ડીસા APMCના પૂર્વ ચેરમેન ગોવા રબારી સામે માર્કેટયાર્ડના વહીવટમાં રૂપિયા 4.11 કરોડની ગેરરીતિ આચરવાની સહકાર વિભાગમાં ફરિયાદ થઈ હતી. સહકાર વિભાગની તપાસ બાદ વર્ષ 2015માં ગુજરાત સરકાર દ્વારા રૂપિયા 4.11 કરોડ ઉપરાંતની વસૂલાત માટે કાર્યવાહી કરી હતી. તેથી ગોવા રબારીએ ગુજરાત હાઈકોર્ટમાં દાવો દાખલ કર્યો હતો.

હાઈકોર્ટે ગોવા રબારીનો દાવો ફગાવી દેતાં દાવો રદ કરવા તેમણે એક વર્ષ અગાઉ સુપ્રીમ કોર્ટમાં પિટિશન કરી હતી. સુપ્રીમકોર્ટે પણ ગોવા રબારીની પિટિશન કાઢી નાખીને જે તે સમયે ડીસા કોર્ટમાં થયેલો દાવો ચલાવવા આદેશ કર્યો હતો. હવે, ગોવા રબારીએ આ દાવા મામલે કરેલી રિવિઝન અરજી ગુજરાત હાઈકોર્ટે નામંજૂર કરતાં ગોવા રબારીની મુશ્કેલીમાં વધારો થયો છે.

ગુજરાત હાઇકોર્ટ સમક્ષ દાખલ થયેલી રિટ અરજીમાં જસ્ટિસ નિરલ આર.મહેતાએ રાજય સરકાર, કૃષિ અને સહકાર વિભાગના નિયામક, નાયબ નિયામક અને ગોવા રબારી વિરુદ્ધ કારણદર્શક નોટિસો જારી કરી કેસની વધુ સુનાવણી 9 ઓકટોબરે રાખી છે. હાઇકોર્ટે ગોવા રબારીને રૂપિયા 4.11 કરોડની ગેરરીતિ માટે જવાબદાર ઠરાવતાં કૃષિ વિભાગના નિયામકના હુકમ સામેની રિવિઝન અરજી મંજૂર કરવાના સહકાર વિભાગના નાયબ સચિવના તા. 31-7-2025ના હુકમ સામે પણ સ્ટે ફરમાવી દીધો હતો.

આ કેસની તમામ હકીકતો ધ્યાને લીધા બાદ ન્યાયાધીશે સ્પષ્ટ કર્યું છે કે, પ્રથમ દર્શનીય રીતે કોર્ટનો અભિપ્રાય છે કે, ગોવા રબારી દ્વારા સરકાર સમક્ષ દાખલ કરવામાં આવેલી રિવિઝન અરજી ટકી શકે તેમ જ ન હતી. એક વખત જે વિષય હાઇકોર્ટમાં પડકારાયો હોય અને હાઇકોર્ટે તેને ગ્રાહ્ય રાખ્યો ના હોય ત્યારે રિવીઝન અરજી ટકી શકે નહી.

જ્યારે, ગોવા રબારી દ્વારા કરાયેલી રિવિઝન અરજી પણ 9 વર્ષના વિલંબ બાદ દાખલ કરાયેલી છે. હાલના અરજદારે રિવિઝન અરજીમાં પક્ષકાર તરીકે જોડાવા અરજી કરી ત્યારે પૂરતો સમય આપવાને બદલે તેની અરજી નામંજૂર કરી દીધી અને બીજા જ દિવસે એટલે કે, તા.31-7-2025ના રોજ આ મામલો ફરી પાછો સંબંધિત સત્તાધીશને મોકલી અપાયો છે.

શું છે સમગ્ર મામલો?

ડીસા APMCના પૂર્વ ચેરમેન અને પૂર્વ ગોવા રબારી સામે તેઓના ચેરમેનકાળ દરમિયાન વહીવટમાં નાણાંકીય ઉચાપત, જમીન ખરીદી જેવી ગેરરીતિ આચર્યાની ફરિયાદ થઈ હતી.તેઆથી ખેતબજાર અને ગ્રામ્ય અર્થતંત્ર ગુજરાત રાજ્ય ગાંધીનગરના નિયામક દ્વારા 21 ફેબ્રુઆરી 2015ના હુકમથી તત્કાલીન ચેરમેન ગોવા રબારીની રૂપિયા 4,11,18,553ની અંગત જવાબદારી નક્કી કરવામાં આવી હતી. ત્યારબાદ નાણાંની વસૂલાત માટે ગુજરાત સરકાર દ્વારા તત્કાલિન જિલ્લા રજિસ્ટાર (સહકારી મંડળીઓ પાલનપુર બનાસકાઠા)ને અધિકૃત કરવામાં આવ્યા હતા. તત્કાલિન જિલ્લા રજિસ્ટારે સરકાર તરફે ડીસા કોર્ટમાં સ્પેશિયલ દાવો દાખલ કર્યો હતો.

આ દાવા સામે ગોવા રબારી હાઇકોર્ટમાં ગયા હતા. તે સમયે ગુજરાત હાઈકોર્ટે પણ દાવો ચલાવવાના ડીસા કોર્ટના હુકમને માન્ય રાખતાં તેઓ સુપ્રીમ કોર્ટમાં ગયા હતા. સુપ્રીમ કોર્ટમાં તેમણે સ્પેશિયલ લીવ પિટિશન દાખલ કરી હતી. જેમાં સુપ્રીમ કોર્ટે 27 ઓગસ્ટ 2024ના રોજ ચેરમેન ગોવા રબારી સામે દાખલ કરેલા રૂપિયા 4,11,18,553 ન ભરવાની પિટિશન રદ કરીને રાજ્ય સરકાર અને ગુજરાત હાઈકોર્ટના હુકમને બહાલ રાખ્યો હતો.

ઉલ્લેખનીય છે કે, ડીસા APMCના પૂર્વ ચેરમેન ગોવા રબારી સામે APMCમાં 5 થી 6 કરોડની ઉચાપત તેમજ ભીલડી જમીન પ્રકરણ સહિતના અનેક કૌભાંડ આચર્યા હોવાની ચર્ચાઓએ જોર પકડ્યું હતું. આ પ્રકારના અનેક ભ્રષ્ટાચારોમાંથી નીકળવા તેઓ ભાજપમાં જોડાઈ ગયા હતા. જો કે, ભાજપમાં જોડાયા બાદ પણ તેમની મુશ્કેલી ઓછી થવાના બદલે વધી છે.

4.11 કરોડ ઉપરાંત વ્યાજ સહિતની રકમ ભરવી પડશે

ગોવા રબારીની રિવિઝન અરજી ગુજરાત હાઈકોર્ટે નામંજૂર કરી વધુ સુનાવણી 9 ઓક્ટોબરે રાખી છે. જો કે, રિવિઝન અરજી નામંજૂર થતાં ગોવા રબારી સામે રાજ્ય સરકારે દાખલ કરેલો રૂપિયા 4.11 કરોડનો દાવો ડીસા કોર્ટમાં ફરીથી ચાલશે. સુપ્રીમકોર્ટે એક વર્ષ અગાઉ ગોવા રબારીની પિટિશન રદ કરતાં જે તે સમયે ગોવા રબારીને રૂપિયા 4,11,18,553 ઉપરાંત વર્ષ 2015થી આજદિન સુધી વ્યાજ સહિત અંદાજે 8 થી 10 કરોડ ભરવા પડશે તેવી ચર્ચા ચાલી હતી.

ગોવા રબારી સામે ગુજરાત સરકારે જ બાયો ચઢાવી

ડીસા એપીએમસીના પૂર્વ ચેરમેન અને પૂર્વ કોંગ્રેસી નેતા ગોવા રબારીએ ડીસા APMCમાં ગેરરીતિ આચરી હોવાથી ગુજરાત સરકાર દ્વારા રૂપિયા 4.11 કરોડ વસૂલ કરવા ડીસા કોર્ટમાં દાવો દાખલ કર્યો હતો. જેને સુપ્રીમકોર્ટ દ્વારા માન્ય રાખ્યા બાદ ગુજરાત હાઈકોર્ટે પણ રિવિઝન અરજી કાઢી નાખી છે. ત્યારે ડીસા કોર્ટમાં દાવાની સુનાવણી થયા બાદ કોર્ટનો શું હુકમ થાય છે તેના ઉપર સૌ કોઈની મીટ મંડાઈ છે.

કોણ છે ગોવા રબારી?

ગોવા રબારી ડીસા તાલુકાના કુચાવાડા ગામના રહેવાસી છે. તેમણે કુચાવાડાના સરપંચથી રાજકીય કારકિર્દીની શરૂઆત કરી હતી. તેઓ જિલ્લા પંચાયત પ્રમુખ અને ડીસાના ધારાસભ્ય રહી ચુક્યા છે. તેમણે 7 વખત વિધાનસભાની ચૂંટણી લડી છે. છેલ્લે 2017ની ચૂંટણીમાં ગોવા રબારી ડીસા બેઠક પરથી ભાજપના શશીકાંત પંડ્યા સામે હારી ગયા હતા. જ્યારે વર્ષ 2022ની વિધાનસભા ચૂંટણીમાં ગોવાભાઈએ તેમના પુત્ર સંજય રબારીને મેદાને ઉતાર્યા હતા. પરંતુ, ભાજપના ઉમેદવાર સામે તેઓ પણ હારી ગયા હતા. લોકસભા ચૂંટણી અગાઉ તેઓ ભાજપમાં જોડાઈ ગયા છે.

September 19, 2025 | 11:42 IST