કેરળમાં EDની ટીમ પર હુમલો

Keralam Politics: કેરળમાં પ્રવર્તમાન રાજકીય ગરમાવો વચ્ચે પ્રવર્તન નિર્દેશાલય (ED) દ્વારા પૂર્વ મુખ્યમંત્રી અને હાલના વિરોધ પક્ષના નેતા પિનારાઈ વિજયનના નિવાસસ્થાને કરાયેલી કાર્યવાહી બાદ ભારે વિવાદ ઉભો થયો છે. કન્નુર સ્થિત તેમના નિવાસસ્થાને EDની તપાસ પૂર્ણ થયા બાદ બહાર નીકળતા અધિકારીઓ સામે CPI(M) કાર્યકરોનો ભારે વિરોધ જોવા મળ્યો હતો.સૂત્રોના જણાવ્યા મુજબ,કેટલાક સ્થળોએ અધિકારીઓ પર પથ્થરમારો થવાના પણ અહેવાલો સામે આવ્યા છે,જેના કારણે પરિસ્થિતિ તંગ બની ગઈ હતી.આ કાર્યવાહી બાદ કેરળની રાજનીતિમાં ઉથલપાથલ મચી છે.CPI(M) એ કેન્દ્ર સરકાર પર રાજકીય બદલો લેવાનો આરોપ લગાવ્યો છે, જ્યારે ED આ સમગ્ર કાર્યવાહી મની લોન્ડરિંગ કેસ સાથે જોડાયેલી તપાસનો ભાગ હોવાનું જણાવી રહી છે.

EDની કાર્યવાહી બાદ નિવાસસ્થાન  પર અધિકારીઓ પર પથ્થરમારો
કન્નુરમાં પિનારાઈ વિજયનના નિવાસસ્થાને તપાસ પૂર્ણ કર્યા બાદ ED અધિકારીઓ બહાર નીકળવા લાગ્યા ત્યારે પાર્ટી કાર્યકરો મોટી સંખ્યામાં ત્યાં એકઠા થઈ ગયા હતા. કાર્યકરોએ ગેટ બહાર સૂત્રોચ્ચાર શરૂ કર્યો અને અધિકારીઓને સવાલો પૂછતાં વાતાવરણ તંગ બન્યું હતું. સ્થાનિક નેતાઓ અને પાર્ટીના વરિષ્ઠ આગેવાનો દ્વારા પરિસ્થિતિ શાંત કરવાનો પ્રયાસ કરવામાં આવ્યો, છતાં લાંબા સમય સુધી ધક્કામુક્કી અને ભારે હોબાળો જોવા મળ્યો હતો.

CPI(M)નો કેન્દ્ર સરકાર પર આકરા પ્રહાર
આ સમગ્ર ઘટનાને લઈને CPI(M)ના મહાસચિવ એમ.એ. બેબીએ કેન્દ્ર સરકાર અને ED પર આકરા પ્રહાર કર્યા છે. તેમણે આરોપ લગાવ્યો કે વિરોધ પક્ષના નેતાઓને ટાર્ગેટ કરવા માટે તપાસ એજન્સીઓનો ઉપયોગ કરવામાં આવી રહ્યો છે. તેમણે કહ્યું કે, દેશના વિવિધ રાજ્યોમાં વિરોધી પક્ષના નેતાઓ સામે મનગમતા આરોપો લગાવીને કાર્યવાહી કરવામાં આવી રહી છે. દિલ્હી સહિતના અનેક કેસોનો ઉલ્લેખ કરતાં તેમણે દાવો કર્યો કે આ રાજકીય વ્યૂહરચનાનો જ એક ભાગ છે.

ED હવે રાજકીય મશીનરી તરીકે કાર્ય કરી રહી છે.
એમ.એ.બેબીએ વધુમાં આરોપ લગાવ્યો કે ED હવે સ્વતંત્ર તપાસ એજન્સી તરીકે નહીં પરંતુ “રાજકીય મશીનરી” તરીકે કાર્ય કરી રહી છે. તેમના મતે, વિરોધી અવાજોને દબાવવા અને રાજકીય વિરોધીઓને ડરાવવા માટે કેન્દ્રીય એજન્સીઓનો ઉપયોગ થઈ રહ્યો છે. આ આરોપો વચ્ચે CPI(M) કાર્યકરોએ રાજ્યના અનેક વિસ્તારોમાં વિરોધ પ્રદર્શન પણ શરૂ કર્યા છે.

EDની તપાસ 8 કલાક સુધી ચાલી
પ્રદર્શનકારીઓએ રસ્તા જામ કરીને અધિકારીઓનો વિરોધ કર્યો હતો. બેકરી જંકશન ખાતે પિનારાઈ વિજયનના નિવાસસ્થાન બહાર પોલીસ અને CPI(M) કાર્યકરો વચ્ચે અથડામણ પણ થઈ હતી. કોઝિકોડ અને કન્નુરમાં પણ તણાવપૂર્ણ સ્થિતિ સર્જાઈ હતી. કોઝિકોડમાં પોલીસ અને CPI(M) કાર્યકરો વચ્ચે ઝપાઝપી થયા બાદ પાર્ટી નેતાઓએ હસ્તક્ષેપ કરીને સ્થિતિ કાબૂમાં લીધી હતી. EDની તપાસની કાર્યવાહી આશરે 8 કલાક સુધી ચાલી હતી.

બેંગલુરુ સહિત આશરે 10 સ્થળોએ EDએ કરી મોટી કાર્યવાહી
EDએ કોચીન મિનરલ્સ એન્ડ રૂટાઈલ લિમિટેડ (CMRL) સાથે જોડાયેલા મની લોન્ડરિંગ કેસમાં મોટી કાર્યવાહી હાથ ધરી છે. આ કેસમાં પિનારાઈ વિજયનની પુત્રી વીણા વિજયન અને તેમની કંપની સાથે જોડાયેલા અનેક સ્થળોએ દરોડા પાડવામાં આવ્યા હતા. EDએ કન્નુર, એર્નાકુલમ, તિરુવનંતપુરમ અને બેંગલુરુ સહિત આશરે 10 સ્થળોએ તપાસ હાથ ધરી હતી. તપાસ એજન્સીનો આરોપ છે કે CMRL કંપનીએ ખોટા ખર્ચ દર્શાવી કરોડો રૂપિયાની ગેરરીતિ કરી હતી.

2019થી શરૂ થયો હતો કેસ
આ સમગ્ર કેસનો ખુલાસો સૌપ્રથમ 2019માં થયો હતો, જ્યારે આવકવેરા વિભાગે CMRL પર દરોડા પાડ્યા હતા. ત્યારબાદ તૈયાર કરાયેલી રિપોર્ટમાં વીણા વિજયનની કંપનીને થયેલા સંદિગ્ધ ચૂકવણીઓનો ઉલ્લેખ કરવામાં આવ્યો હતો. વિવાદ વધતા કેન્દ્ર સરકારે જાન્યુઆરી 2024માં SFIOને સમગ્ર કેસની તપાસ સોંપી હતી.SFIOની તપાસ મુજબ કંપનીએ છેલ્લા 15 વર્ષમાં લગભગ 182 કરોડ રૂપિયાના ખોટા રોકડ ખર્ચ દર્શાવ્યા હતા. સાથે જ કંપનીના મેનેજિંગ ડિરેક્ટર એસ.એન. સશિધરન કાર્તા અને તેમના પુત્ર સારન કાર્તાને 2015-16થી 2022-23 દરમિયાન અંદાજે 30.63 કરોડ રૂપિયા પગાર અને અન્ય ચુકવણી રૂપે આપવામાં આવ્યા હતા, જ્યારે શેરહોલ્ડરોને કોઈ ડિવિડન્ડ આપવામાં આવ્યું નહોતું.