ભાજપમાં ભડકોઃ વિજાપુર તાલુકા ભાજપમાંથી ઠાકોર સમાજના 104 હોદ્દેદારોના રાજીનામા

મહેસાણા જિલ્લા ભાજપમાં ભડકો થયો છે. વિજાપુર તાલુકા ભાજપ સંગઠનની રચનામાં ઠાકોર-ક્ષત્રિય સમાજની બાદબાકીથી રોષે ભરાયેલા ઠાકોર સમાજના 104 હોદ્દેદારોએ ભાજપમાંથી રાજીનામા ધરી દીધા છે. જ્યારે આગામી દિવસોમાં બુથ સમિતિ અને પેજ પ્રમુખ સહિતના ઠાકોર સમાજના 500 કાર્યકરોએ રાજીનામા આપવાની ચીમકી ઉચ્ચારી છે. ઉલ્લેખનીય છે કે, વિજાપુર તાલુકા ભાજપના સંગઠનની રચનામાં 16 હોદ્દેદારોમાંથી ઠાકોર સમાજના માત્ર બે આગેવાનોનો સમાવેશ કરાયો છે. ઠાકોર સમાજને મહામંત્રી પદ નહી અપાતા ભાજપ પ્રત્યે ઠાકોર-ક્ષત્રિય સમાજમાં ભારે રોષ જોવા મળ્યો છે. 

વિજાપુર તાલુકા ભાજપના નવા સંગઠનમાં ઠાકોર સમાજને અન્યાય કરાયો હોવાની રાવ ઉઠી છે. લાડોલના જોગણી માતાજીના મંદિર કેમ્પસમાં યોજાયેલી બેઠકમાં ભાજપમાં રહેલાં ક્ષત્રિય ઠાકોર સમાજના આગેવાનોએ પોતાનો રોષ વ્યક્ત કર્યો હતો. આ બેઠકમાં ઠાકોર સમાજના ભાજપના બે તાલુકા-જિલ્લા ડેલીગેટ, બે તાલુકા ઉપપ્રમુખ સહિતના હોદ્દેદારો સહિત 104 આગેવાનોએ સામુહિક રાજીનામાં ધરી દીધા છે. જેના કારણે મહેસાણા જિલ્લા ભાજપમાં હડકંપ મચી ગયો છે.

આ બેઠકમાં જિલ્લા પંચાયત સદસ્ય શંકાબેન, તાલુકા પંચાયત સદસ્ય રણજીતસિંહ ઠાકોર (ડાભલા), તાલુકા ભાજપ ઉપપ્રમુખ બળવંતસિંહ (લાડોલ), ચંદનજી ઠાકોર, ઉપપ્રમુખ, જિલ્લા કિસાન મોરચો મોગાજી ઠાકોર, રણજીતસિંહ ચૌહાણ, મહેશજી ઠાકોર (ખરોડ), ભરતજી કચરાજી (ગવાડા), જયેશજી (મહાદેવપુરા), ગુલાબસિંહ ચૌહાણ (રામપુરા), મનુજી ઠાકોર (લાડોલ) સહિત 104થી વધુ હોદ્દેદારો અને કાર્યકરોએ સામુહિક રાજીનામાં આપી દીધા હતા. આગામી દિવસોમાં બુથ સમિતિ અને પેજ પ્રમુખના હોદ્દાઓ પરથી 500થી વધુ કાર્યકરો રાજીનામાં આપશે તેવી ચીમકી આપી હતી.

ખરોડ ગામના ઠાકોર સમાજના અગ્રણી મહેશજી ઠાકોરે બેનિફિટ ન્યૂઝને જણાવ્યું કે, વિજાપુર તાલુકામા ઠાકોર સમાજની વસતી વધારે છે. વિજાપુર તાલુકામાં પાટીદાર સમાજના 70 હજાર અને ઠાકોર સમાજના 50 હજાર મતદારો છે. પાટીદાર સમાજના 20 હજાર મતદારો બહાર રહે છે. તેથી પાટીદાર સમાજ જેટલા અમારા મતદારો થઈ જાય છે. તેમ છતાં સંગઠનમાં અમારા સમાજની અવગણના કરાઈ  છે. તાલુકા ભાજપના સંગઠનમાં 16 હોદ્દેદારોની નિમણૂકમાં ઠાકોર સમાજના માત્ર બે આગેવાનોનો સમાવેશ કરાયો છે. અમારી વસતી વધારે હોવા છતાં મહામંત્રી પદ આપવામાં આવ્યુ નથી. ભાજપ દ્વારા નવા સંગઠનમાં ક્ષત્રિય ઠાકોર સમાજના કાર્યકરોની બાદબાકી કરી યુવા સક્રિય કાર્યકરો સાથે અન્યાય કરાયો છે. ઠાકોર સમાજની માગને ધ્યાને નહીં લેવાય તો ઉગ્ર વિરોધ કરવામાં આવશે.