₹220 કરોડના ફ્લેટ મળ્યા છતાં જૂના ક્વાર્ટર્સ કેમ નથી છોડતા ધારાસભ્યો? 40થી વધુ નામ ચર્ચામાં!

Gandhinagar MLA Quarters Controversy: ગુજરાતના રાજકીય વર્તુળોમાં ધારાસભ્યોના સરકારી આવાસનો મુદ્દો ચર્ચામાં આવ્યો છે. એક સમાચાર પત્રના અહેવાલ મુજબ, ગાંધીનગરમાં ધારાસભ્યો માટે આશરે ₹220 કરોડના ખર્ચે નવા લક્ઝુરિયસ ફ્લેટ તૈયાર કરવામાં આવ્યા અને ફાળવવામાં આવ્યા હોવા છતાં 40થી વધુ ધારાસભ્યોએ જૂના MLA ક્વાર્ટર્સ ખાલી કર્યા નથી. અહેવાલમાં ભાજપ, કોંગ્રેસ, આમ આદમી પાર્ટી (AAP), અપક્ષ અને NCPના ધારાસભ્યો ઉપરાંત ચાર મંત્રી અને વિધાનસભાના ઉપાધ્યક્ષનાં નામનો ઉલ્લેખ કરવામાં આવ્યો છે. આ મુદ્દે સરકારી આવાસની ફાળવણી, જૂનાં ક્વાર્ટર્સના ઉપયોગ અને વહીવટી તંત્રની કાર્યવાહી અંગે સવાલો ઊભા થયા છે.

નવા ફ્લેટમાં આધુનિક સુવિધાઓ, છતાં જૂનાં આવાસનો કબજો?
સમાચાર અહેવાલ મુજબ, નવા લક્ઝુરિયસ ફ્લેટમાં બે માસ્ટર બેડરૂમ, અન્ય રૂમ, લિવિંગ રૂમ, કિચન, ડાઇનિંગ એરિયા, ઓફિસ, વેઇટિંગ રૂમ, AC, ફ્રિજ, LED ટીવી અને ગીઝર જેવી સુવિધાઓ છે. ઉપરાંત ગાર્ડન, કમ્યુનિટી હોલ અને હેલ્થ ક્લબની વ્યવસ્થા પણ કરવામાં આવી છે. આટલી સુવિધાવાળા નવા આવાસ ફાળવાયા બાદ જૂના MLA ક્વાર્ટર્સ ખાલી થવાની અપેક્ષા હતી. જોકે, અહેવાલમાં દાવો કરવામાં આવ્યો છે કે કેટલાક ધારાસભ્યો હજુ પણ જૂના સરકારી આવાસનો કબજો જાળવી રહ્યા છે. અહેવાલમાં જૂના ક્વાર્ટર્સનું ભાડું દરરોજ આશરે ₹1.25 અને નવા ફ્લેટનું માસિક ભાડું આશરે ₹37.50 હોવાનું જણાવાયું છે.

ચાર મંત્રી અને પૂર્ણેશ મોદીનું નામ
અહેવાલમાં જૂનાં MLA ક્વાર્ટર્સ ખાલી ન કરનારાઓમાં શિક્ષણમંત્રી રિવાબા જાડેજા, વનમંત્રી પ્રવીણ માળી, શ્રમ અને રોજગાર મંત્રી કાંતિ અમૃતિયા અને સ્વરૂપજી ઠાકોરનાં નામનો ઉલ્લેખ છે. વિધાનસભાના ઉપાધ્યક્ષ પૂર્ણેશ મોદીનું નામ પણ અહેવાલમાં સામેલ છે.

ભાજપના કયા ધારાસભ્યોનાં નામ અહેવાલમાં છે?
અહેવાલમાં જૂના ક્વાર્ટર્સ ખાલી ન કરનાર ભાજપના ધારાસભ્યોમાં અલ્પેશ ઠાકોર, સી.કે. રાઉલજી, ફતેસિંહ ચૌહાણ, કિરીટસિંહ ડાભી, લવિંગજી સોલંકી, મહેશ ભુરિયા, સરદારસિંહ ચૌધરી, સી.જે. ચાવડા, પબુભા માણેક, ચિરાગ પટેલ, અરુણસિંહ રાણા, લક્ષ્મણસિંહ ઠાકોર, રમેશ કટારા, શંભુનાથ ટુડિયા, રાજેશ ઝાલા, હીરા સોલંકી, મોહન કોંકણી, મહેન્દ્ર ભાભોર અને રિતેશ વસાવાના નામ દર્શાવવામાં આવ્યા છે.

કોંગ્રેસના કયા નેતાઓનાં નામ ચર્ચામાં?
કોંગ્રેસ તરફથી અહેવાલમાં પ્રદેશ પ્રમુખ અમિત ચાવડા, શૈલેષ પરમાર, જિગ્નેશ મેવાણી, કિરીટ પટેલ અને કાંતિ ખરાડીનાં નામનો ઉલ્લેખ કરવામાં આવ્યો છે.

AAP, અપક્ષ અને NCPના ધારાસભ્યોનાં નામ
આમ આદમી પાર્ટી (AAP)ના ધારાસભ્યો તરીકે અહેવાલમાં ચૈતર વસાવા, હેમંત ખવા અને સુધીર વાકાણીનાં નામ આપવામાં આવ્યાં છે. અપક્ષ ધારાસભ્યોમાં ધવલસિંહ ઝાલા અને માવજી દેસાઈનાં નામનો ઉલ્લેખ છે. જ્યારે NCPના ધારાસભ્ય તરીકે કાંધલ જાડેજાનું નામ અહેવાલમાં દર્શાવવામાં આવ્યું છે.

ક્વાર્ટર્સના ઉપયોગ અને ભાડા અંગે પણ સવાલો
અહેવાલમાં એવો દાવો પણ કરવામાં આવ્યો છે કે કેટલાક જૂના ક્વાર્ટર્સનો ઉપયોગ સગા-સંબંધીઓ, સુરક્ષા કર્મચારીઓ અથવા સ્પર્ધાત્મક પરીક્ષાની તૈયારી કરતા વિદ્યાર્થીઓના રહેવા માટે થઈ રહ્યો હોવાની ચર્ચા છે. કેટલાક ક્વાર્ટર્સમાંથી ભાડું વસૂલાતું હોવાની વાતનો પણ અહેવાલમાં ઉલ્લેખ છે. અહેવાલમાં અધિકારીક સૂત્રોના હવાલે જણાવાયું છે કે કેટલાક સરકારી કર્મચારીઓ આવાસ માટે રાહ જોઈ રહ્યા છે અને ક્વાર્ટર્સ ખાલી કરવા નોટિસ આપવામાં આવી હોવા છતાં કેટલીક મિલકતો ખાલી થઈ નથી.

હવે સરકાર શું કાર્યવાહી કરશે?
આ મામલે મુખ્ય સવાલ એ છે કે જૂના MLA ક્વાર્ટર્સ ક્યારે ખાલી કરાવવામાં આવશે, કેટલાં આવાસનો કબજો યથાવત્ છે અને સરકારી નિયમોનું પાલન ન થતું હોય તો વહીવટી તંત્ર શું પગલાં લેશે. સરકારી આવાસની ફાળવણી અને ઉપયોગ અંગે પારદર્શક વિગતો જાહેર થાય તો સમગ્ર મામલાની સ્થિતિ વધુ સ્પષ્ટ થઈ શકે છે.