બનાસકાંઠાના કોંગ્રેસી નેતાની મુશ્કેલીઓ વધીઃ સ્વરૂપગંજની જેલમાં ધકેલાયા 

સુરેશ વણોલ, અમદાવાદ

બનાસકાંઠાના કોંગી નેતા ઠાકરશી રબારીની મુશ્કેલીઓ વધી છે. અફિણની હેરાફેરી કેસમાં રાજસ્થાન પોલીસે ધરપકડ કરી સ્વરૂપગંજ જેલમાં ધકેલી દીધા છે. કોંગ્રેસના સાંસદ ગેનીબેન ઠાકોરની નજીક ગણાતા ઠાકરશી રબારીની ધરપકડથી રાજકારણ ગરમાયુ છે. ભાજપના પ્રવક્તા યજ્ઞેશ દવેએ ઠાકરશી રબારીનો ગુનાહિત ભૂતકાળ ઉજાગર કરી કોંગ્રેસના નેતાઓ ઉપર આકરા પ્રહાર કર્યા છે. આ મામલે હજુ સુધી કોંગ્રેસના એકપણ નેતાની પ્રતિક્રિયા સામે આવી નથી. રાજસ્થાનના પિંડવાડા નજીક કારમાંથી મળેલાં અફિણના કેસમાં ઠાકરશી રબારીનું નામ ખૂલતાં રાજસ્થાન પોલીસે તેમની ધરપકડ કરી હતી. 

રાજસ્થાનની પિંડવાડા પોલીસે 9 એપ્રિલે 3.390 ગ્રામ અફિણનો રસ ઝડપ્યો હતો. આ કેસમાં કોંગ્રેસના નેતા અને રબારી સમાજના અગ્રણી ઠાકરશી રબારીનું નામ ખૂલ્યું હતું. તેથી થરાદની રબારી સમાજની હોસ્ટેલમાંથી રાજસ્થાન પોલીસે ઠાકરશી રબારીની અટકાયત કરી હતી. અટકાયત કર્યા બાદ તેમની પૂછપરછ હાથ ધરી હતી. અફિણના રસના કેસમાં તેમની સંડોવણી ખુલતાં સ્વરૂપગંજ પોલીસે ગુનો નોંધી કોર્ટમાં રજૂ કર્યા હતા. રાજસ્થાન પોલીસે રિમાન્ડ નહી માગતા કોર્ટે ઠાકરશી રબારીને સ્વરૂપગંજની જેલમાં મોકલવાનો આદેશ કર્યો હતો. 

ઠાકરશી રબારી કોંગ્રેસના સાંસદ ગેનીબેન ઠાકોરના અંગત ગણાય છે. તેથી બનાસકાંઠા સહિત રાજ્યના રાજકારણમાં ગરમાવો આવ્યો છે. ઉત્તર ગુજરાત કોંગ્રેસ કિસાન મોરચાના પૂર્વ ચેરમેન અને રબારી સમાજના અગ્રણી ઠાકરશી રબારીની ધરપકડને લઈ ભાજપે કોંગ્રેસ પર આકરા પ્રહાર કર્યા છે. 

ભાજપના પ્રવક્તા યજ્ઞેશ દવેએ પ્રદેશ કોંગ્રેસ પ્રમુખ શક્તિસિંહ ગોહિલને નિશાન બનાવી ઠાકરશી રબારીની ધરપકડ મુદ્દે પ્રહાર કર્યા છે. યજ્ઞેશ દવેએ જણાવ્યુ કે, ‘ગુજરાત પોલીસ ડ્રગ્સ પકડે તો શક્તિસિંહ કે કોંગ્રેસ બિરદાવતા નથી. ગુજરાતમાં કોંગ્રેસના નેતાઓ અફિણ અને દારૂની હેરાફેરીમાં સંડોવાયેલા છે. “રાજસ્થાનમાં પકડાયેલા ઠાકરશી રબારી દારૂની હેરાફેરીમાં સંડોવાયેલા છે. ગુજરાત પોલીસે ઠાકરશી રબારી સામે પાસાની દરખાસ્ત પણ કરી હતી.’ 

ઉલ્લેખનીય છે કે, રાજસ્થાન પોલીસે NDPSના ગુનામાં ધરપકડ કર્યા બાદ ઠાકરશી રબારીનો વીડિયો જાહેર કર્યો હતો. મધ્યપ્રદેશના બે શખ્સોની કારમાંથી 9 એપ્રિલે 3.390 કિલો અફિણનો રસ મળ્યો હતો. મધ્યપ્રદેશના બંને શખ્સોએ આ અફિણનો રસ વાવના ઠાકરશી રબારીએ મંગાવ્યો હોવાની કબૂલાત કરી હતી. મુખ્ય આરોપીઓની કબૂલાત બાદ ઠાકરશી રબારીની ધરપકડ કરવામાં આવી હતી. 

કોણ છે ઠાકરશી રબારી? 

ઠાકરશી રબારી કોંગ્રેસના સાંસદ ગેનીબેન ઠાકોરના અંગત ગણાય છે. લોકસભાની ચૂંટણી દરમિયાન ઠાકરશી રબારીએ ગેનીબેનને જીત અપાવવામાં મહત્વનો ફાળો આપ્યો હતો. વાવ વિધાનસભાની પેટાચૂંટણીમાં કોંગ્રેસના ઉમેદવાર તરીકે તેમણે દાવેદારી કરી હતી. જો કે, ગુલાબસિંહ રાજપૂતને ટિકિટ મળતાં ઠાકરશી રબારી નારાજ થયા હોવાનું જાણવા મળ્યુ હતુ. ઠાકરશી રબારી સામે બનાસકાંઠા જિલ્લામાં દારૂની હેરાફેરીના પાંચ જેટલા ગુના પણ નોંધાયા છે. જેના કારણે બનાસકાંઠા પોલીસે ઠાકરશી રબારી સામે પાસાની દરખાસ્ત કરી હતી. પાસાની દરખાસ્ત થતાં ગેનીબેને ઠાકોરે બનાસકાંઠા પોલીસ સામે આક્ષેપો કર્યા હતા.