બોગસ ખેડૂત વિવાદઃ ગુજરાત ભાજપના બે નેતાઓ સામસામે

ઈડરના ભાજપના ધારાસભ્ય રમણ વોરાએ બોગસ ખેડૂત બની જમીન ખરીદવાનો વિવાદ વધુ વકર્યો છે. ભાજપના પૂર્વ ધારાસભ્ય પૂનમ મકવાણાએ ગાંધીનગર કલેક્ટરને પત્ર લખીને રમણ વોરા સામે કાર્યવાહી કરવા માંગ કરતાં મામલો ટોક ઓફ ધી સ્ટેટ બન્યો છે. ગાંધીનગરના પાલજથી બોગસ ખેડૂત બની ઈડરમાં ખેતીની જમીન ખરીદ કરી હોવાનો રમણ વોરા સામે આરોપ છે. બોગસ ખેડૂતની ફરિયાદ સંદર્ભે તપાસ ચાલી રહી છે. તેવામાં ભાજપના પૂર્વ ધારાસભ્યએ કલેક્ટરને અરજી કરતાં ભાજપના બે નેતાઓ આમને સામને આવી ગયા છે. 

ભાજપના પૂર્વ ધારાસભ્ય પૂનમ મકવાણાએ ગાંધીનગર કલેક્ટરને પત્ર લખીને જણાવ્યું છે કે, રમણ વોરાએ ઈડરમાં તેમના મિત્ર દિનેશભાઈ પટેલને વેચાણ આપેલી જમીન એનએ કરાવ્યા બાદ રમણ વોરાએ તેમના દીકરા ભૂષણ તથા સુરાગને વેચાણ કરી હતી. આ કિસ્સામાં દસ્તાવેજમાં જણાવેલી વેચાણ કિંમતના વહેવારો આઈટી રીટર્નમાં બતાવેલા છે કે કેમ? તેની તપાસ કરી આવક વેરા ચોરીનો ગુનો નોંધી ફોજદારી રાહે કાર્યવાહી કરવા માંગ કરી છે.

શું છે સમગ્ર મામલો ?

ગાંધીનગર શહેરના પાલજના સર્વે નં. 281ના જમીન કૌભાંડ મામલે પૂર્વ ધારાસભ્ય પૂનમ મકવાણાએ કલેક્ટરમાં લેખિતમાં ફરિયાદ નોંધાવી છે. આ ફરિયાદમાં ધારાસભ્ય રમણ વોરા ખોટા ખેડૂત સાબિત થતા તેમની સામે કાર્યવાહી કરવા માગણી કરી છે. ફરિયાદમાં જણાવ્યું છે કે, વર્ષ 2004માં આ જમીન ચાર ભાગીદારીઓ ખરીદ કરી હતી. વર્ષ 2016 સુધી જમીનના કાગળ ભાગીદારોના નામે રહ્યા હતા. બાદમાં રમણ વોરાએ ખોટા ખેડૂત સાબિત કરી પેઢીનામાના આધાર પર પત્ની અને બે દીકરાઓના નામે જમીનની નોંધણી કરાવી હતી. વર્ષ 2024માં આ જમીન તેમના મિત્ર દિનેશ પટેલને 3.7 કરોડમાં વેચી દીધી હતી. દિનેશ પટેલે આ જમીન તાત્કાલિક એન.એ. જાહેર કરી ફરીથી રમણ વોરાના બે દીકરા સુહાગ અને ભૂષણ વોરાને વેચી દીધી હતી.

બોગસ ખેડૂત હોવાની ફરિયાદ

આ જમીનના ખરીદ-વેચાણમાં નાણા વ્યવહાર અંગે કરદાતાની IT રીટર્નમાં યોગ્ય રીતે નોંધણી કરવામાં આવી છે કે નહી તે અંગે ફરિયાદીએ તપાસ કરવા તેમજ ટેક્ષ ચોરીનો ગુનો નોંધવા માંગ કરી છે. પૂનમ મકવાણાએ કલમ 63 અને 84-સી હેઠળ કાર્યવાહી કરવા તેમજ બાકીના સાચા ખેડૂત ભાગીદારોના નામે જમીન નોંધણી કરવાની માગણી કરી છે. આ ઉપરાંત બેંક અને ચેક સાથે સંબંધિત નાણા વ્યવહારો હજુ સુધી પૂર્ણ ન થયા હોવાના પુરાવા રજૂ કર્ચા છે. આ કૌભાંડ મામલે સંબંધિત સરકારી વિભાગો દ્વારા તપાસ કરી યોગ્ય કાર્યવાહી કરવા અનુરોધ કર્યો છે.

કેવી રીતે મામલો બહાર આવ્યો?

અમદાવાદના નારોલમાં રહેતા પ્રકાશ પરમારે કલેકટરને લેખિત રજૂઆત કરી હતી. ઈડર તાલુકાના દાવડ ગામની સીમના સર્વે નં. 584, 549, 551 અને 581ની જમીનોમાં ધારાસભ્ય રમણ વોરા સહિત બિનખેડૂત હોવા છતાં ખોટી રીતે ખેડૂત તરીકે દાખલ થયા હોવાના પુરાવા રજૂ કરી તપાસ કરવા અને કાર્યવાહી માટે માંગ કરી હતી.  આ પ્રકરણમાં ગણોતધારા હેઠળ કાર્યવાહી કરવા રજૂઆત કરેલી હોવાથી કલેકટરે ઇડરના નાયબ કલેકટરને કાર્યવાહી કરવા લેખિત આદેશ આપી આધાર પુરાવા સાથે અહેવાલ મોકલવા સૂચના આપી હતી. દાવડની સદર જમીનનો અન્યના નામે રિવર્સ દસ્તાવેજ થયો છે. રિવર્સ દસ્તાવેજ થયો હોય તો કેમ રિવર્સ કરવો પડ્યો તે પણ તપાસનો વિષય બન્યો છે. 

રમણ વોરાને હાજર થવા મામલતદારની નોટિસ

ભળતાં નામે બારોબાર ખેડૂત ખરાઈનો દાખલો મેળવી ખોટા ખેડૂત ખાતેદાર બનેલાં ઇડરના ધારાસભ્ય રમણ વોરા સામે ઈડર મામલતદાર કચેરીમાં પણ તપાસ શરૂ થઈ છે. ખોટા દસ્તાવેજના આધારે રમણ વોરાએ ઇડર નજીક દાવડ ગામમાં ખેતીની જમીનો ખરીદી હતી. ઇડર મામલતદારે આ મામલે તપાસ હાથ ધરી ધારાસભ્ય વોરાને નોટિસ ફટકારી 1 સપ્ટેમ્બરે મામલતદાર કચેરીમાં પુરાવા સાથે હાજર રહેવા આદેશ કર્યો છે. અમદાવાદના રહીશ રમણલાલ ઈશ્વરલાલના ભળતા નામે ધારાસભ્ય રમણ વોરાએ ખેડૂત ખરાઇનો દાખલો મેળવ્યો છે. ખોટા ખેડૂત ખાતેદાર બની રમણ વોરાએ ગાંધીનગરના પાલેજ ખાતે ખેતીની જમીનો ખરીદી હતી. ખેડૂત ખરાઈના દાખલાના આધારે ધારાસભ્ય રમણ વોરાએ ઇડર નજીક દાવડ ગામમાં પત્ની કુસુમબેન વોરા, પુત્ર સુહાગ વોરા અને ભૂષણ વોરાના નામે ખેતીની જમીન ખરીદ કરી છે.

મામલતદારની બદલી થતાં વિવાદ ઘેરાયો

રમણ વોરાએ પત્ની-પુત્રોના નામે ખરીદ કરેલી જમીન વિરપુર અને જાદરના એક વ્યક્તિને વેચાણ કરી દેવામાં આવી છે. જેતપુર વડાલી કંપાના રાજેન્દ્ર પટેલે ઇડર મામલતદારને ફરિયાદ કરી ધારાસભ્યની જમીનના પુરાવા માંગ્યા હતા. રાજકીય દબાણના કારણે મામલતદાર એ.એ.રાવલે પુરાવા આપ્યા ન હતા. તેથી મહેસૂલ વિભાગે મામલતદાર સામે તપાસ હાથ ધરી બદલી કરી દીધી હતી. અરજદારે ઇડર મામલતદાર કચેરીમાં આત્મવિલોપન કરવાની ચીમકી આપતાં કલેક્ટરે તપાસના આદેશ આપ્યા હતા. ગાંધીનગરથી આદેશ છૂટતા ઇડર મામલતદારે ધારાસભ્ય વિરુદ્ધ કાર્યવાહી શરૂ કરી છે. મામલતદારે  રમણ વોરાને નોટીસ ફટકારી ખેડૂત ખાતેદારના પુરાવા ઉપરાંત જમીનના દસ્તાવેજો રજૂ કરવા આદેશ કર્યો છે. ખેડૂત ખાતેદારનો દાખલો ખોટો સાબિત થતાં રમણ વોરા વિરૂદ્ધ ગણોતધારા અંતર્ગત કાર્યવાહી ઉપરાંત દંડનીય કાર્યવાહી થાય તેવી શક્યતા છે.

બોગસ ખેડૂત બાદ રમણ વોરાનો નવો વિવાદ

બોગસ ખેડૂતની તપાસ ચાલી રહી છે. તેવામાં રમણ વોરા નવા વિવાદમાં સપડાયા છે. સોશિયલ મીડિયા પર ઇડરના એક યુવકે રમણ વોરોની ટીકા કરી હતી. આ ટીકા મામલે રમણ વોરાએ યુવકને વોટ્સએપ કોલ કરી તો ખખડાવીને અભદ્ર ભાષાનો પ્રયોગ કર્યો હતો. વોટ્સએપ ચેટમાં રમણ વોરાએ ‘ચડ્ડી પહેરતાં શીખી જા પછી બાપા જોડે વાત કરજે’ જેવા શબ્દો લખતાં તેના સ્ક્રીનશોટ અને ઓડિયો રેકોર્ડિંગ સોશિયલ મીડિયા પર વાયરલ થયા છે. સાબર ડેરીના ચેરમેન શામળ પટેલ સામે થયેલું પશુપાલકોના આંદોલન સમયે ઇડરના આશુતોષ રેવાભાઈ રાઠોડે સ્થાનિક ધારાસભ્ય તરીકે રમણ વોરાની ભૂમિકાને લઈ ટીકા કરી હતી. વોટ્સએપ ગૃપમાં મૂકવામાં આવેલી ટીકાવાળી પોસ્ટને ટાંકી રમણ વોરાએ “આઇટમ બેકાર છે. સાચા નામ અને સાચા ફોટા સાથે પુરુષ હોય તો મેસેજ કરે” એવું લખ્યું હતું. બાદમાં, રમણ વોરાએ આશુતોષ રાઠોડને વોટ્સએપ કોલ કરવાનું શરૂ કર્યુ હતું. આશુતોષને મેસેજમાં લખી ન શકાય તેવા શબ્દો રમણ વોરાએ લખ્યા હતા. તેમણે ફોન પર "હું 52 વર્ષથી રાજકારણમાં છું, 22 વર્ષ મંત્રી રહ્યો, 1975માં ડીવાયએસપી, લોમાં ગોલ્ડ મેડાલિસ્ટ" એમ કહી સત્તાનો રોફ બતાવી વોટ્સએપમાં "એ ડફોળ..." જેવા શબ્દોનો ઉપયોગ કર્યો હોવાની ચેટ વાયરલ થઈ હતી.

નશાબંધી મંડળના પ્રમુખને પણ અપશબ્દો બોલ્યા હતા

રમણ વોરાના ભત્રીજા જમાઈ લલિત પરમાર ગુજરાત નશાબંધી મંડળમાં કામ કરે છે. લલિત પરમાર ઘણાં સમયથી નોકરી પર નહીં આવતા નશાબંધી મંડળે લલિત પરમારને નોટિસ પાઠવી ખુલાસો કરવા આદેશ કર્યો હતો. લલિત પરમારે નોટિસનો જવાબ આપવાના બદલે કાકા સસરા રમણ વોરાને ફરિયાદ કરી હતી. તેથી રમણ વોરાએ વિવેક દેસાઈને ફોન કરીને કોંગ્રેસી હોવાનો આક્ષેપ કર્યો હતો. આ ઉપરાંત નોટિસ બાબતે સવાલ કર્યો હતો. વિવેક દેસાઈએ રમણ વોરાને વાંધો હોય તો કોર્ટમાં જવા કહ્યું હતું. રમણ વોરાએ અકળાઈને કહ્યું કે, ‘ગુજરાતમાં હું જ સરકાર છું અને સરકાર કોર્ટમાં જતી નથી. હું ધારું તો તમારી ગ્રાન્ટ પણ બંધ કરાવી દઈશ. તને ખબર નથી કે તું કોની સાથે વાત કરી રહ્યો છે અને હવે તુ પતી ગયો.'