ગાંધીનગરમાં 29 અને 30 જાન્યુઆરીએ મળશે ભાજપ પાર્લામેન્ટરી બોર્ડની બેઠક

રાજ્યમાં સ્થાનિક સ્વરાજની સંસ્થાઓની ચૂંટણી અંતર્ગત આગામી 16 ફેબ્રુઆરીના રોજ મતદાન થનાર છે. 27 જાન્યુઆરીએ જાહેરનામુ બહાર પડતાં ઉમેદવારી ફોર્મ ભરાવાની પ્રક્રિયા શરૂ થઈ ગઈ છે. ભાજપે 27 અને 28 જાન્યુઆરીના રોજ જિલ્લા મથકોએ સેન્સ લેવાની પ્રક્રિયા કરી હતી. સેન્સ લીધા બાદ જિલ્લા ભાજપની સંકલન સમિતિમાં નક્કી કરાયેલા નામો પ્રદેશ ભાજપને મોકલવામાં આવશે. 29 અને 30 જાન્યુઆરીએ મળનાર ભાજપની પાર્લામેન્ટરી બોર્ડની બેઠકમાં મના નામ અંગે મંથન કરી યાદી જાહેર કરવામાં આવશે.

ગાંધીનગરમાં મુખ્યમંત્રીના નિવાસ સ્થાને 29 અને 30 જાન્યુઆરીના રોજ ભાજપ પાર્લામેન્ટરી બોર્ડની બેઠક મળશે. સ્થાનિક સ્વરાજની સંસ્થાઓની ચૂંટણી માટે ઉમેદવારો નક્કી કરવા બેઠક મળશે. જેમાં મુખ્યમંત્રી ભૂપેન્દ્ર પટેલ, પ્રદેશ ભાજપ પ્રમુખ સી.આર.પાટીલ સહિત પાર્લામેન્ટરી બોર્ડના સભ્યો હાજર રહેશે. જિલ્લા મથકોએ યોજાયેલી સેન્સ પ્રક્રિયા પૂર્ણ થયા બાદ નિરીક્ષકો દ્વારા રજૂ કરવામાં આવેલા દાવેદારોના નામો પર ચર્ચા કરવામાં આવશે. પાર્લામેન્ટરી બેઠકમાં ચર્ચા કરાયા બાદ ઉમેદવારોની ફાઈનલ યાદી જાહેર કરવામાં આવશે.

રાજ્ય ચૂંટણી આયોગ દ્વારા 21 જાન્યુઆરીએ સ્થાનિક સ્વરાજની સંસ્થાઓની ચૂંટણી જાહેર કરવામાં આવી હતી. આ ચૂંટણી સંદર્ભે 27 જાન્યુઆરીના રોજ જાહેરનામુ પ્રસિદ્ધ કરાયુ છે. 27 જાન્યુઆરીથી ફોર્મ ભરવાની પ્રક્રિયા શરૂ થઈ છે. 1 ફેબ્રુઆરીથી ઉમેદવારોના ફોર્મ ભરાશે. 3 ફેબ્રુઆરીએ ઉમેદવારી પત્રોની ચકાસણી કરાશે. 4 ફેબ્રુઆરી સુધી ઉમેદવારી પત્રો પરત ખેંચી શકાશે. તે જ દિવસે સાંજે હરીફ ઉમેદવારોની યાદી જાહેર થશે. ત્યારબાદ 16 ફેબ્રુઆરીએ મતદાન અને 18 ફેબ્રુઆરીએ મત ગણતરી યોજાશે.

ઉલ્લેખનીય છે કે, રાજ્યમાં 16 ફેબ્રુઆરીએ જૂનાગઢ મહાનગરપાલિકા, 66 નગરપાલિકા ઉપરાંત કઠલાલ, કપડવંજ અને ગાંધીનગર તાલુકા પંચાયતની સમાન્ય ચૂંટણી અને બોટાદ, વાંકાનેર નગરપાલિકાની મધ્યસત્ર ચૂંટણી અંતર્ગત મતદાન થશે. આ ઉપરાંત ખાલી પડેલી મનપાની 3, નગરપાલિકાની 21, જિલ્લા પંચાયતની 9 અને તાલુકા પંચાયતોની 91 બેઠકોની પેટાચૂંટણી અંતર્ગત મતદાન થશે.