અમદાવાદમાં ભાજપના જ કોર્પોરેટરનો બળવો! ઇજનેરની ઓફિસને તાળું મારી મ્યુનિસિપલ કમિશનરનું રાજીનામું માગ્યું

Ahmedabad Shahpur Ward Controversy: અમદાવાદ મ્યુનિસિપલ કોર્પોરેશનમાં ભાજપની સત્તા હોવા છતાં હવે ભાજપના જ કોર્પોરેટરે અધિકારીઓની કામગીરી સામે ખુલ્લો વિરોધ નોંધાવ્યો છે. શહેરના કોટ વિસ્તારના શાહપુર વોર્ડમાં ગટર, પાણી અને વિકાસનાં કામો સમયસર પૂર્ણ નહીં થતાં ભાજપના કોર્પોરેટર જીતેન્દ્ર ચૌહાણે દૂધેશ્વર પાણીની ટાંકી પાસે આવેલી વોર્ડ ઓફિસમાં આસિસ્ટન્ટ સિટી ઇજનેરની ઓફિસને તાળું મારી દીધું હતું. વારંવાર રજૂઆતો કરવા છતાં કામો થતાં ન હોવાનો આક્ષેપ કરીને તેમણે મ્યુનિસિપલ કમિશનર કામ કરાવી ન શકે તો રાજીનામું આપી દેવું જોઈએ તેવી માગ કરી છે.

શાહપુર વોર્ડમાં ગટર-પાણીની સમસ્યા, લોકોની ફરિયાદોથી કોર્પોરેટર નારાજ
શાહપુર વોર્ડના ભાજપના કોર્પોરેટર જીતેન્દ્ર ચૌહાણે જણાવ્યું હતું કે શાહપુર શ્રમજીવી અને ગીચ વસ્તી ધરાવતો વિસ્તાર છે. અહીંની વિવિધ ચાલીઓમાં ગટર અને પાણીની સમસ્યાઓને લઈને સ્થાનિક લોકો સતત ફરિયાદો કરે છે. લોકો પોતાની સમસ્યાઓ લઈને કોર્પોરેટરની ઓફિસે પહોંચે છે, પરંતુ અધિકારીઓ સમક્ષ વારંવાર રજૂઆત કરવા છતાં સમસ્યાઓનું નિરાકરણ આવતું ન હોવાનો તેમણે આક્ષેપ કર્યો છે. જીતેન્દ્ર ચૌહાણના જણાવ્યા અનુસાર, અનેક પ્રોજેક્ટનાં કામો છેલ્લા છથી આઠ મહિનાથી અધૂરાં પડ્યાં છે. કોર્પોરેટરના બજેટમાંથી થવાનાં કામો પણ હજી સુધી પૂર્ણ થયાં નથી. આ સ્થિતિમાં સ્થાનિક લોકોને જવાબ આપવો મુશ્કેલ બની રહ્યો છે. લોકોની ફરિયાદો વધતી હોવા છતાં મ્યુનિસિપલ તંત્ર દ્વારા યોગ્ય કાર્યવાહી થતી ન હોવાથી તેમણે તાળાબંધી કરીને વિરોધ નોંધાવ્યો હતો.

ધારાસભ્ય અને કમિટીમાં રજૂઆત છતાં કામ નહીં થયાનો આક્ષેપ
કોર્પોરેટર જીતેન્દ્ર ચૌહાણે વધુમાં જણાવ્યું હતું કે આ મુદ્દે તેમણે દરિયાપુરના ધારાસભ્ય કૌશિક જૈન સમક્ષ પણ રજૂઆત કરી હતી. જોકે, તેમના આક્ષેપ મુજબ અધિકારીઓ ધારાસભ્યની વાતને પણ ગંભીરતાથી લેતા નથી. તેમણે જણાવ્યું હતું કે મેયર અને સ્ટેન્ડિંગ કમિટીના ચેરમેન સમક્ષ આ મુદ્દે અલગથી રજૂઆત કરી નથી, પરંતુ કમિટીની બેઠકો દરમિયાન વારંવાર કામો અંગે રજૂઆત કરવામાં આવી છે. તેમ છતાં શાહપુર વોર્ડમાં વિકાસનાં કામો આગળ વધ્યાં નથી. ગટર, પાણી અને અન્ય પાયાની સુવિધાઓની સમસ્યાઓ યથાવત્ રહેતાં હવે તાળાબંધી કરીને વિરોધ નોંધાવવો પડ્યો હોવાનું તેમણે જણાવ્યું હતું.

'કામ નહીં થાય તો બીજી ઓફિસોને પણ તાળાં મારીશું'
દૂધેશ્વર પાણીની ટાંકી પાસે આવેલી મ્યુનિસિપલ કોર્પોરેશનની ઓફિસમાં આસિસ્ટન્ટ સિટી ઇજનેરની ઓફિસને તાળું માર્યા બાદ જીતેન્દ્ર ચૌહાણે તંત્રને ચેતવણી આપી હતી. તેમણે સ્પષ્ટ કહ્યું હતું કે જો કામો નહીં થાય તો આગામી દિવસોમાં અન્ય ઓફિસોને પણ તાળાં મારવામાં આવશે. તેમણે મ્યુનિસિપલ કમિશનરની કામગીરી સામે સવાલ ઉઠાવતાં કહ્યું હતું કે જો મ્યુનિસિપલ કમિશનર કામ કરાવી ન શકે તો તેમણે રાજીનામું આપી દેવું જોઈએ. શાહપુર જેવા વિસ્તારમાં ગટર અને પાણીની સમસ્યાઓનો ઉકેલ લાવવો જરૂરી છે, પરંતુ વારંવાર રજૂઆત કરવા છતાં કામો થતાં ન હોવાનો તેમનો આક્ષેપ છે.

રોડ-ફૂટપાથનાં કામોમાં ગેરરીતિનો આક્ષેપ, વિજિલન્સ તપાસની માગ
ભાજપના કોર્પોરેટરે અધિકારીઓ સામે ગંભીર આક્ષેપ કરતાં જણાવ્યું હતું કે રોડ અને ફૂટપાથનાં કામોમાં નાણાકીય ગેરરીતિ થતી હોવાની શંકા છે. આ મામલે અધિકારીઓની વિજિલન્સ તપાસ થવી જોઈએ. સાથે જ અધિકારીઓ પાસે આટલા રૂપિયા ક્યાંથી આવ્યા તેની પણ તપાસ થવી જોઈએ તેવી માગ તેમણે કરી હતી. જોકે, આ આક્ષેપોની સ્વતંત્ર પુષ્ટિ થઈ નથી અને સંબંધિત અધિકારીઓનો પક્ષ પણ સામે આવ્યો નથી.

ભાજપના શાસનમાં ભાજપના જ કોર્પોરેટરની નારાજગી ચર્ચામાં
અમદાવાદ મ્યુનિસિપલ કોર્પોરેશનમાં છેલ્લા 20 વર્ષથી ભાજપનું શાસન હોવા છતાં ભાજપના જ કોર્પોરેટર દ્વારા કામો ન થતાં હોવાની ફરિયાદ કરવામાં આવતાં રાજકીય ચર્ચા શરૂ થઈ છે. શાહપુર વોર્ડમાં ગટર-પાણીની સમસ્યા, અધૂરા પ્રોજેક્ટ અને કોર્પોરેટરના બજેટનાં કામો અંગે ઉઠેલા સવાલો હવે મ્યુનિસિપલ તંત્ર માટે પડકારરૂપ બન્યા છે. હવે કોર્પોરેશનના અધિકારીઓ આ ફરિયાદો અંગે શું કાર્યવાહી કરે છે, અધૂરાં કામો ક્યારે પૂર્ણ થાય છે અને વિજિલન્સ તપાસની માગ અંગે કોઈ નિર્ણય લેવાય છે કે નહીં તેના પર નજર રહેશે.