ઇસ્કોન મંદિર સળગાવવામાં આવ્યું, હિંદુઓને તેમના ઘરોમાંથી ખેંચી કાઢવામાં આવ્યા અને માર મારવામાં આવ્યા

બાંગ્લાદેશમાં હિંસા અને આગચંપી વચ્ચે હવે તોફાનીઓએ લઘુમતી હિન્દુઓને નિશાન બનાવવાનું શરૂ કર્યું છે. ટોળું પસંદગીપૂર્વક હિંદુઓને નિશાન બનાવી રહ્યું છે. ઘરોને આગ લગાડવામાં આવી રહી છે. દુકાનો લૂંટાઈ રહી છે. આ દરમિયાન બાંગ્લાદેશના મહેરપુર ઈસ્કોન મંદિરની તસવીરો સામે આવી છે. તોફાનીઓએ આ મંદિરમાં તોડફોડ કરી અને પછી તેને આગ ચાંપી દીધી.

બાંગ્લાદેશી મીડિયા ડેલી સ્ટારના અહેવાલ મુજબ, 27 જિલ્લાઓમાં હિન્દુઓના ઘર અને દુકાનોને નિશાન બનાવવામાં આવી છે. કિંમતી ચીજવસ્તુઓ લૂંટી લેવામાં આવી છે. મંદિરો પર પણ હુમલા થયા છે. રિપોર્ટ અનુસાર, લાલમોનિરહાટ સદર ઉપજિલ્લામાં ધાર્મિક હિંદુ વિધિથી સંબંધિત પૂજા સમિતિના સચિવ પ્રદીપ ચંદ્ર રોયના ઘરની તોડફોડ અને લૂંટ કરવામાં આવી છે.

તોફાનીઓએ નગરપાલિકાના સભ્ય મુહીન રોયની કોમ્પ્યુટરની દુકાનમાં પણ તોડફોડ કરી હતી અને લૂંટ ચલાવી હતી. કાલીગંજ ઉપજિલ્લાના ચંદ્રપુર ગામમાં 4 હિંદુ પરિવારોના ઘરોમાં તોડફોડ અને લૂંટફાટ કરવામાં આવી હતી. હાથીબંધ ઉપજિલ્લાના પુરબો સરદુબી ગામમાં 12 હિંદુઓના ઘરોને આગ ચાંપવામાં આવી હતી.

હિન્દુઓના મકાનો તોડી પાડયા 

બાંગ્લાદેશી મીડિયા અનુસાર, પંચગઢમાં ઘણા હિન્દુઓના ઘરોમાં તોડફોડ અને લૂંટફાટ કરવામાં આવી છે. ઓક્યા પરિષદના મહાસચિવ મોનિન્દ્ર કુમાર નાથે કહ્યું કે એવો કોઈ વિસ્તાર કે જિલ્લો બાકી નથી જ્યાં હિંદુઓ પર હુમલો ન થયો હોય. તેમને સતત અલગ-અલગ વિસ્તારોમાંથી હુમલાની માહિતી મળી રહી છે.

મંદિરમાં તોડફોડ, ઘરો પર હુમલા

અહેવાલો અનુસાર, હિંદુઓને તેમના ઘરમાંથી ખેંચીને મારવામાં આવી રહ્યા છે. તેમની દુકાનો લૂંટાઈ રહી છે. આ હુમલાઓને કારણે હિન્દુઓ ભયના છાયામાં જીવી રહ્યા છે. જણાવવામાં આવી રહ્યું છે કે દિનાજપુર શહેર અને અન્ય ઉપનગરોમાં 10 હિન્દુઓના ઘરો પર હુમલો કરવામાં આવ્યો છે. હુમલાખોરોએ શહેરના રેલબજારહાટમાં એક મંદિરમાં પણ તોડફોડ કરી હતી.

300 હુમલાખોરોએ ઈમારતને સળગાવી દીધી હતી

બાંગ્લાદેશ હિંદુ-બૌદ્ધ ક્રિશ્ચિયન કાઉન્સિલના જનરલ સેક્રેટરી ઉત્તમ કુમાર રોયે જણાવ્યું હતું કે ખાનસામા ઉપજિલ્લામાં ત્રણ હિંદુઓના ઘરો પર હુમલો કરવામાં આવ્યો હતો. લક્ષ્મીપુરમાં ગૌતમ મજુમદારે જણાવ્યું કે સાંજે 7.30 વાગ્યે 200-300થી વધુ હુમલાખોરોએ તેમની બે માળની ઇમારતને આગ ચાંપી દીધી.

ટોળાએ હિન્દુઓના ઘરોને નિશાન બનાવ્યા હતા

ખુલનામાં સાંજે 5 વાગ્યે બિમાન બિહારી અમિત અને અનિમેષ સરકારના ઘરોમાં તોડફોડ કરવામાં આવી હતી. રૂપશા પોલીસ સ્ટેશન હેઠળના હસગતી ગામના શ્યામલ કુમાર દાસ અને સ્વજન કુમાર દાસના ઘરો પર પણ હુમલો કરવામાં આવ્યો હતો અને લૂંટ કરવામાં આવી હતી.