ્યું છે.

દયાનંદ સરસ્વતી, ગાંધીજી અને નેતાજીનું ઉદાહરણ
હિન્દીના વિકાસમાં અન્ય ભાષાના લોકોના યોગદાનનો ઉલ્લેખ કરતા અમિત શાહે સ્વામી દયાનંદ સરસ્વતીનું ઉદાહરણ આપ્યું. તેમણે કહ્યું કે ગુજરાતી માતૃભાષા ધરાવતા દયાનંદ સરસ્વતીએ ‘સત્યાર્થ પ્રકાશ’ હિન્દીમાં લખ્યું હતું. તેમણે મહાત્મા ગાંધી અને નેતાજી સુભાષચંદ્ર બોઝના યોગદાનનો પણ ઉલ્લેખ કર્યો. અમિત શાહના જણાવ્યા અનુસાર, ગાંધીજીએ 1918માં દક્ષિણ ભારતમાં હિન્દીના પ્રચાર માટે દક્ષિણ ભારત હિન્દી પ્રચાર સભાની સ્થાપના કરી હતી. નેતાજી સુભાષચંદ્ર બોઝે આઝાદ હિંદ ફોજમાં હિન્દીનો ઉપયોગ કર્યો હતો અને ‘જય હિંદ’ના અભિવાદનને લોકપ્રિય બનાવ્યું હતું. અમિત શાહે કહ્યું કે ભારતીય ભાષાઓનું સન્માન માત્ર ભાષાનો મુદ્દો નથી, પરંતુ દેશની સંસ્કૃતિ, ઇતિહાસ, પરંપરા અને રાષ્ટ્રીય આત્મસન્માન સાથે જોડાયેલો વિષય છે. ભાષાકીય વિવિધતાનું સન્માન ભારતની એકતા અને સાંસ્કૃતિક વારસાને વધુ મજબૂત બનાવે છે.