સ્થાનિક સ્વરાજની સંસ્થાઓની ચૂંટણીના પ્રચાર પડઘમ આજે થશે શાંત, 16 મીએ મતદાન

સ્થાનિક સ્વરાજની ચૂંટણી અંતર્ગત 16 ફેબ્રુઆરીએ મતદાન થનાર છે. તમામ સંસ્થાઓની ચૂંટણી અંતર્ગત આજે એટલે કે શુક્રવારે 5 વાગ્યા બાદ પ્રચાર પડઘમ શાંત થશે. શનિવારે રાજકીય પક્ષો મતદારોને રિઝવવા ડોર ટુ ડોર પ્રચાર કરશે. જૂનાગઢ મહાનગરપાલિકા, 66 નગરપાલિકાની સામાન્ય ચૂંટણી, બોટાદ અને વાંકાનેર નગરપાલિકાની મધ્યસત્ર ચૂંટણી, ગાંધીનગર, કઠલાલ અને કપડવંજ તાલુકા પંચાયતની સામાન્ય ચૂંટણી, ખાલી પડેલી મનપાની 3, જિલ્લા પંચાયતની 8 અને તાલુકા પંચાયતની 76 બેઠકોની પેટા ચૂંટણી જાહેર કરવામાં આવી છે.

જૂનાગઢ મહાનગરપાલિકા, 66 નગરપાલિકાઓ, ગાંધીનગર, કઠલાલ, કપડવંજ તાલુકા પંચાયતોની સામાન્ય તેમજ બોટાદ અને વાંકાનેર નગરપાલિકાની મધ્યસત્ર જ્યારે ખાલી પડેલી બેઠકોની પેટા ચૂંટણી જાહેર થઈ છે.   

27 જાન્યુઆરી 2025 થી 1 ફેબ્રુઆરી 2025 સુધી સ્થાનિક સ્વરાજ્યના ચૂંટણી હેઠળના તમામ એકમો માટે કુલ 7036 ઉમેદવારી પત્રો રજૂ થયા હતા. તે પૈકી 1261 ઉમેદવારી પત્રો અમાન્ય ઠર્યા હતા. જ્યારે 5775 ઉમેદવારી પત્રો માન્ય રહ્યા હતા. 478 ઉમેદવારોએ ઉમેદવારી પત્રો પરત ખેંચ્યા હતા. 213 બેઠકો બિનહરીફ થઈ  હતી. જ્યારે બાકીની બેઠકો માટે કુલ 5084 ઉમેદવારો મેદાનમાં છે.

જૂનાગઢ મહાનગરપાલિકાના 15 વોર્ડની કુલ 60 બેઠકો પૈકી વોર્ડ નં.3 તથા 14ની 8 બેઠકો બિનહરીફ થઈ છે. બાકીના વોર્ડની 52 બેઠકો પર ચૂંટણી યોજાનાર છે. આ માટે કુલ 157 ઉમેદવારો મેદાનમાં છે. અમદાવાદ મહાનગરપાલિકાના વોર્ડ નં.7 (સામાન્ય), ભાવનગર મહાનગરપાલિકાના વોર્ડ નં.3 (સામાન્ય) તથા સુરત મહાનગરપાલિકાના વોર્ડ નં.18( પછાતવર્ગ) ની પેટા ચૂંટણી હેઠળની ત્રણ બેઠકો પર ચૂંટણી યોજાનાર છે. આ બેઠકો માટે કુલ 17 ઉમેદવારો વચ્ચે જંગ જામશે.

 

66 નગરપાલિકાઓની સામાન્ય ચૂંટણીના 461 વોર્ડમાંથી 24 વોર્ડ બિનહરીફ થયા છે. કુલ 1844 બેઠકો પૈકી 167 બેઠકો બિનહરીફ થઈ છે. જ્યારે 1677 બેઠકો પર કુલ 4374 ઉમેદવારો હરિફાઇમાં છે. બોટાદ અને વાંકાનેર નગરપાલિકાની મધ્યસત્ર ચૂંટણીના 18 વોર્ડ પૈકી 4 વોર્ડ બિનહરીફ થયા છે. કુલ 72 બેઠકો પૈકી 23 બેઠકો બિનહરીફ થયા છે જ્યારે 49 બેઠકો પર 101 ઉમેદવારો મેદાનમાં છે.

નગરપાલિકાની પેટા ચૂંટણીમાં 21 બેઠકો પૈકી 2 બેઠકો (મોરબી જિલ્લાની માળિયા મિયાણા નગરપાલિકાના વોર્ડ નં.2 તથા 5 ની બેઠક) બિનહરીફ થઈ છે. 19 બેઠકો પર 45 ઉમેદવારો માટે ચૂંટણી યોજાશે. જિલ્લા પંચાયતની પેટા ચૂંટણી અંતર્ગત 9 બેઠકો પૈકી 1 બેઠક (પંચમહાલ જિલ્લાની શિવરાજપુર) બિનહરીફ થઈ છે. 8 બેઠકો પર 22 ઉમેદવારો વચ્ચે ચૂંટણી જંગ ખેલાશે.

ગાંધીનગર, કઠલાલ તથા કપડવંજ તાલુકા પંચાયતની સામાન્ય ચૂંટણી અંતર્ગત 78 બેઠકોમાં માટે 178 ઉમેદવારો મેદાનમાં છે. તાલુકા પંચાયતની પેટા ચૂંટણી અંતર્ગત 91 બેઠકો પૈકી 12 બેઠકો બિનહરીફ થઈ છે. હારીજ તાલુકા પંચાયતની સાંકરા, બગસરા તાલુકા પંચાયતની વાઘણીયા જૂના પર ઉમેદવારી પત્રો ભરાયેલ ન હોય તેમજ બાબરા તાલુકા પંચાયતની કરીયાણા બેઠક પર 1 ઉમેદવારી પત્ર રજૂ થયેલ જે રદ થયેલ હોય ચૂંટણી યોજવાની થતી નથી. આ સિવાયની પેટા ચૂંટણી હેઠળની 76 બેઠકો પર 190 ઉમેદવારો હરિફાઇમાં છે.

16 ફેબ્રુઆરીએ મતદાન સમયે મતદારે ચૂંટણી પંચે આપેલું મતદાર ઓળખપત્ર (EPIC) રજૂ કરવાનું રહેશે અનિવાર્ય સંજોગોમાં જો મતદાર ઓળખપત્ર રજૂ ન કરી શકે તો રાજ્ય ચૂંટણી આયોગે નક્કી કરેલા 14 ફોટા સાથે  દસ્તાવેજી પૂરાવો રજૂ કરી મતદાન કરી શકાશે.

સંવેદનશીલસ, અતિસંવેદનશીલ મતદાન મથકો પર મતદારો કોઈપણ પ્રકારના ડર વગર મતદાન કરી શકે તે માટે વધારાનો પોલીસ ફોર્સ અને પોલીસ પેટ્રોલીંગની વ્યવસ્થા કરી હોવાનો રાજ્ય ચૂંટણી આયોગે દાવો કર્યો છે. ચૂંટણી હેઠળના વિસ્તારમાં મતદાનનો સમય પૂરા થવાના કલાક સાથે પૂરા થાય તે રીતે 48 કલાકનો સમય એટલે 14 ફેબ્રુઆરીએ સાંજના 5 કલાકથી 16 ફેબ્રુઆરીએ સાંજના 7 કલાક સુધી તેમજ મતગણતરીનો દિવસ એટલે કે 18 ફેબ્રુઆરીએ આખો દિવસ મતદારો ડર વગર મતદાન કરી શકે તે માટે “ડ્રાય ડે” જાહેર કરી દારૂ અને નશાકારક ચીજોના વેચાણ પર પ્રતિબંધ મૂકવામાં આવ્યો છે.

રાજ્ય ચૂંટણી આયોગે 48 કલાકના સમયગાળા દરમિયાન જાહેર સભા બોલાવવા, ભરવા તથા હાજર રહેવા પર પ્રતિબંધ ફરમાવ્યો છે. જ્યારે મત આપવાનો અધિકાર ધરાવતી દરેક વ્યક્તિ મતદાન કરી શકે તે માટે 16 ફેબ્રુઆરીના રોજ અઠવાડિક રજા ચૂંટણીના દિવસે ન આવતી હોય તેવા કર્મચારીઓને વૈકલ્પિક વ્યવસ્થા તરીકે મતદાન માટે વારાફરતી ત્રણ કલાકની ખાસ રજા આપવામાં આદેશ કરાયો છે.