ચૂંટણીમાં હાર બાદ અમદાવાદ શહેર કોંગ્રેસમાં કકળાટ

અમદાવાદ મ્યુનિસિપલ કોર્પોરેશન (AMC) ચૂંટણીમાં અપેક્ષા મુજબનું પરિણામ ન મળતાં અમદાવાદ શહેર કોંગ્રેસમાં આંતરિક અસંતોષ બહાર આવ્યો છે. ચૂંટણી બાદ પાર્ટી સંગઠનમાં જવાબદારી નક્કી કરવાની પ્રક્રિયા શરૂ થતાં 6 વોર્ડ પ્રમુખોને પદ પરથી હટાવવાનો નિર્ણય લેવામાં આવ્યો છે. આ નિર્ણય બાદ કોંગ્રેસના કાર્યકરોમાં નારાજગી જોવા મળી છે. કોંગ્રેસના વોટ્સએપ ગૃપોમાં કાર્યકરોએ બળાપો ઠાલવી શહેર કોંગ્રેસ પ્રમુખ સોનલ પટેલના નેતૃત્વ સામે સવાલ ઉઠાવ્યા છે.

AMCની ચૂંટણીમાં કોંગ્રેસે અગાઉની સરખામણીએ વધુ બેઠકો મેળવી હોવા છતાં સત્તા સુધી પહોંચી શકી નથી. ભાજપે 192માંથી 160 બેઠકો જીતી છે. જ્યારે કોંગ્રેસને માત્ર 32 બેઠકોથી સંતોષ માનવો પડ્યો છે. જોકે ખાડિયા જેવા ભાજપના મજબૂત ગઢમાં કોંગ્રેસની પેનલ જીતાડતાં પાર્ટીમાં ઉત્સાહ જોવા મળ્યો હતો.

ચૂંટણી પરિણામ બાદ ગુજરાત કોંગ્રેસના પ્રદેશ પ્રમુખ અમિત ચાવડાની હાજરીમાં ઝોનવાઈઝ સમીક્ષા બેઠકો યોજાઈ હતી. બેઠકમાં કેટલાક વોર્ડ પ્રમુખોની નિષ્ક્રિય કામગીરી અને સંગઠન સ્તરે નબળાઈને હાર માટે જવાબદાર ગણવામાં આવી હતી. ત્યારબાદ શહેર કોંગ્રેસ સમિતિએ 6 વોર્ડ પ્રમુખોને તેમની ફરજમાંથી મુક્ત કરવાનો નિર્ણય કર્યો છે.

શહેર કોંગ્રેસ પ્રમુખ સોનલ પટેલના નિર્ણય પછી કોંગ્રેસના આંતરિક વોટ્સએપ ગૃપોમાં ભારે ચર્ચા શરૂ થઈ છે. અનેક કાર્યકરોએ શહેર કોંગ્રેસ પ્રમુખ સોનલ પટેલના નેતૃત્વ સામે ખુલ્લો અસંતોષ વ્યક્ત કર્યો છે. કેટલાક કાર્યકરોનું માનવું છે કે, સંગઠન મજબૂત બનાવવા અને ચૂંટણીની યોગ્ય રણનીતિ ઘડવામાં શહેર કોંગ્રેસનું નેતૃત્વ નિષ્ફળ રહ્યું છે.

જોધપુર વોર્ડના પૂર્વ પ્રમુખ રાકેશ જોશીએ શહેર કોંગ્રેસ સમિતિના નિર્ણય સામે નારાજગી વ્યક્ત કરી છે. તેમનું કહેવું છે કે, વોર્ડ પ્રમુખોને પૂરતો સમય અને સંસાધનો આપવામાં આવ્યા નહોતા. થોડા મહિનાની જવાબદારીમાં અસરકારક પરિણામ લાવવાની અપેક્ષા યોગ્ય નથી. સંગઠનના મૂળ પ્રશ્નો દૂર કર્યા વિના માત્ર વોર્ડ પ્રમુખોને જવાબદાર ઠેરવવાથી પાર્ટીને લાંબા ગાળે નુકસાન થઈ શકે તેમ છે.

અમદાવાદ શહેર કોંગ્રેસમાં વધતી આંતરિક અસંતોષની સ્થિતિને કારણે આગામી સમયમાં સંગઠન સ્તરે વધુ ફેરફારો થવાની શક્યતા વ્યક્ત કરવામાં આવી રહી છે. રાજકીય નિરીક્ષકો માને છે કે કોંગ્રેસે શહેર સ્તરે સંગઠન મજબૂત બનાવવા માટે તાત્કાલિક અસરકારક પગલાં લેવાની જરૂર છે.