પાદરા APMCમાં ધાબળા પ્રકરણે ભાજપને હરાવ્યું?

વડોદરા જિલ્લામાં ભાજપને મોટો ફટકો પડ્યો છે. પાદરા APMCની ચૂંટણીમાં ભાજપ પ્રેરિત પેનલનો પરાજય થયો છે. ભાજપના નેતા અને બરોડા ડેરીના ચેરમેન દિનુમામા સમર્થિત ખેડૂત સહકાર પેનલના તમામ ઉમેદવારોનો વિજય થયો છે. પ્રદેશ પ્રમુખ બન્યા બાદ જગદીશ વિશ્વકર્મા માટે શરમજનક હાર ગણવામાં આવી રહી છે. પોતે સહકાર મંત્રી રહ્યાં હોવા છતાં પાદરા APMC જીતી શક્યા નથી.

પાદરા ખેતીવાડી ઉત્પન્ન બજાર સમિતિની ચૂંટણી અંતર્ગત 17 ઓક્ટોબરે મતદાન થયું હતું. જ્યારે 18 ઓક્ટોબરે મત ગણતરી થઈ હતી. કુલ 14 બેઠકોની ચૂંટણીમાં વેપારી વિભાગની 3 બેઠકો બિનહરીફ જાહેર થઈ હતી. જેમાં સચિનભાઈ ગાંધી, અજયકુમાર કાછીયા અને નટવરભાઈ ગાંધી બિનહરીફ વિજેતા જાહેર થયા હતા. જ્યારે ખેડૂત વિભાગની 10 બેઠકો માટે ચૂંટણી થઈ હતી. જેમાં ભાજપ પ્રેરિત પેનલ સામે દિનુ મામા સમર્થિત ભીખાભાઈ પટેલ સ્વામી તેમજ પ્રવિણસિંહ સિંધાની ખેડૂત સહકાર પેનલ વચ્ચે જંગ હતો. ભાજપ સામે ભાજપના જ ઉમેદવારોની પેનલ બનતા રાજકીય ગરમાવો આવ્યો હતો.

પાદરા APMCની ચૂંટણીમાં ખેડૂત સહકાર પેનલના તમામ ઉમેદવારોએ જીત મેળવી છે. ખેડૂત સહકાર પેનલને કોંગ્રેસના નેતાઓએ પણ સમર્થન આપ્યું હતું. તેના પરિણામે ખેડૂત સહકાર પેનલના ઉમેદવારો વિજેતા બન્યા હતા. પાદરા APMCના પરિણામોથી રાજકીય સમીકરણો બદલાય તેવા સંકેત મળી રહ્યાં છે. સહકારી ક્ષેત્રમાં ભાજપની પકડ ઢીલી પડી રહી હોય તેમ લાગી રહ્યું છે.

પાદરા ગંભીરા પુલ અકસ્માતનું સ્થળ છે. જ્યાં પુલ તૂટી પડવાથી 22 લોકોના મોત થયા હતા. પાદરા APMC ચૂંટણીમાં ભાજપ પ્રેરિત પેનલના સફાયાથી ખળભળાટ મચી ગયો છે. પાદરાના પૂર્વ ધારાસભ્ય અને બરોડા ડેરીના ચેરમેન દીનુ મામા સમર્થિત તમામ ઉમેદવારો વિજયી બન્યા છે. દીનુ મામાએ ફટાકડા ફોડી તેમજ મીઠાઈ વહેંચી જીતની ઉજવણી કરી હતી. આ ઉજવણીમાં કોંગ્રેસના પૂર્વ ધારાસભ્ય જશપાલ પઢિયાર અને કોંગ્રેસના કાર્યકરો પણ જોડાયા હતા.

દીનુ મામાએ 30 વર્ષથી પાદરા APMC માં પ્રભુત્વ જાળવી રાખ્યું છે. અગાઉ દિનુ મામા સમર્થિત પેનલે સરપંચની ચૂંટણી પણ જીતી હતી. હવે સહકારી ક્ષેત્રમાં પણ તેમણે વર્ચસ્વ જાળવી રાખ્યું છે.  

ધાબળા પ્રકરણના કારણે ભાજપે સત્તા ગુમાવી

પાદરા એપીએમસીમાં  ભાજપનો સફાયો થવાનું કારણ ધાબળા પ્રકરણ છે. થોડા દિવસો પહેલાં એક  ગામની ક્લિનિકમાંથી મધરાતે ધાબળો ઓઢીને બહાર નીકળતા એપીએમસીના પૂર્વ ચેરમેન ભાસ્કર પટેલનો વીડિયો વાયરલ થયો હતો. બનાવ બાદ ભાસ્કર પટેલ અંગે પંથકમાં નકારાત્મક ચર્ચાઓ થઈ હતી. તેમ છતાં ભાજપના ધારાસભ્યના આગ્રહને કારણે જિલ્લા ભાજપ પ્રમુખ સતીષ પ્રજાપતિએ પૂર્વ ચેરમેન ભાસ્કર પટેલના પત્નીને મેન્ડેટ આપ્યો હતો. પાદરા એપીએમસીમાં ભાજપની હાર માટે આ પણ એક કારણ હોવાનું કાર્યકરોમાં ચર્ચાઇ રહ્યું છે. એપીએમસીનું પરિણામ જાહેર થયું ત્યારે કેટલાંક કાર્યકરોએ ધાબળો ઉછાળી વિજયોત્સવ મનાવ્યો હતો.

ભાજપને હરાવનાર કોણ છે દિનુ મામા?

વડોદરા જિલ્લાના સહકારી રાજકારણમાં દિનેશ પટેલ ઉર્ફ દિનુ મામા મજબૂત પ્રભાવ ધરાવે છે. દિનુ મામા લેઉવા પાટીદાર સમાજમાંથી આવે છે. દિનુ મામાએ પહેલી વખત 1998માં પાદરાથી ચૂંટણી લડી હતી. અપક્ષ ઉમેદવાર તરીકે તેઓ ત્રીજા સ્થાને રહ્યા હતા. 2002માં અપક્ષ તરીકે ચૂંટણી લડી કોંગ્રેસના ઉમેદવાર કરતાં વધુ મત મેળવ્યા અને ભાજપના ઉમેદવાર કરતાં બીજા સ્થાને રહ્યા હતા.

2007ની ચૂંટણીમાં ભાજપના ઉમેદવાર તખ્તસિંહ પરમારને હરાવ્યા હતા. બાદમાં તેઓ ભાજપમાં જોડાયા અને 2012ની ચૂંટણી ભાજપના ઉમેદવાર તરીકે જીતી ગયા હતા. 2017ની ચૂંટણીમાં દિનુ મામાને હારનો સામનો કરવો પડ્યો. 2022માં  વિધાનસભાની ચૂંટણીમાં ભાજપે ટિકિટ ન આપતાં બળવો કરી અપક્ષ ઉમેદવાર તરીકે ચૂંટણી લડ્યા. ભાજપ સામે બળવો કરી 2022ની વિધાનસભાની ચૂંટણી લડ્યા હતા. જે તે સમયે ભાજપે 6 વર્ષ માટે સસ્પેન્ડ કર્યા હતા.