AAPના પ્રદેશ સંગઠન મંત્રી રામ ધડૂક સામે ફરિયાદ

આમ આદમી પાર્ટીના ગુજરાત પ્રદેશ સંગઠન મંત્રી રામ ધડુક સામે સુરતના સારોલી પોલીસ સ્ટેશનમાં પોલીસ ફરિયાદ નોંધાઈ છે. તેમની સામે પઠાણી ઉઘરાણી કરીને ભયંકર ગાળો બોલવા અને ધમકી આપવાનો ગંભીર આરોપ મૂકાયો છે. AAPના નેતા સામે ફરિયાદ નોંધાતા સુરતના રાજકારણમાં ગરમાવો આવ્યો છે.

સુરતના નિલેશ પાનસુરીયાએ રામ ધડુક (પ્રદેશ સંગઠન મંત્રી, આમ આદમી પાર્ટી, ગુજરાત) ની વિરુદ્ધ ફરિયાદ નોંધાવી છે. સારોલી પોલીસ સ્ટેશનમાં નોંધાવેલી ફરિયાદમાં તેમણે પઠાણી ઉઘરાણી, ભયંકર ગાળો બોલવી, અને જાનથી મારી નાખવાની ધમકી આપવાનો આરોપ મૂક્યો છે. રામ ધડુક પાસે 10 હજાર રૂપિયા લાઈટના માંગવા બાબતે ફરિયાદી અને રામ ધડુક વચ્ચે રકઝક થઈ હતી.

નિલેશ પાનસુરીયાએ ફરિયાદમાં જણાવ્યું છે કે, પૈસાની લેતી-દેતી બાબતેની રકઝક બાદ રામ ધડુકે તેમની પાસે પઠાણી ઉઘરાણી કરીને અપશબ્દો બોલિયા હતા. આ સમયે રામ ધડૂકે ધમકી આપી હતી. બંને વચ્ચે થયેલી બોલાચાલીની ઓડિયો ક્લીપ વાયરલ થઈ છે. જેના કારણે સમગ્ર વિવાદ પોલીસ સ્ટેશનમાં પહોંચ્યો છે.

સારોલી પોલીસે નિલેશ પાનસુરીયાની ફરિયાદના આધારે આમ આદમી પાર્ટી ગુજરાતના પ્રદેશ સંગઠન મંત્રી રામ ધડુક વિરુદ્ધ ગુનો નોંધીને તપાસ શરૂ કરી છે. આમ આદમી પાર્ટીના પ્રદેશ મંત્રી સામે થયેલી ફરિયાદનો મામલો સુરત શહેર અને જિલ્લાના રાજકીય વર્તુળોમાં ભારે ચર્ચાસ્પદ બન્યો છે.