વડોદરામાં ભાજપની આબરુના લીરેલીરા ઉડ્યા, બે નેતા જાહેરમાં બાખડ્યા

વડોદરા ભાજપમાં ચાલતી જૂથબંધી આજે સામે ચાલીને બહાર આવી ગઇ છે. વડોદરા શહેરના ભાજપના પ્રમુખ માટે આજે જ્યારે સેન્સ પ્રક્રિયા ચાલી રહી હતી ત્યારે જ ભાજપના મહિલા મોરચાના શહેર ઉપ પ્રમુખ અને પૂર્વ મેયર વચ્ચે  જાહેરમાં તડાફડી બોલતા સોપો પડી ગયો હતો. 

વડોદરા શહેર ભાજપમાં અગાઉ પણ વારંવાર જૂથબંધી બહાર આવતી રહી છે. પણ આજે જે થયું તેમાં શિસ્તબદ્ધ કહેવાતા ભાજપમાં શિસ્તના લીરેલીરા ઉડી ગયા હતા. અગાઉથી નક્કી કરાયા મુજબ વડોદરા શહેરના પ્રમુખ પદ માટે આજે સેન્સ પ્રક્રિયા શરુ કરવામાં આવી છે. આજે ઉમેદવારી કરવા ઇચ્છુક કાર્યકરોએ પોતાના ફોર્મ ભર્યા હતા. 

દરમિયાન શહેરના પૂર્વ કોર્પોરેટર અને શહેર મહિલા મોરચાના ઉપ પ્રમુખ વચ્ચે જાહેરમાં તડાફડી અને તુ..તુ..મે..મે થતાં કાર્યાલયમાં સન્નાટો છવાઇ ગયો હતો. શહેર ભાજપ મહિલા મોરચાના ઉપાધ્યક્ષ સુનિતા શુક્લએ  વડોદરાના પૂર્વ કોર્પોરેટર હર્ષીત ગોપી તલાટીએ મહિલાઓનું અપમાન થાય તેવા શબ્દો ઉચ્ચાર્યા હોવાનો આરોપ લગાવતા ખળભળાટ મચી ગયો હતો. તેમણે મીડિયા સમક્ષ કહ્યું કે મે અત્યારે મારા કાનેથી મહિલાઓનું અપમાન થાય તે બાબતે સાંભળ્યું છે. અને કપડા ઉતારીને દોડવા માટેનું કહેવાયું છે. તેમણે કહ્યું કે મારામાં નૈતિક્તા છે એટલે બોલું છું.

આ સમયે હર્ષીત ગોપી તલાટી પણ સુનિતા શુક્લાની બાજુમાં જ ઉભા હતા. તેમણે કહ્યું કે  હું કહેવા માંગુ છું કે બેનના એકલામાં નહીં અમારામાં પણ નૈતિક્તા છે. આવો કોઇ વિષય આવ્યો નથી. ખોટી રીતે આ નામ ઉછાળવાનો પ્રયાસ કરી રહ્યા છે. મે પાર્ટીની પ્રક્રિયા મુજબ મારી ઉમેદવારી નોંધાવી છે. મારી દાવેદારી નબળી પાડવા આરોપ લગાવાઇ રહ્યા છે. 

દરમિયાન શહેર ભાજપમાં પ્રમુખ બનવા 44 દાવેદારોએ રસ દાખવ્યો છે અને ફોર્મ ભર્યા હતા જેમાં વર્તમાન પ્રમુખ વિજય શાહે દાવેદારી નોંધાવી હતી. આ ઉપરાંત પૂર્વ સ્ટેન્ડિંગ કમિટીના ચેરમેન હિતેન્દ્ર પટેલ, પૂર્વ મેયર જિગીષાબેન શેઠ અને પૂર્વ મેયર સુનીલ સોલંકી પણ દાવેદારી નોંધાવવા માટે પહોંચ્યાં હતાં.