ભાજપના પ્રદેશ મંત્રી નૌકાબેન પ્રજાપતિની જીભ લપસીઃ “અનામત માથાનો દુઃખાવો બની રહી છે”

બનાસકાંઠાના ભાભરમાં ભાજપના પ્રદેશ મંત્રી નૌકાબેન પ્રજાપતિએ વિવાદિત નિવેદન કર્યુ છે. ભાભર નગરપાલિકા આયોજિત પ્રજાસત્તાક દિવસની ઉજવણીમાં સંબોધન કરતી વખતે નૌકાબેન પ્રજાપતિની જીભ લપસી હતી. “અનામત આજે માથાનો દુઃખાવો બની રહી છે” તેવું વિવાદિત નિવેદન કરતાં તેના રાજકીય ઘેરા પ્રત્યાઘાતો પડ્યા છે. કોંગ્રેસે ભાજપના પ્રદેશ મંત્રીના નિવેદનનો વિરોધ કરી ભાજપનો અનામત વિરોધી ચહેરો ખુલ્લો પડી ગયો હોવાનું કહ્યુ છે.

ભાભરના આઝાદ ચોકમાં યોજાયેલા 76માં પ્રજાસત્તાક દિવસની ઉજવણી અંતર્ગત પ્રજાને સંબોધન કરતાં સમયે ભાજપના પ્રદેશ મંત્રી નૌકાબેન પ્રજાપતિએ કહ્યુ હતુ કે, “તુષ્ટીકરણ અને વોટબેંકની નીતિના કારણે અનામતને આજે આપણે દૂર કરી શક્યા નથી. આજે અનામત એક માથાનો દુઃખાવો બની રહી છે. માત્ર 15 ઓગષ્ટ અને 26 જાન્યુઆરીની ઉજવણી કરવાથી રાષ્ટ્રભક્તિ કહેવાતી નથી.પરંતુ આપણી રગેરગમાં દેશદાઝ હોવી જોઈએ. ઈઝરાયેલ જેવો નાનકડો દેશ દેશદાઝના કારણે આજુબાજુના મુસ્લીમ દેશોને હંફાવી રહ્યો છે.

પ્રદેશ ભાજપ મંત્રી નૌકા પ્રજાપતિના વિવાદિત નિવેદનને કોંગ્રેસે વખોડી કાઢ્યુ છે. કોંગ્રેસના પ્રવક્તા હિરેન બેન્કરે ભાજપ પર આકરા પ્રહારો કરી કહ્યુ છે કે, “પ્રજાસત્તાક દિવસ એટલે કે બંધારણ લાગુ થયાના દિવસે અનામત વિરોધી માનસિકતા રજૂ કરવી ખૂબ દુર્ભાગ્યપૂર્ણ બાબત છે. બંધારણ અને ડો. બાબા સાહેબ આંબેડકરે આપેલી અનામત આજે ભાજપને માથાનો દુ:ખાવો લાગી રહી છે. ભાજપનો અનામત વિરોધી ચેહરો ખુલ્લો પડી ગયો છે. 30 વર્ષના શાસનમાં ભાજપ દ્વારા નીતનવા હથકંડાઓ અપનાવીને અનામત ખતમ કરવાના પ્રયત્નો થઈ રહ્યા છે. દલિત, શોષિત, પીડીત, વંચિત લોકોને મુખ્યધારામાં જોડવાની, શૈક્ષણિક સામાજિક અને રાજકીય ઉત્થાન કરવાની કામગીરી ભાજપને માથાનો દુ:ખાવો લાગી રહ્યો છે. કોંગ્રેસ પક્ષ વારંવાર કહેતો આવ્યો છે કે ભાજપ અને આરએસએસ એ અનામતને ખતમ કરવા માટે હંમેશા પ્રયત્નશીલ છે તેની આજે સાબિતિ સામે આવી. સ્કોલરશીપ ખતમ કરી દેવી, ફંડ ઓછું આપવું, કોન્ટ્રાક્ટ - આઉટ સોર્સિંગમાં ભરતી કરવી જેવા હથકંડાઓ અપનાવી ભાજપ અનામતને ખતમ કરી રહી છે. ભાજપનો અનામત વિરોધી ચેહરો વધુ એક વખત ખુલ્લો પડી ગયો છે.”