ક્યાંક BJPનો દબદબો તો ક્યાંક કોંગ્રેસની બાજી! ગુજરાતના APMC પરિણામોએ શું સંકેત આપ્યો?

Gujarat APMC Election Results 2026: ગુજરાતમાં APMC ચૂંટણી પરિણામ 2026 જાહેર થતાં સહકારી ક્ષેત્રનું રાજકારણ ફરી ગરમાયું છે. ધાનેરા, ધોળકા, જૂનાગઢ, ઈડર અને બહુચરાજી APMC ચૂંટણીના પરિણામોમાં ક્યાંક ભાજપ પ્રેરિત પેનલનો દબદબો જોવા મળ્યો છે, તો ક્યાંક કોંગ્રેસ પ્રેરિત પેનલે ભાજપને મોટો ઝટકો આપ્યો છે. ખાસ કરીને ધાનેરા અને ધોળકા APMCના પરિણામોએ ગુજરાતના સહકારી રાજકારણમાં નવી ચર્ચા જગાવી છે.

ધાનેરા APMC ચૂંટણીમાં ભાજપના મેન્ડેટને ઝટકો
બનાસકાંઠાની ધાનેરા APMC ચૂંટણીમાં ભાજપના સત્તાવાર મેન્ડેટથી મેદાનમાં ઉતરેલા ઉમેદવારોને પરાજયનો સામનો કરવો પડ્યો છે. ખેડૂત વિભાગમાં ભાજપના મેન્ડેટ સાથે ચૂંટણી લડનારા પાંચ ઉમેદવારો હારી ગયા છે. આ ઉપરાંત ભાજપના મેન્ડેટથી લડેલા કુલ છ ઉમેદવારોની હાર થઈ હોવાનું સામે આવ્યું છે. ખેડૂત વિભાગમાં સુરેશ ભગવાન ચૌધરી, ડૉ. ધજાભાઈ પટેલ, જોઈતાભાઈ સાકોલીયા, મોઘજીભાઈ ઉકાભાઈ અને મોહનભાઈ ઉકાભાઈ ચૌધરી સહિતના ઉમેદવારોને હાર મળી છે. ધાનેરા APMCનું પરિણામ સ્થાનિક સહકારી રાજકારણમાં ભાજપ માટે મહત્વપૂર્ણ ઝટકા તરીકે જોવામાં આવી રહ્યું છે.

ધોળકા APMCમાં કોંગ્રેસ પ્રેરિત પેનલનો મોટો વિજય
અમદાવાદ જિલ્લાના ધોળકા APMC ચૂંટણી પરિણામમાં કોંગ્રેસ પ્રેરિત ‘વિકાસ પેનલ’એ મોટી જીત મેળવી છે. ખેડૂત વિભાગની તમામ 10 બેઠકો પર કોંગ્રેસ પ્રેરિત પેનલના ઉમેદવારો વિજેતા બન્યા છે. ધોળકા APMCમાં 10 બેઠકો માટે કુલ 30 ઉમેદવારો મેદાનમાં હતા. પરિણામ બાદ ભાજપ પ્રેરિત ‘ખેડૂત સહકાર પેનલ’ને મોટો પરાજય મળ્યો છે. આ જીતને કારણે અમદાવાદ જિલ્લાના સહકારી રાજકારણમાં કોંગ્રેસ માટે મહત્વનો રાજકીય સંદેશ માનવામાં આવી રહ્યો છે.

જૂનાગઢ APMCમાં ભાજપ પ્રેરિત પેનલનો દબદબો
જૂનાગઢ માર્કેટિંગ યાર્ડની ચૂંટણીમાં ભાજપ પ્રેરિત ‘ખેડૂત કલ્યાણ પેનલ’નો ભવ્ય વિજય થયો છે. ખેડૂત વિભાગની 10 બેઠકો માટે ચૂંટણી યોજાઈ હતી, જ્યારે વેપારી વિભાગની 4 અને સહકારી ખરીદ-વેચાણ વિભાગની 2 બેઠકો અગાઉથી બિનહરીફ જાહેર થઈ હતી. પરિણામ બાદ જૂનાગઢ જિલ્લા સહકારી બેંકના ચેરમેન અને પૂર્વ જિલ્લા ભાજપ પ્રમુખ કિરીટ પટેલે આ જીતને ખેડૂતો અને સહકારી ક્ષેત્ર સાથે જોડાયેલા સભાસદોની જીત ગણાવી છે. કિરીટ પટેલના જણાવ્યા મુજબ, ખેડૂત વિભાગના 955 મતદારોમાંથી 914 મતદારોએ મતદાન કર્યું હતું. AAP પ્રેરિત ઉમેદવારોના પ્રદર્શન અંગે પણ તેમણે આકરા પ્રહારો કર્યા હતા. તેમણે આગામી સમયમાં માણાવદર, માળિયા, માંગરોળ, વિસાવદર અને ભેસાણ માર્કેટિંગ યાર્ડની ચૂંટણીને લઈને મોટો રાજકીય પડકાર પણ ફેંક્યો છે.

ઈડર અને બહુચરાજી APMCમાં શું પરિણામ આવ્યું?
સાબરકાંઠાની ઈડર APMC ચૂંટણીમાં ખેડૂત વિભાગની તમામ 10 બેઠકો પર ‘ખેડૂત એકતા પેનલ’નો વિજય થયો છે. જ્યારે વેપારી વિભાગની ચાર બેઠકોમાંથી ભાજપ પ્રેરિત પેનલના ત્રણ ઉમેદવારો વિજેતા બન્યા છે. બીજી તરફ મહેસાણા જિલ્લાની બહુચરાજી APMCમાં ભાજપ સમર્થિત પેનલનો દબદબો જોવા મળ્યો છે. ખેડૂત વિભાગની તમામ 10 બેઠકો પર ભાજપ સમર્થિત ઉમેદવારોનો વિજય થયો છે. વેપારી વિભાગની ચારેય બેઠકો અગાઉથી બિનહરીફ જાહેર થઈ હતી.

APMC ચૂંટણી પરિણામથી સહકારી રાજકારણમાં શું સંકેત?
ગુજરાત APMC ચૂંટણી પરિણામો માત્ર માર્કેટિંગ યાર્ડની ચૂંટણી પૂરતા મર્યાદિત નથી. ખેડૂતો, સહકારી મંડળીઓ અને સ્થાનિક રાજકીય સંગઠનો સાથે APMCનું સીધું જોડાણ હોવાથી તેના પરિણામોને રાજકીય રીતે પણ મહત્વપૂર્ણ માનવામાં આવે છે. ધાનેરામાં ભાજપના મેન્ડેટવાળા ઉમેદવારોની હાર, ધોળકામાં કોંગ્રેસ પ્રેરિત પેનલની તમામ 10 બેઠકો પર જીત અને જૂનાગઢ તથા બહુચરાજીમાં ભાજપ પ્રેરિત પેનલની સફળતાએ ગુજરાતના સહકારી રાજકારણની અલગ-અલગ તસવીર રજૂ કરી છે. હવે આગામી APMC અને માર્કેટિંગ યાર્ડની ચૂંટણીઓમાં ભાજપ, કોંગ્રેસ અને અન્ય રાજકીય પક્ષો વચ્ચેની ટક્કર પર સૌની નજર રહેશે.