ભરૂચ મનરેગા કૌભાંડઃ કોંગ્રેસ નેતા હીરા જોટવાના પુત્ર દિગ્વિજયની પણ ધરપકડ

ભરૂચ જિલ્લાના ત્રણ તાલુકાના 56 ગામના રૂપિયા 7.30 કરોડના મનરેગા કૌભાંડમાં SITની રચના બાદ તપાસનો ધમધમાટ શરૂ થયો છે. ગુરૂવારે કોંગ્રેસના પ્રદેશ ઉપપ્રમુખ હીરા જોટવાની ધરપકડ બાદ ભરૂચ પોલીસે શુક્રવારે તેમના પુત્ર દિગ્વિજય જોટવાની પણ ધરપકડ કરી છે. ત્યારબાદ હાંસોટ તાલુકા પંચાયત કચેરીના કર્મચારીની ધરપકડ કરાતાં ગુજરાતના રાજકારણમાં ગરમાવો આવ્યો છે.  

ભરૂચ જિલ્લાના આમોદ, જંબુસર અને હાંસોટ તાલુકાનાં 56 ગામમાં મનરેગા યોજના હેઠળ થયેલાં 430 કામોમાં 7.30 કરોડ રૂપિયાના કૌભાંડ મામલે ગ્રામ વિકાસ એજન્સીના પ્રાયોજના અધિકારીએ ભરૂચ શહેર એ ડિવિઝન પોલીસ સ્ટેશનમાં ફરિયાદ નોંધાવી હતી. ભરૂચ SP મયૂર ચાવડાએ મનરેગા કૌભાંડની તપાસ માટે સ્પેશિયલ ઇન્વેસ્ટિગેશન ટીમની રચના કર્યા બાદ હવે તપાસનો ધમધમાટ શરૂ થયો છે.  SITએ ત્રણેય તાલુકાનાં અસરગ્રસ્ત ગામડાંઓની મુલાકાત લઈને નિવેદનો લીધાં હતાં.

આ કૌભાંડમાં SITએ કોંગ્રેસના નેતા હીરા જોટવાની ગુરૂવારે ધરપકડ કરી હતી. જ્યારે તેમના દીકરા દિગ્વિજયની શુક્રવારે ધરપકડ કરવામાં આવી છે. ભરૂચ પોલીસ ગીર સોમનાથથી હીરા જોટવાને લઈને ગુરૂવારે મોડી રાત્રે ભરૂચ પહોંચી હતી. હીરા જોટવા બાદ હાંસોટ તાલુકા પંચાયત કચેરીના આઉટસોર્સિંગ કર્મચારી રાજેશ ટેલરની ધરપકડ કરવામાં આવી છે. જેમને કોર્ટમાં રજૂ કરીને રિમાન્ડ માગવામાં આવશે. શુક્રવારે બપોર બાદ ભરૂચ એસપીએ હીરા જોટવાના દીકરા દિગ્વિજય જોટવાની ધરપકડ કરી હોવાની સત્તાવાર માહિતી આપી હતી.

ગીર સોમનાથ જિલ્લાના વેરાવળની જલારામ એન્ટરપ્રાઇઝ અને મુરલીધર એન્ટરપ્રાઇઝ એજન્સીઓએ આમોદ, જંબુસર અને હાંસોટ તાલુકાનાં 56 ગામમાં મનરેગા યોજના હેઠળ થયેલાં 430 કામમાં 7.30 કરોડ રૂપિયાનું કૌભાંડ કર્યું હોવાની ફરિયાદ નોંધાઈ છે. SITએ ત્રણેય તાલુકાના શ્રમિકો અને કર્મચારીઓનાં નિવેદનો લીધાં બાદ જલારામ એન્ટરપ્રાઇઝના પીયૂષ રતિલાલ નુકાણી અને મુરલીધર એન્ટરપ્રાઇઝના જોધા નારણ સભાડના નામજોગ તથા તપાસમાં નીકળે તે સરકારી અધિકારી, કર્મચારી તથા આઉટસોર્સ આધારિત કર્મચારીઓ વિરુદ્ધ ફરિયાદ કરી છે. બંને એજન્સીઓએ 20 જાન્યુઆરી 2023થી 30 મે 2025 દરમિયાન કરેલાં કામોમાં ગેરરીતિ કરી હતી.

બંને એજન્સી પાસે મનરેગાનાં કામોમાં મટીરિયલ સપ્લાય કરવાનો કોન્ટ્રાક્ટ હતો. ઓછું મટિરિયલ સપ્લાય કરી વધારે મટીરિયલ બતાવી સરકારી તિજોરીને નુકસાન પહોંચાડ્યું હતું. જલારામ એજન્સી અને મુરલીધર એજન્સીના માલિકો સાથે હીરા જોટવાને શું સંબંધ છે તે વિગતો મેળવવા માટે હીરા જોટવાને પૂછપરછ માટે ભરૂચ લાવી છે. પૂછપરછ બાદ મોડીરાત્રે હીરા જોટવાની ધરપકડ કરવામાં આવી છે. હીરા જોટવાની સાથે હાંસોટ તાલુકા પંચાયત કચેરીના આઉટસોર્સિંગ કર્મચારી રાજેશ ટેલરને કોર્ટમાં રજૂ કરી રિમાન્ડની માગ કરવામાં આવશે.