ગોંડલમાં અલ્પેશ કથીરિયાનો ફિયાસ્કોઃ જયરાજસિંહ જાડેજાના ઘર નજીક જવાનું ટાળ્યું

રવિવારે ગોંડલ પાટીદાર વિરુદ્ધ ક્ષત્રિયોની રાજકીય સમરાંગણની ભૂમિ બની ગયુ હતુ. ગોંડલમાં અલ્પેશ કથીરિયા વિરૂદ્ધ ગણેશ જાડેજાનો માહોલ ગરમાયો છે. અલ્પેશ કથીરિયાએ ગોંડલને મિરઝાપુર કહ્યું હતું. ગોંડલ પહોંચેલા અલ્પેશ કથીરિયા અને ધાર્મિક માલવિયા સામે કાળા વાવટા ફરકાવી અને હાય હાયના લાગા લગાવી જયરાજસિંહના સમર્થકોએ વિરોધ કરતાં જયરાજસિંહ જાડેજાના ઘર પાસેથી નીકળવાનું ટાળ્યું હતું. તેથી ગણેશ જાડેજાએ ટોણો માર્યો હતો કે, અલ્પેશ મેદાન છોડીને ભાગ્યો..

અલ્પેશ કથીરિયાએ ગોંડલને મિરઝાપુર ગણાવ્યું..

અલ્પેશ કથીરિયા ગોંડલ પહોંચતા જોરદાર બબાલ થઈ હતી. અલ્પેશના સમર્થકો સામે ગણેશ જાડેજાના સમર્થકો સામે વિરોધ દર્શાવતા સામસામે આવી ગયા હતા. અલ્પેશ કથીરિયાના કાફલામાં રહેલી કાર ઉપર લોકોએ હુમલો કર્યો હતો. જેના કારણે એક ગાડીના કાચ તૂટી ગયા હતા. ગોંડલમાં ઠેક ઠેકાણે અલ્પેશ કથીરિયાનો વિરોધ કરાયો હતો. અલ્પેશ કથીરિયાએ ફરીથી ગોંડલને મિરઝાપુર ગણાવ્યુ હતુ. તેણે કહ્યું કે, અમારી કાર પર પથ્થરમારો કરાયો છે. આજે તેઓ બૌખલાઈ ગયા છે. ભયમાં છે. એટલે સાબિત થાય છે કે આ મિરઝાપુર છે. મારી એક જ વાત છે. કોઈને દબાવી પોતાનુ શાસન ન કરવુ જોઈએ. ગોંડલમાં લોકોને મળ્યા બાદ CMને પણ મળીશું. 

અલ્પેશ કથીરિયાએ અચાનક રૂટ બદલ્યો... 

ગોંડલ વિવાદમાં અલ્પેશ કથિરીયાએ પીછેહઠ કરી હતી. તેણે અગાઉ પૂર્વ ધારાસભ્ય જયરાજસિંહ જાડેજાના ઘરેથી નીકળવાનો પડકાર ફેંક્યો હતો. પરંતુ, જયરાજસિંહ જાડેજાના ઘર પાસેથી નીકળવાનું ટાળ્યું હતુ. જયરાજસિંહના સમર્થકોનો રોષ જોતા અલ્પેશ કથીરિયાએ અક્ષર મંદિરથી રૂટ ડાયવર્ટ કરી નાખ્યો હતો. ગોંડલમાં દોઢ કલાકનું રોકાણ કરી અલ્પેશ કથીરિયા અને જીગીષા પટેલ ખોડલધામ રવાના થઈ ગયા હતા. ગણેશ જાડેજાએ અલ્પેશ કથીરિયા હાય.. હાય..ના નારા લગાવ્યા હતા. 

અલ્પેશ મેદાન છોડીને ભાગ્યોઃ ગણેશ જાડેજા 

અલ્પેશ કથીરિયાએ ગણેશ જાડેજાના ઘર પાસેથી નીકળવાનું ટાળતાં ગણેશ જાડેજાએ ટોણો માર્યો હતો કે, અલ્પેશ મેદાન છોડીને ભાગ્યો. ગોંડલમાં ભેગી થયેલી જનમેદની ધમકી આપી કે લમણે બંદૂર રાખીને ભેગી કરવામાં આવેલી નથી. સ્વયંભૂ જનમેદની છે. ગોંડલમાં સામાજિક સમરસતા છે તે આ દ્રશ્યો ઉપરથી જોવા મળી રહ્યું છે.

કથીરિયાના કાફલાની ગાડીના કાચ તોડ્યા...

અલ્પેશ કથીરિયા રાજકોટથી ગોંડલ જઈ રહ્યો હતો તે દરમિયાન ગણેશ ગોંડલના સમર્થકોએ વિરોધ કર્યો હતો. આ સમયે કથીરિયાના કાફલામાં રહેલી એક ગાડીના કાચ તોડવામાં આવ્યા હતા. સમર્થકોએ કહ્યું કે, આ ગોંડલ નથી મિરઝાપુર છે. અલ્પેશ કથીરિયા, ધાર્મિક માલવિયા અને જિગીષા પટેલે સ્વામી નારાયણ મંદિરે દર્શન કર્યા હતા. ગણેશ જાડેજાના ઘરની બહાર પોલીસ બંદોબસ્ત ગોઠવાયો હતો.

લોહિયાળ ઘટના બનતા રહી ગઈ..

ગોંડલ લોહિયાળ બનતું રહી ગયુ હતું. કથીરિયાનો ગોંડલમાં જોરદાર વિરોધ કરાયો હતો. આ સમયે  ગણેશના સમર્થકો પર કાર ચડાવી દેવાનો પ્રયાસ કરાયો હતો. પૂરપાટ ઝડપે આવી રહેલી કાર સમર્થકો વચ્ચેથી નીકળી ગઈ હતી. થોડા માટે હિટ એન્ડ રનની ઘટના બનતાં અટકી ગઈ હતી.

ગોંડલ છોડીને ભાગ્યા નથીઃ અલ્પેશ કથીરિયા 

ગણેશ જાડેજા અને જયરાજસિંહના નિવેદન બાદ અલ્પેશ કથીરિયાએ કહ્યું કે, ગોંડલમાં કોઈ આવી ન શકે તેવો પડકાર ફેંક્યો હતો. અમે આવીને બતાવ્યું. આગામી દિવસોમાં પણ ગોંડલ આવીશું. ગણેશ જાડેજાના ભયના લીધે જ ગોંડલમાં ડરનો માહોલ છે. ગાડીઓની તોડફોડ કરવી, કાફલો રોકવો, લોકોને રોકવા એટલે ગોંડલ મિરઝાપુર સાબિત થઈ રહ્યું છે. અમે ગોંડલ છોડીને નથી ભાગ્યા. અમારે જ્યાં ફરવાનું હતું ત્યાં અમે ફર્યા છીએ. જયરાજસિંહના સર્ટીફિકેટની અમારે જરૂર નથી. અમારે જાન જોડાવી, અણવર બનવું તે સમયે નક્કી કરીશું. અમારે ચૂંટણી કઈ રીતે લડવી અને વડીલોના આશીર્વાદ લઈને નક્કી કરીશું. સમગ્ર બાબલ ભાજપ હાઇકમાન્ડે જોઈ છે.

અહીં રહેતા નથી તેવા લોકો વિરોધ કરવા આવી જાય છેઃ જયરાજસિંહ જાડેજા 

જયરાજસિંહ જાડેજાએ જણાવ્યું કે, ગોંડલને ખોટી રીતે બદનામ કરવામાં આવી રહ્યું છે. ગોંડલમાં અઢારેય વરણ અમારી સાથે છે. લોકોના રોષ જોઇ ગોંડલ છોડીને જતું રહેવું પડ્યું છે. અમને જનતાનો વિશ્વાસ મળ્યો છે. 500 કિલોમીટર દૂર રહીને ગોંડલ ભયમાં હોવાનો આક્ષેપ કરે છે. ગણેશ ગોંડલ અમે નામ નથી આપ્યું પણ ગોંડલની જનતાએ નામ આપ્યું છે. જયરાજસિંહ જાડેજાએ પડકાર ફેંક્યો કે, અણવર બનીને નહિ વરરાજા બનીને આવજો. નગરપાલિકા, માર્કેટ યાર્ડ, તાલુકા પંચાયત અને જિલ્લા પંચાયતની ચૂંટણી આવી રહી છે. તેથી જે લોકો અહીં રહેતા નથી તેઓ વિરોધ કરવા આવી જાય છે.

ગણેશ જાડેજાએ પડકાર ફેંકતા વિવાદ થયો હતો..

ગોંડલના સુલતાનપુર ગામમાં ગણેશ જાડેજાએ જાહેર સભા કરી શક્તિ પ્રદર્શન કર્યુ હતું. જયરાજસિંહ જાડેજા અને ગણેશ જાડેજાના સમર્થનમાં જનાક્રોશ સભાનું આયોજન કરવામા આવ્યું હતું. પાટીદાર અગ્રણીઓએ ગણેશ જાડેજા અને જયરાજસિંહ જાડેજાને સમર્થન જાહેર કર્યુ હતું. આ સભામાં ગણેશ જાડેજાએ અલ્પેશ કથીરિયા, મેહુલ બોઘરા અને જિગીષા પટેલને આડે હાથ લીધા હતા. ગણેશ જાડેજાએ કહ્યું હતું કે, સુરતમાં બેસેલા ક્રાંતિકારી કીડાઓ સુધી આ વાત પહોંચવી જોઈએ. તેણે અલ્પેશ કથીરિયાનું નામ લઈને કહ્યું હતું કે, તારા પર 14-14 પાટીદાર દીકરાઓના મૃત્યુનું પાપ છે. પહેલા એ ધો પછી ગોંડલ આવજે. ગણેશની ગાડી અડધી રાત્રે ગોંડલ તાલુકામાં જોવા મળશે. માંનું ધાવણ પીધું હોય તો આવી જજે મેદાનમાં. મેહુલ બોઘરા પર પ્રહાર કરતા કહ્યું કે, મેહુલ બોઘરાનું કામ જ્યાં શાંતિ હોય ત્યાં અશાંતિ સ્થાપવાનું છે. જિગીષા પટેલ પર પ્રહાર કરતા કહ્યું, તું તારું ઘર સાચવી નથી શક્તી.