સ્થાનિક સ્વરાજની ચૂંટણીના મંગળવારે પરિણામો જાહેર થઈ ગયા. 15 મનપા, 84 નગરપાલિકા, 34 જિલ્લા પંચાયત અને 260 તાલુકા પંચાયત માટે યોજાયેલી ચૂંટણીના પરિણામો અપેક્ષા મુજબના રહ્યાં છે. મત ગણતરી પહેલા 10,005 બેઠકોમાંથી 732 બેઠકો બિનહરીફ જાહેર થઈ હતી.

ભાજપે 100 ટકા મનપા કબજે કરી છે. જ્યારે 95 ટકા નગરપાલિકા, 97 ટકા જિલ્લા પંચાયત અને તાલુકા પંચાયતો જીતી છે. જ્યારે વર્ષ 2021માં 100 ટકા જિલ્લા પંચાયત, 100 ટકા મનપા, 93 ટકા નગરપાલિકા અને 86 ટકા તાલુકા પંચાયત જીતી હતી. હાલમાં ભાજપ પાસે 97 ટકા સાંસદ અને 90 ટકા ધારાસભ્યો છે. ભાજપે સ્થાનિક સ્વરાજની ચૂંટણીમાં વર્ષ 2021 કરતાં પણ મોટો વિજય મેળવ્યો છે.

સ્થાનિક સ્વરાજની ચૂંટણી-2026માં મનપામાં 90 ટકા, જિલ્લા પંચાયતમાં 82 ટકા, તાલુકા પંચાયતમાં 70 ટકા અને નગરપાલિકામાં 76 ટકા બેઠક મેળવી છે. વર્ષ 2021માં મનપામાં 84 ટકા, જિલ્લા પંચાયતમાં 82 ટકા, તાલુકા પંચાયતમાં 70 અને નગરપાલિકામાં 76 ટકા બેઠક મેળવી હતી.

સ્થાનિક સ્વરાજની ચૂંટણીમાં ભાજપે વર્ષ 2021નું પુનરાવર્તન કર્યુ છે. 6 જૂની અને નવી 9 મનપા મળી કુલ 15 મનપા ઉપર ભાજપે સત્તા હાંસલ કરી છે. 84 નગરપાલિકામાંથી 78માં ભાજપ અને 6 કોંગ્રેસને મળી છે. જ્યારે 34 જિલ્લા પંચાયતમાંથી 33 જિલ્લા પંચાયત પર ભાજપે કબજો મેળવ્યો છે. 260 તાલુકા પંચાયતમાંથી ભાજપના ફાળે 253 અને કોંગ્રેસના ફાળે 7 અને આમ આદમી પાર્ટીના ફાળે 12 ગઈ છે.

વર્ષ 2021માં ભાજપે જીત મેળવી ત્યારે ભાજપ પાસે 100 ટકા સાંસદ, 100 ટકા જિલ્લા પંચાયત, 93 ટકા નગરપાલિકા, 86 ટકા તાલુકા પંચાયત અને 61 ટકા ધારાસભ્યો હતા. ત્યારબાદ 2022ની વિધાનસભા ચૂંટણીમાં ભાજપને ફાયદો થયો હતો. જેમાં ભાજપે 156 બેઠકો મેળવી હતી. કોંગ્રેસ પક્ષ માત્ર 17 બેઠકો પર સમેટાઈ ગયો હતો. આમ આદમી પાર્ટીને 5 બેઠક મળી હતી. ભાજપે બે વર્ષમાં કોંગ્રેસના 4 અને એક અપક્ષ અને એક આમ આદમી પાર્ટીના ધારાસભ્યને પક્ષમાં ભેળવી લેતાં 162 સંખ્યાબળ થયું છે.

ઉત્તર ગુજરાતમાં ભાજપનો દબદબો

ઉત્તર ગુજરાતના 6 જિલ્લાની વાત કરીએ તો કુલ 1910 બેઠક હતી. મહેસાણા મહાનગરપાલિકામાં ભાજપે બેઠકો જીતવા બાબતે પોતાનો નવો રેકોર્ડ બનાવ્યો છે. ઉત્તર ઝોનની 17 નગરપાલિકામાંથી કોંગ્રેસે સાબરકાંઠાની વડાલી નગરપાલિકામાં સત્તા મેળવી છે. 6 જિલ્લાની 144 બેઠક પર ભાજપ અને ત્રણ બેઠક પર કોંગ્રેસના ઉમેદવારો બિન હરીફ જાહેર કરવામાં આવ્યા હતા.

સૌરાષ્ટ્ર-કચ્છમાં પણ ભાજપ આગળ

સૌરાષ્ટ્ર-કચ્છના 12 જિલ્લામાં કુલ 2,773 બેઠકમાંથી ભાજપે 2,214 બેઠક પર જીત હાંસલ કરી છે. મહાનગરપાલિકામાં ભાજપે 380માંથી 349 બેઠક જીતી છે. જ્યારે જિલ્લા પંચાયતમાં 335માંથી 294 બેઠક અને નગરપાલિકામાં 999માંથી 783 બેઠક મેળવી દબદબો જાળવી રાખ્યો છે. મોરબી, પોરબંદર અને ગોંડલમાં ભાજપની એકતરફી જીત નોંધાઈ છે. જ્યારે જૂનાગઢ અને જસદણમાં વિપક્ષોએ મજબૂત હાજરી નોંધાવી છે.

મધ્ય ગુજરાતમાં મિશ્ર પરિણામ

કોંગ્રેસ પ્રમુખ અમિત ચાવડાના મધ્ય ગુજરાતના ગઢમાં કોંગ્રેસ સાફ થઈ ગઈ છે. 4 મહાનગરપાલિકા અમદાવાદ, વડોદરા, આણંદ અને નડિયાદમાં કોંગ્રેસનો કારમો પરાજ્ય થયો છે. 11 જિલ્લા પંચાયતમાં એકપણ બેઠક કોંગ્રેસ જીતી શકી નથી. નર્મદા જિલ્લા પંચાયત પર કબજો મેળવીને ચૈતર વસાવાએ આમ આદમી પાર્ટીની લાજ રાખી છે. 28 નગરપાલિકામાંથી 26 નગરપાલિકામાં ભાજપની જીત થઈ છે. જ્યારે 2 નગરપાલિકામાં કોંગ્રેસની જીત થઈ છે. 85 તાલુકા પંચાયતમાંથી 69 તાલુકા પંચાયતમાં ભાજપ, એકમાં કોંગ્રેસ, 6માં AAP અને 9 તાલુકા પંચાયત અનિર્ણિત રહી છે.

દક્ષિણ ગુજરાતમાં ભાજપનું ક્લીન સ્વીપ

દક્ષિણ ગુજરાતના 5 જિલ્લાની 132 બેઠકો પર ભાજપના ઉમેદવારો બિનહરીફ જાહેર થયા હતા. જ્યારે ત્રણ મહાનગરપાલિકા સુરત, નવસારી અને વાપીમાં ભાજપે એકતરફી જીત મેળવી છે. આ ઉપરાંત સુરત, નવસારી, વલસાડ, તાપી અને ડાંગ જિલ્લા પંચાયતમાં પણ ભાજપે સત્તા હાંસલ કરી છે. તાલુકા પંચાયતોની વાત કરીએ તો 668 બેઠકોમાંથી 663 બેઠકોના જાહેર થયેલા પરિણામોમાં ભાજપે 508 બેઠકો મેળવી છે. મુખ્ય વિરોધ પક્ષ કોંગ્રેસ 133 બેઠકો સાથે માત્ર આદિવાસી વિસ્તારો પૂરતી સીમિત રહી છે. આમ આદમી પાર્ટી માત્ર 4 બેઠકો મેળવી નબળા દેખાવને કારણે હાંસિયામાં ધકેલાઈ ગઈ છે. અપક્ષ અને અન્ય પક્ષના ઉમેદવારોના ફાળે 18 બેઠકો ગઈ છે.

April 29, 2026 | 17:52 IST