મહેસાણામાં હોમગાર્ડઝ અધિકારીની પરીક્ષામાં ગેરરીતિ કરાયાનો કોંગ્રેસનો આક્ષેપ

ગુજરાતમાં ભરતી પ્રક્રિયાઓ દરમિયાન પેપર ફૂટવા અને ગેરરીતિ બાદ પરીક્ષા રદ કરવાના અનેક કિસ્સાઓ સામે આવ્યા છે. ત્યારે વધુ એક ભરતી પ્રક્રિયામાં ગેરરીતિનો આક્ષેપ થયો છે. મહેસાણાના  સૂંઢિયા ટ્રેનિંગ સેન્ટરમાં કંપની કમાન્ડન્ટ અને ડિવિઝનલ કમાન્ડન્ટની પરીક્ષા “બંધ બારણે” કરવામાં આવી હોવાનો ગુજરાત પ્રદેશ કોંગ્રેસ સમિતિનાં પ્રવક્તા હિરેન બેન્કરે આક્ષેપ કર્યો છે. કોઈ સત્તાવાર પરિપત્ર કે જાહેર હુકમ બહાર પાડ્યા વગર પરીક્ષાનું આયોજન કરીને ભાજપના કાર્યકર્તાઓ અથવા આરએસએસ સાથે સંકળાયેલા અંગત લોકોને પરીક્ષામાં બેસવા દેવામાં આવ્યા હોવાની વિગતો સામે આવી હોવાનો બેન્કરે દાવો કર્યો છે.

હિરેન બેન્કરે ઉમેર્યુ છે કે, બે મહિના પહેલા પ્લાટૂન કમાન્ડરની પરીક્ષામાં પાસ થયેલા અને જેઓ નિયમો મુજબ ક્રાઈટેરિયામાં નહોતા આવતા તેવા અધિકારીઓને જિલ્લા કમાન્ડન્ટ અને વડી કચેરીની મિલીભગતથી પરીક્ષામાં બેસવાની મંજૂરી આપવામાં આવી છે. જે લોકોની પરેડ અને ફરજ માંડ 20 ટકા પણ નથી થતી. પરંતુ માત્ર આરએસએસના કાર્યકર્તા હોવાથી તેમને પરીક્ષામાં બેસવા દેવામાં આવ્યા હોવાથી સ્પષ્ટ થાય છે કે, માત્ર મળતિયાઓની નિયમ વિરુદ્ધ ભરતી કરવામાં આવી રહી છે.

તેમણે ઉમેર્યુ છે કે, હોમગાર્ડઝ સભ્યો માટે કડક નિયમો હોવા છતાં અધિકારીઓ માટે કોઈ નિયમો લાગુ પડતા ન હોવાનું જોવા મળી રહ્યું છે. કોઈપણ એક પરીક્ષા આપ્યા બાદ એક વર્ષનો ગેપ હોવો જોઈએ.  જે અધિકારીઓના નિયમમાં આવતું નથી. અમુક અધિકારીઓ એવા પણ છે જેઓ માત્ર હોમગાર્ડ દળમાં રોલ પર નામ ચાલુ રાખે છે. આવા અધિકારીઓ પોતાના યુનિટથી 200 કિલોમીટર દૂર 15 વર્ષથી રહે છે અને પરેડ કે ફરજ માટે ક્યારેય આવતા નથી. છતાં પણ તેમને પરીક્ષામાં બેસવા દેવામાં આવ્યા છે. તેની પાછળનું કારણ ગુજરાતના જિલ્લા કમાન્ડન્ટોની આરએસએસમાંથી થયેલી નિમણૂક હોવાનું મનાઈ રહ્યું છે. શું આ સમગ્ર પ્રક્રિયા આરએસએસ તથા ભાજપના કાર્યકર્તાઓને અધિકારી રેન્ક સુધી લઈ જવા માટેનું એક મોટું કૌભાંડ છે? તેવો આક્ષેપ બેન્કરે કર્યો છે.

હિરેન બેન્કરે સમગ્ર ભરતી પ્રક્રિયા હોમગાર્ડ દળના કમાન્ડન્ટ જનરલ મનોજ અગ્રવાલની દેખરેખ હેઠળ ચાલી રહી હોવાનો ગંભીર આક્ષેપ કર્યો છે. મનોજ અગ્રવાલની નિવૃત્તિને માત્ર બે મહિના બાકી છે ત્યારે પરીક્ષામાં કોઈ મોટો વહીવટ લેવામાં આવી રહ્યો છે? તેવો પ્રશ્ન પણ ઉઠી રહ્યો હોવાનો તેમણે દાવો કર્યો છે. તેથી હોમગાર્ડના અધિકારીઓની સમગ્ર ભરતી પ્રક્રિયાની નિષ્પક્ષ તપાસ કરવા કોંગ્રેસે માંગ કરી છે.

આ મામલે મહેસાણા હોમગાર્ડ કમાન્ડન્ટ ભાવેશ શાહનો સંપર્ક કરતાં તેમણે મનીષભાઈ ત્રિવેદીનો સંપર્ક કરવા કહ્યું હતુ. મનીષભાઈ ત્રિવેદીનો સંપર્ક કરતાં તેઓને બે વખત કોલ કરવા છતાં કોલ રિસિવ કરવાનું ટાળ્યું હતુ. જ્યારે વોટ્સએપ ઉપર મેસેજ કરવા છતાં જવાબ આપવાનું પણ ટાળ્યું હતું.