" હવે બચુ ખાબડનું શું કરવું..? " ગુજરાત કેબિનેટમાં થઇ ચર્ચા

આજે ગાંધીનગરમાં મુખ્યમંત્રીની અધ્યક્ષતામાં મંત્રીમંડળની કેબિનેટ બેઠક મળી હતી. ખેડૂત સહાયથી લઈને ગ્રામ પંચાયત ચૂંટણી અને વડાપ્રધાનની મુલાકાતની સમીક્ષા તથા વિવાદોમાં ઘેરાયેેલા મંત્રી બચુ ખાબડ સહિત કેટલીક અગત્યની ગેરહાજરીઓ ચર્ચાનો વિષય બની હતી.

 મુખ્યમંત્રી ભૂપેન્દ્ર પટેલની અધ્યક્ષતામાં આજે મંત્રીમંડળની કેબિનેટ બેઠક યોજાઈ હતી જેમાં કૃષિ નુકસાની, ગ્રામ પંચાયત ચૂંટણી, વડાપ્રધાન નરેન્દ્ર મોદીની મુલાકાત અને કોરોના કેસોની તાજી સ્થિતિ સહિતના મુદ્દાઓ પર વિસ્તૃત ચર્ચા થઈ. પરંતુ બેઠકમાં મંત્રી બચુ ખાબડ, ગૃહ રાજ્ય મંત્રી હર્ષ સંઘવી અને આરોગ્ય મંત્રી ઋષિકેશ પટેલ ગેરહાજર રહ્યા હોવાને લઈને સચિવાલયમાં ભારે ચર્ચા જોવા મળી હતી.

બેઠકની શરૂઆતમાં તાજેતરના કમોસમી વરસાદને કારણે ખેતી ક્ષેત્રે થયેલા નુકસાન અંગે વિભાગીય અહેવાલ રજૂ થયો. સૌરાષ્ટ્ર, દક્ષિણ ગુજરાત અને મધ્ય ગુજરાતના કેટલાક તાલુકાઓમાં ડુંગળી, કેરી, કપાસ અને શાકભાજી પાકને ભારે નુકસાન થયું છે. મુખ્યમંત્રીએજિલ્લા વહીવટીતંત્રને સર્વે ઝડપથી પૂરો કરીને ખેડૂત સહાય પેકેજ માટે પાયાદાર કામગીરી શરૂ કરવા આદેશ આપ્યો હતો. 

બેઠકમાં ગ્રામ પંચાયતોની ચૂંટણીને પણ ચર્ચા કરવામાં આવી હતી. રાજ્યની અંદાજે 8,240 ગ્રામ પંચાયતોમાં સામાન્ય, મધ્યસત્ર અને પેટા ચૂંટણીનું આયોજન ટૂંક સમયમાં થવાનું છે. રાજ્ય ચૂંટણી પંચે તમામ કલેક્ટરોને તૈયારી માટે નિયત સુચનાઓ આપી છે. મતદાન પ્રક્રિયા બેલેટ પેપરથી થવાની છે અને ઈવીએમનો ઉપયોગ નહીં થાય. સ્ટ્રોંગરૂમથી લઈને સ્ટાફ તાલીમ સુધીની તમામ તૈયારીઓની સમીક્ષા બેઠકમાં થઇ હતી. આ સાથે  મુખ્યમંત્રીએ વડાપ્રધાન નરેન્દ્ર મોદી ની ગુજરાત મુલાકાત ની પણ સમીક્ષા કરી  તો આ સાથે, એક વખત ફરીથી આરોગ્ય ક્ષેત્રે કોરોના સંક્રમણના  કેસોને લઈને ચિંતા ઉદભવી છે. તેની પણ ચર્ચા થઇ 

ખાસ કરીને અમદાવાદ અને સુરત જેવા મેટ્રો શહેરોમાં કોવિડ કેસ નોંધાઈ રહ્યા છે. આરોગ્ય વિભાગને હોસ્પિટલોમાં બેડ ઉપલબ્ધતા, ઓક્સિજન સપ્લાય અને ટેસ્ટિંગ મેકેનિઝમ ચકાસવા સૂચના અપાઈ છે. સંભવિત ત્રીજી લહેરના ધબકારા અટકાવવા પૂર્વ તૈયારી પર ભાર મુકાયો.

ઉપરાંત જેમના પુત્રો પર ભ્રષ્ટાચાર ના આરોપો છે તેવા મંત્રી બચુ ખાબડ ના ખાતાનો હવાલો કોને સોંપવો તે બાબતે પણ ચર્ચા થઇ હોવાનું સુત્રોએ જણાવ્યું હતું.