બનાસકાંઠાના સાંસદ ગેનીબેન ઠાકોરે બંગલો બાંધવા જતાં ઝૂંપડું ખોયું

બનાસકાંઠાના સાંસદ ગેનીબેન ઠાકોરે બંગલો બાંધવા જતાં ઝૂંપડું ખોયુ.. સાંસદ બન્યા બાદ વાવ વિધાનસભા બેઠકની પેટાચૂંટણીમાં કોંગ્રેસના ગુલાબસિંહની હાર થતાં ઉપરોક્ત ગુજરાતી કહેવત સાર્થક થઈ રહી છે. વાવ અને સૂઈગામ પંથકમાં કોંગ્રેસે લીડ મેળવી હતી. પરંતુ, ગેનીબેનના માદરે વતન ભાભરમાંથી ભાજપને લીડ મળતાં સ્વરૂપજી ઠાકોર વિજયી થયા છે. ગુલાબસિંહ રાજપૂતને 2353 મતથી હરાવી ભાજપના સ્વરૂપજી ઠાકોરે વાવ બેઠક કોંગ્રેસ પાસેથી આંચકી લીધી છે.

કોંગ્રેસની પરંપરાગત વાવ બેઠક જીતીને ભાજપે ગુજરાતમાં વટ જાળવી રાખ્યો છે. જ્યારે બનાસકાંઠા જિલ્લામાં વિધાનસભા જીતીને ગેનીબેન ઠાકોરના ગઢમાં ગાબડું પાડ્યુ છે. અત્યંત રસપ્રદ બનેલી પેટાચૂંટણીમાં ભાજપના સ્વરૂપજી ઠાકોરને 91755 મત અને કોંગ્રેસના ગુલાબસિંહ રાજપૂતને 89402 મત મળતાં સ્વરૂપજી ઠાકોરને 2353 મતથી વિજેતા જાહેર કરાયા છે. જ્યારે અપક્ષ ઉમેદવાર માવજી પટેલ 27173 મત મેળવવામાં સફળ રહ્યા છે. બાકીના 5 અપક્ષ અને 1 અન્ય પક્ષના ઉમેદવારના મતનો સરવાળો માત્ર 6884નો થાય છે. જો કે, 3343 મતદારોએ નોટામાં મત આપતાં કોંગ્રેસના ગુલાબસિંહ રાજપૂત માટે નોટાના મત વિલન સાબિત થયા છે.

ભાભર પંથકે ગુલાબસિંહ રાજપૂતને હરાવ્યા

ઈવીએમની મત ગણતરી શરૂ થતાં પ્રથમ રાઉન્ડથી કોંગ્રેસના ગુલાબસિંહ રાજપૂતને લીડ મળી હતી. પહેલાં રાઉન્ડથી શરૂ કરી ગુલાબસિંહે 21 રાઉન્ડ સુધી લીડ જાળવી રાખી હતી. કુલ 23 રાઉન્ડમાંથી 1 થી 15 રાઉન્ડ દરમિયાન વાવ અને સૂઈગામ તાલુકામાંથી ગુલાબસિંહને 15 હજારની લીડ મળી હતી. એક સમયે ગુલાબસિંહની જીત નિશ્ચિત મનાતી હતી. 16માં રાઉન્ડથી ભાભર તાલુકાના ઈવીએમ ખુલતાં કોંગ્રેસના ઉમેદવારની લીડ ઘટવાનું શરૂ થયુ હતુ. 15 હજારથી ઘટીને લીડ 21 રાઉન્ડમાં 370 મતની થઈ ગઈ હતી. 22 રાઉન્ડમાં ભાજપના ઉમેદવારે કોંગ્રેસની લીડ કાપી 1099 મતની લીડ મેળવી હતી. 23 રાઉન્ડમાં કોંગ્રેસના ઉમેદવારને 2353 મતથી હરાવી ભાજપના ઉમેદવાર વિજયી બન્યા હતા. તમને જણાવી દઈએ કે 1 થી 9 રાઉન્ડ વાવ,10 થી 15 રાઉન્ડ સૂઈગામ અને 16 થી 23 રાઉન્ડ ભાભર તાલુકાની મત ગણતરી થઈ હતી.

ભાજપ, કોંગ્રેસ અને અપક્ષ વચ્ચે ત્રિપાંખિયો જંગ હતો

વાવ બેઠક પર ભાજપના સ્વરૂપજી ઠાકોર, કોંગ્રેસના ગુલાબસિંહ રાજપૂત અને અપક્ષ ઉમેદવાર માવજી પટેલ વચ્ચે ત્રિપાંખિયો જંગ હતો. આ ઉપરાંત ભારતીય જન પરિષદ અને અન્ય 5 અપક્ષ સહિત 10 ઉમેદવારો મેદાનમાં હતા. ભાજપ અને કોંગ્રેસના ઉમેદવારો વર્ષ 2022ની વિધાનસભા ચૂંટણી હારી ગયા હતા. ભાજપના સ્વરૂપજી ઠાકોર વાવ બેઠક પર કોંગ્રેસના ગેનીબેન સામે હારી ગયા હતા. જ્યારે કોંગ્રેસના ગુલાબસિંહ રાજપૂત થરાદ બેઠક પર ભાજપના શંકર ચૌધરી સામે હારી ગયા હતા.

ગુલાબસિંહને હરાવવા ભાજપના દિગ્ગજોને મહેનત કરવી પડી

લોકસભા ચૂંટણી બાદ વાવ બેઠક ભાજપ અને કોંગ્રેસ માટે વટનો સવાલ બની ગઈ હતી. ભાજપે લોકસભા ચૂંટણી બાદ તૈયારીઓ શરૂ કરી દીધી હતી. ચૂંટણી જાહેર થયા બાદ ભાજપે ચાર સાંસદોને કામે લગાડી દીધા હતા. રાજ્યસભાના સાંસદ મયંક નાયક, બાબુ દેસાઈ, પાટણના સાંસદ ભરત ડાભી અને કચ્છના સાંસદ વિનોદ ચાવડાએ બનાસકાંઠામાં ધામા નાખ્યા હતા. આ ઉપરાંત બળવંત રાજપૂત, હર્ષ સંઘવી સહિતના મંત્રીઓએ પ્રચાર કાર્ય સંભાળ્યુ હતુ. જ્યારે મુખ્યમંત્રી ભૂપેન્દ્ર પટેલે 3 જાહેર સભા અને પ્રદેશ પ્રમુખ સી.આર.પાટીલે પણ જાહેર સભા કરવાની ફરજ પડી હતી.

ઠાકોર સમાજના મતોના ધ્રવીકરણે સ્વરૂપજીને જીતાડ્યા

વાવ બેઠકના પ્રચારના છેલ્લા દિવસો દરમિયાન ઠાકોર સમાજના સોશિયલ મીડિયા ગૃપોમાં એક મેસેજ ફરતો થયો હતો. જેમાં જણાવ્યુ હતુ કે, ઠાકોર સમાજે એક થઈને લોકસભામાં કોંગ્રેસના ગેનીબેન ઠાકોરને જીતાડ્યા હતા. તેવી જ રીતે વિધાનસભા ચૂંટણીમાં પણ એક થઈને ભાજપના સ્વરૂપજી ઠાકોરને જીતાડવાના છે. ભાજપના સ્વરૂપજી ઠાકોરને જીતાડીશું તો આગામી સમયમાં યોજાનાર ચૂંટણીમાં રાજકીય પક્ષો તેની નોંધ લેશે.

માદરે વતન ભાભરમાં ગેનીબેનનું પ્રભુત્વ ઘટ્યું  

વાવ બેઠકમાં ભાભર, વાવ અને સૂઈગામ તાલુકાનો સમાવેશ થાય છે. જેમાં ઠાકોર સમાજના સૌથી વધુ મત હતા. જ્યારે ચૌધરી, અનુસૂચિત જાતિ, રબારી, બ્રાહ્મણ અને રાજપૂત સમાજના નિર્ણાયક મત હતા. ઠાકોર સમાજના મતદારોએ એક થઈ ભાજપના સ્વરૂપજી ઠાકોરને મતદાન કર્યુ હતુ. મારવાડી અને સ્થાનિક ચૌધરી સમાજના મતદારોએ અપક્ષ માવજી પટેલને મત આપ્યા હોવાનું મનાઈ રહ્યુ છે. જ્યારે કોંગ્રેસના ગુલાબસિંહ રાજપૂતને રાજપૂત સમાજ ઉપરાંત ઈતર સમાજના મત મળ્યા હતા. સાંસદ ગેનીબેન ઠાકોર સમાજના મત કોંગ્રેસના ઉમેદવારને અપાવવામાં નિષ્ફળ રહ્યા છે. ઠાકોર સમાજના મત નહી મળતાં કોંગ્રેસના ઉમેદવારની હાર થઈ હોવાનું રાજકીય વિશ્લેષકો માની રહ્યા છે. તેથી એમ કહી શકાય કે વાવ બેઠક પર ભાજપ નહી પણ જાતિવાદ જીત્યો છે. વાવ વિધાનસભા અને માદરે વતન ભાભરમાં ગેનીબેનનું પ્રભુત્વ ઘટ્યું હોય તેમ લાગી રહ્યુ છે.

કોંગ્રેસે પોતાની પરંપરાગત બેઠક ગુમાવી

લોકસભા ચૂંટણીમાં ગેનીબેન ઠાકોર વાવના ધારાસભ્ય હોવા છતાં ભાજપના રેખાબેન ચૌધરીને વાવ વિધાનસભામાં 1,661 મતની સરસાઈ મળી હતી. વર્ષ 2022માં ગેનીબેન ઠાકોરે ભાજપના સ્વરૂપજી ઠાકોરને, વર્ષ 2017ની ચૂંટણીમાં ગેનીબેન ઠાકોરે ભાજપના શંકર ચૌધરીને જ્યારે વર્ષ 2012ની ચૂંટણીમાં ભાજપના શંકર ચૌધરીએ ગેનીબેન ઠાકોરને હરાવ્યા હતા. વાવ બેઠકના ઈતિહાસમાં  ત્રણ વખત કોંગ્રેસ, એક વખત જનતાદળ અને બે વખત ભાજપે જીત મેળવી છે.