ત્રણેય સ્તરે ભાજપનું શાસન છતાં ભાજપના જ ધારાસભ્યનું કામ દોઢ વર્ષ અટક્યું! તો સામાન્ય પ્રજાની રજૂઆતોનું શું? 

AMC Dariapur Darwaja Heritage Restoration Delay: અમદાવાદમાં ઐતિહાસિક સ્મારકોના જતન અને વિકાસને લઈને અમદાવાદ મ્યુનિસિપલ કોર્પોરેશન (AMC)ની કામગીરી સામે સવાલો ઊભા થયા છે. દરિયાપુરના ભાજપના ધારાસભ્ય કૌશિક જૈને દરિયાપુર દરવાજા સહિત ઐતિહાસિક સ્મારકોના જતન અને વિકાસ માટે 12 મે, 2025ના રોજ લેખિત રજૂઆત કરી હતી. હવે આ રજૂઆતના સંદર્ભમાં મ્યુનિસિપલ તંત્ર દ્વારા સ્થળ મુલાકાત લેવામાં આવી છે. એટલે કે રજૂઆત બાદ લાંબા સમય પછી કામગીરી આગળ વધતાં AMCની કાર્યપદ્ધતિ અંગે ચર્ચા શરૂ થઈ છે.

દરિયાપુર દરવાજા માટે 12 મે, 2025ના રોજ રજૂઆત
દરિયાપુર દરવાજો અમદાવાદના ઐતિહાસિક વારસાનો મહત્વનો હિસ્સો છે. આ સ્મારક સહિત આસપાસના ઐતિહાસિક વારસાનું મૂળ સ્વરૂપ જળવાઈ રહે અને જરૂરી વિકાસ કામગીરી થઈ શકે તે માટે ધારાસભ્ય કૌશિક જૈને AMCના વર્લ્ડ હેરિટેજ સિટી ટ્રસ્ટને લેખિત રજૂઆત કરી હતી. રજૂઆત બાદ હવે મ્યુનિસિપલ તંત્ર દ્વારા દરિયાપુર દરવાજાની સ્થળ મુલાકાત કરવામાં આવી છે. નાયબ મ્યુનિસિપલ કમિશનરે સ્થળ પર જઈને ઐતિહાસિક સ્મારકની સ્થિતિ અને જરૂરી કામગીરી અંગે પ્રાથમિક આયોજન કર્યું હોવાનું જાણવા મળ્યું છે. જોકે, દરિયાપુર દરવાજાના વિકાસનું કામ કઈ તારીખથી શરૂ થશે તેની ચોક્કસ સમયમર્યાદા હજુ જાહેર કરવામાં આવી નથી.

ભાજપના ધારાસભ્યની રજૂઆત પર કાર્યવાહી કરવામાં વિલંબ કેમ?
આ મામલે સૌથી મહત્વનો સવાલ કાર્યવાહી કરવામાં લાગેલા સમયને લઈને છે. અમદાવાદ મ્યુનિસિપલ કોર્પોરેશનમાં ભાજપનું શાસન હોવા છતાં ભાજપના જ ધારાસભ્ય દ્વારા કરવામાં આવેલી રજૂઆતના સંદર્ભમાં સ્થળ મુલાકાત લાંબા સમય બાદ થઈ છે. AMC તરફથી ઓનલાઈન સેવાઓ અને ફરિયાદ-રજૂઆતોના ઝડપી નિકાલ અંગે સતત ભાર મૂકવામાં આવે છે. ત્યારે સત્તાધારી પક્ષના ધારાસભ્યની રજૂઆતમાં થયેલા વિલંબને કારણે સામાન્ય નાગરિકોની રજૂઆતો અને જાહેર કામોની કામગીરીની ઝડપ અંગે પણ સવાલો ઉઠી રહ્યા છે.

કૌશિક જૈને AMCની પ્રક્રિયાનો કર્યો બચાવ
ધારાસભ્ય કૌશિક જૈને જોકે મ્યુનિસિપલ તંત્રનો બચાવ કર્યો છે. તેમના જણાવ્યા અનુસાર ઐતિહાસિક સ્મારકો સાથે સંકળાયેલી કામગીરીમાં સામાન્ય વિકાસકામોની સરખામણીએ વધુ પ્રક્રિયા અને મંજૂરીની જરૂર પડે છે. તેમણે જણાવ્યું હતું કે આ પ્રકારના કામ માટે વડોદરા અને ત્યારબાદ દિલ્હી સુધી જરૂરી મંજૂરીઓ લેવાની પ્રક્રિયા હોવાથી સમય લાગ્યો છે.

શાહપુર સ્પોર્ટ્સ કોમ્પલેક્સની રજૂઆત પણ જૂની
કૌશિક જૈને શાહપુરના સ્પોર્ટ્સ કોમ્પલેક્સનો પણ ઉલ્લેખ કર્યો હતો. તેમના જણાવ્યા અનુસાર આ પ્રોજેક્ટ અંગે વર્ષ 2023માં રજૂઆત કરવામાં આવી હતી. શાહપુર દરવાજો નજીક હોવાથી ઐતિહાસિક વારસાને લગતી મંજૂરીઓ અને પ્રક્રિયાને કારણે આ કામમાં પણ સમય લાગ્યો હોવાનું તેમણે જણાવ્યું હતું.

ત્રણેય સ્તરે ભાજપનું શાસન, છતાં વિકાસકામોમાં વિલંબ કેમ?
અમદાવાદ મ્યુનિસિપલ કોર્પોરેશન, ગુજરાત સરકાર અને કેન્દ્ર સરકારમાં ભાજપનું શાસન હોવા છતાં ઐતિહાસિક સ્મારકો અને જાહેર વિકાસકામોની મંજૂરી પ્રક્રિયામાં લાંબો સમય લાગતો હોવાના મુદ્દે રાજકીય ચર્ચા શરૂ થઈ છે. જોકે, મ્યુનિસિપલ તંત્રના જણાવ્યા મુજબ ઐતિહાસિક વારસાને લગતા કામમાં જરૂરી મંજૂરી અને તકનીકી પ્રક્રિયા પૂર્ણ કરવી પડે છે.

હવે દરિયાપુર દરવાજાનું કામ ક્યારે શરૂ થશે?
દરિયાપુર દરવાજાની સ્થળ મુલાકાત અને પ્રાથમિક આયોજન બાદ હવે આગળની પ્રક્રિયા કઈ રીતે થાય છે તેના પર નજર રહેશે. કામ માટે જરૂરી મંજૂરીઓ ક્યારે મળે છે અને વાસ્તવિક વિકાસકામ ક્યારે શરૂ થાય છે તે મહત્વનું રહેશે. દરિયાપુર દરવાજા સહિત અમદાવાદના ઐતિહાસિક સ્મારકોના જતનનો મુદ્દો માત્ર એક વિકાસકામ પૂરતો મર્યાદિત નથી. તે અમદાવાદના ઐતિહાસિક વારસાની જાળવણી સાથે પણ જોડાયેલો છે. તેથી મ્યુનિસિપલ તંત્ર હવે આ કામગીરીને કેટલી ઝડપથી આગળ વધારે છે તે જોવું મહત્વનું રહેશે.